موکأشفه 18 - Gilaki New Testamentبابِلٚ آخری جٚه بین شؤئؤن 1 اَ رویأیأنٚ پٚسی، ایتأ دِه فٚرٚشته‌یَ بیدِم کی تومأمٚ ایختیأرٚ اَمرأ آسمأنٚ جَا بأمؤ بیجیر. اَ فٚرٚشته چنأن شبق زِئی کی تومأمٚ زیمینَ روشنَ کوده. 2 اون بولندٚ صدا اَمرأ دأد زِئی: «بابِل فوگوردٚسته، او پیله شهر ویرأنَ بوسته! خأک اَمرأ ایتأ بوبوسته! بابِل دیوأن و شیطانأن و پٚلید روحأنٚ جوخوفتنٚ جأجیگأ بوبوسته. 3 چونکی تومأمٚ قومأن اونی فیسأد و لأبألیگری شرأبٚ جَا مستَ بوستٚد. دونیأ پأدیشأیأن اویَه خوش بوگذرأنِده، و دونیأ تأجیرأن اونی پورتجمولٚ زٚندیگی جَا پولدأرَ بوستٚد.» 4 بأزون ایتأ دِه صدا آسمأنٚ جَا بشتأوستم کی گفتی: «اَی می آدمأن، اَ شهرٚ جَا دیل بٚکنید و شٚمٚره اونی گونأیأنٚ اَمرأ نٚجٚستَ نوکونید، اَطو بٚبه شومأنم هو موجأزأتَ دینیدی. 5 چونکی اَ شهرٚ گونأیأن تأ آسمأن سٚربٚسٚر نٚهأ. جٚه اَ خأطر، خوداوند حأضیره کی اونَ، اونی جینأیتأنٚ وأسی موجأزأت بوکونه. 6 پس، اونی نأجور کأرأنٚ وأسی دو برأبر اونَ موجأزأت بوکونید. اون البأقیأنٚ رِه عذأبٚ پیأله‌یَ پورَ کوده، پس دو برأبر اونَ وأخورأنید. 7 تأ هسأ اونی زٚندیگی، تجمول و خوشگذرأنِنٚ میأنی غرق بو؛ اَنی پٚسی اونَ لبألب عذأب و شکنجه اَمرأ پورَ کونید. گفتأندره: "من ایتأ بدبختٚ ویوه زنأی نییٚم؛ من اَ تأج و تختٚ ملکه ایسٚم؛ هیوخت غم و غورصه رنگَ نیدینٚم." 8 پس ایتأ روجٚ میأن، مرگ و عزأ و قأطی سأل اونی جأن دکفه و آتشٚ دورون سوجه. چونکی خوداوند کی قأدیره اونَ موجأزأت کونه.» 9 او وخت دونیأ پأدیشأیأن کی اونی اَمرأ زٚنأ کودیدی و اَ کأرٚ جَا لیذّت بٚردیدی، وختی بیدینٚد دود اونی خأکسترٚ جَا ویریزه، اونی رِه عزأ گیرده، 10 جٚه ترس، اونی جَا دور بٚپأ ایسٚده و نأله اَمرأ گده: «حِیف کی بابِل، او پیله شهر ایتأ چوم دٚوٚستٚنٚ اَمرأ جٚه بین بوشؤ!» 11 دونیأ تأجیرأنم اونی وأسی عزأ بیگیفتٚده، زأر زأر گریه کونٚده، چونکی دِه هیکس نئیسأ کی اوشأنی جینسأنَ بیهینه. 12-13 اَ شهر، اَشأنی جینسأنٚ رِه پیله موشتری بو، اَجور جینسأن جٚه طلأ، نوقره، قیمتی سنگأن و مولوأری، نرمٚ نأزکٚ کتأن و ارغوأنی و سورخٚ ابریشمأن، جوروأجور عطری چوبأن و عأج جَا زینتی جینسأن، قیمتی چوبأن کی خرأطی بوبوسته، مِس و آهین و مرمر، ادویه و عطر، بوخور و زومأت، کُندُر و شرأب و زیتونٚ روغن، خورومٚ آرد و گندم، گأب و گوسوٚند، اسب و گأری، غولأم و اینسأنأنٚ جأن بو. 14 تأجیرأن هطو کی آرسو فوکونده، گده: «تومأمٚ اوچیأنی‌یَ کی دوس دأشتی جٚه دٚس بٚدأیی تی جأه و جلال همٚتأن به بأد بوشؤ و هیوخت ایوأردِه تی سأم نیبه.» 15 پس، او تأجیرأن کی اَ جینسأنٚ فوروختنٚ اَمرأ مأل و مینألدأر بوبوستٚد، دور بٚپأ ایسأده، جٚه او خطر کی اَشأنَ پأترس نِهِه زهله کونٚده و گریه اَمرأ گده: 16 «افسوس کی او پیله شهر تومأمٚ خو قشنگی و ثروٚتٚ اَمرأ، ایتأ چوم دٚوٚستٚنٚ اَمرأ دود بوبوسته! او شهر کی ایتأ قشنگٚ زنأکٚ مأنستَن بو کی ارغوأنی و سورخٚ قیمتی رختأن کتأنٚ جَا دوکودی و طلأ و قیمتی سنگأن و مولوأری اَمرأ خؤرَه چأکون وأکون کودی.» 17 کشتیأنٚ صأبأن و نأخودایأن و مألأیأن بٚپأ ایسٚده و جٚه دور 18 او شهرٚ رِه کی اونی خأکسترٚ جَا دود بوجؤر شِه، آرسو فوکونده، گده: «تومأمٚ دونیأ میأن، دِه کویه اَطوچی شهر بیأفته بِه؟» 19 و غم و غورصه جَا، خأکَ خوشأنٚ سٚر فوکونده، گده: «افسوس، افسوس جٚه اَ پیله شهر! جٚه اونی مأل و مینأل کی حد نأشتی، اَمأن همٚتأن مأل و مینألدأر بوبوستیم؛ و هسأ ایتأ دٚمٚ میأن همٚچی دود بوبوسته!» 20 ولی اَی تو آسمأن، بابِلٚ بخت و ایقبألٚ جَا خوشأل بوبو! و شومأن اَی خودا قوم و روسولأن و پیغمبرأن خوشألی بوکونید! چونکی خودا شیمی اینتقأمَ اونی جَا فأگیفته. 21 بأزون، ایتأ پورقودرتٚ فٚرٚشته، ایتأ آسیأبٚ مأنستَنچی تخته سنگَ اوسأد و اونَ تأوٚدأ دریأ میأن و فریأد بٚزِه: «بابِل اَ پیله شهر همیشٚکٚ رِه غیبَ بِه، هوطویی کی اَ سنگ غیبَ بوسته. 22 هیوخت دِه مزقأنٚ صدا اَ شهرٚ میأن بشتأوسته نیبه. هیتأ صنعت و اوستأکأر اونی میأن نئیسه، و دِه اونی میأن آسیأبٚ صدا گوشَ فأنرٚسه. 23 هیوخت دِه اونی میأن ایتأ چرأغ روشنَ نیبه و عروس و زأمأ خوشألی صدا اونی میأن بشتأوسته نیبه. اونی تأجیرأن، دونیأ میأن، ایتأ زمأت پیله مأل و مینألدأرٚ آدمأن بود و اَ شهر تومأمٚ قومأنَ خو جوفت و کلکأنٚ اَمرأ گول زِئی. 24 تومأمٚ پیغمبرأن و خودا موقدسٚ آدمأنٚ خون و تومأمٚ اوشأنی کی دونیأ میأن بوکوشته بوبوستٚده خون، اَ شهرٚ گردنه.» |
© 2024 Transform Iran
Transform Iran