موکأشفه 21 - Gilaki New Testamentتأزه اورشلیم 1 بأزون ایتأ تأزه زیمین و آسمأنَ بیدِم، چونکی او اوّلی زیمین و آسمأن غیبَ بوسته بو. دریأ جَایٚم دِه خٚوٚری نوبو. 2 و من، یوحنا، اورشلیمٚ موقدسٚ شهرَ بیدِم کی جٚه آسمأن، جٚه خودا ورجأ بیجیر اَمؤیی. چی پورجلالٚ نمأیی بو! اورشلیمٚ شهر ایتأ عروسٚ مأنستَن خوشگل بو کی خؤرَه زأمأ دِئنٚ وأسی حأضیرَ کوده‌بی! 3 تختٚ جَا، ایتأ بولندٚ صدا بشتأوستم کی گفتی: «خُب فأندر! جٚه اَنی پٚسی، معبد آدمأنٚ میأنی نٚهأ. جٚه اَنی پٚسی خودا اَشأنی اَمرأ زٚندیگی کونه و اَشأن خودا آدمأن بٚده. هطویه، خودا خودش اَشأنٚ اَمرأیه. 4 خودا هرتأ آرسویَ اوشأنی چومأنٚ جَا پأکونه. دِه نه مٚردنی به و نه غورصه، نه نأله و نه درد، چونکی تومأمٚ اَشأن قدیمی دونیأ شین بو کی جٚه بین بوشؤ.» 5 او وخت اونی کی تختٚ رو نیشته بو بوگفته: «اَسه همٚتأ چی‌یَ نو چأکونم!» و مٚرَه بوگفته: «اَنَ بینیویس چونکی اونچی کی گم، رأست و حِئقت ایسه. 6 دِه تومأنَ بوسته! من الف و یا، و اوّل و آخر ایسٚم. من هرکی‌یَ کی تشنه بٚبه زٚندیگی آبٚ چشمه جَا مرجأنه فأدٚم کی وأخوره. 7 هرکی پیروزَ به تومأمٚ اَ نعمتأنَ ارث بٚره و من اونی خودا بٚم و اون می زأی بِه. 8 ولی اوشأنی کی ترسٚده، اوشأنی کی ایمأن نأرٚده و فأسید ایسٚد و قأتیلأن و اوشأنی کی جنبلٚ جأدو و زٚنأ کونٚده و بُتأنَ پرستٚش کونٚده و تومأمٚ اوشأنی کی دورُغ گده، همٚتأنٚ جیگأ او دریأچه میأن ایسه کی آتش و گوگرد اَمرأ سوجه. اَن هو دویُمی مٚردن ایسه.» 9 او وخت ایتأ جٚه او هفتأ فٚرٚشته کی هفتأ آخری بلأ پیأله‌یَ دٚسٚ میأن دأشتیدی، بأمؤ می ورجأ و بوگفته: «می اَمرأ بیأ کی عروسَ تٚرَه نیشأن بدم. اون بٚرّه عقد بوکوده ایسه.» 10 بأزون در روح مٚرَه ببرده ایتأ بولندٚ کوه قُله سٚر. جٚه اویَه، اورشلیمٚ موقدسٚ شهرَ بیدِم کی جٚه خودا ور آسمأنٚ جَا بیجیر اَمؤیی. 11 شهر خودا جلالٚ میأن غرق بو، و ایتأ تیکه قیمتی جوأهیرٚ مأنستَن، یشمٚ مأنه کی، اونی شفأفٚ بولورأن سوسو زٚنِه، شبق زِئی. 12 شهرٚ حیصأرأن، پأن و بولند بو، شهر دوأزده‌تأ دروأزه و دوأزده‌تأ فٚرٚشته کی دربأن بود، دأشتی. ایسرأییلٚ نتأجٚ دوأزده‌تأ قبیله ایسم، دروأزه‌یأنٚ رو بینیویشته بوبوسته بو. 13 هرتأ ور، ینی شومأل، جونوب، شرق و غربٚ میأن سه‌تأ دروأزه نٚهأ بو. 14 شهرٚ حیصأرأن دوأزده‌تأ پأیه دأشتی کی اوشأنٚ رو بٚرّه روسولأنٚ نأم بینیویشته بوبوسته بو. 15 فٚرٚشته دٚسٚ میأن ایتأ چو طلأ جَا نٚهأ بو کی اونی اَمرأ خأستی شهر و دروأزه‌یأن و اونی حیصأرأنَ اندأزه بیگیره. 16 وختی شهرَ اندأزه بیگیفته، معلوم بوبوسته مربعَ مأنه، ینی کی اونی درأزأ و پأنأ ایتأ اندأزه ایسه. حِئقتَ بٚخأیید، اونی درأزأ و پأنأ و بولندی، هرتأ، دوأزده هیزأر تیرَ پرتأب کودن اَندر بو. 17 بأزون شهرٚ حیصأرٚ بولندیَ اندأزه بیگیفته و معلوم بوبوسته همٚتأ جیگأ میأن صد و چهل و چأر ذراع ایسه. فٚرٚشته موشخصٚ معیأرأنٚ اَمرأ، اَ اَندأزه‌یأنَ مٚرَه بوگفت. 18-19 شهر خودش خألصٚ طلأ جَا کی شیشه مأنستَن شفأف چأکوده بوبوسته بو و اونٚ حیصأر یشمٚ جَا بو کی دوأزده ردیف جوأهرنیشأنٚ پأکأرٚ سنگأنٚ رو چأکوده بوسته بو: اوّلی رَج یشمٚ جَا، دویُمی لأجوردٚ سنگٚ جَا، سیومی سیفیدٚ عقیقٚ جَا، چأرومی زومُرودٚ جَا، 20 پنجومی سورخٚ عقیقٚ جَا، شیشومی عقیقٚ جَا، هفتومی زٚبرجٚدٚ جَا، هشتومی کبودٚ یأقوتٚ جَا، نُهومی زردٚ یأقوتٚ جَا، دهومی سبزٚ عقیقٚ جَا، یأزدهومی فیروزه جَا و دوأزدهومی یأقوتٚ جَا بو. 21 شهرٚ دوأزده‌تأ دروأزه جینس، مولوأری جَا بو، هرتأ دروأزه ایتأ تیکه مولوأری جَا. شهرٚ اصلی خیأبأن خألصٚ طلأ جَا بو کی شیشه مأنستَن شبق زِئی. 22 شهر میأن هیتأ معبد بیدِه نوبوستی، چونکی خودا کی تنأ قأدیر ایسه و بٚرّه، اونی معبد ایسٚد. 23 اَ شهر هیذره خورشید و مأهٚ نورَ لأزیم نأشتی، چونکی خودا و بٚرّه جلال و عظمت شهرَ روشنَ کودی. 24 اونی نور زیمینٚ قومأنم نور فأدأیی، و دونیأ پأدیشأیأن اَمؤییدی و خوشأنی جلالَ اونَ پیشکش کودیدی. 25 شهرٚ دروأزه‌یأن هیوخت دٚوٚسته نیبه، چونکی اویَه همیشٚک روج ایسه و شب وجود نأرِه! 26 تومأمٚ قومأنٚ گولأز و عیزت و جلال شِه اونی دورون. 27 هیتأ بدی یا نأجور و فأسیدٚ آدمَ ولأنده بشه اویَه. اَ شهر فقد اوشأنی جیگأ ایسه کی اوشأنی نأم بٚرّه زٚندیگی دفترٚ میأن بینیویشته بوبوسته‌بی. |
© 2024 Transform Iran
Transform Iran