موکأشفه 16 - Gilaki New Testament

¹ بأزون ایتأ بولندٚ صدا معبدٚ جَا بشتأوستم کی او هفتأ فٚرٚشته‌یَ گفتی: «بیشید و خودا هفتأ غیظٚ پیأله‌یَ خألِه کونید زیمینٚ سٚر.»

² پس اوّلی فٚرٚشته بوشؤ بیرون و وختی خو پیأله‌یَ زیمینٚ رو خألِه کوده، تومأمٚ اوشأنی کی او وحشٚ نیشأنَ دأشتیدی و اونی موجسمه‌یَ پرستٚش کودیدی جأنٚ رو، وأشتنأکٚ زخمأن کی خٚیلی درد کودی بوجؤر بأمؤ.

³ دویُمی فٚرٚشته خو پیأله‌یَ دریأ میأن فوکود و دریأ آب، بٚمٚرده آدمٚ خونٚ مأنستَن بوبوسته، و تومأمٚ دریأ جأنورأن بٚمٚردٚده.

⁴ بأزون سیومی فٚرٚشته خو پیأله‌یَ فوکوده چشمه‌یأن و روخأنأنٚ رو و اوشأنی آب، خون بوبوسته.

⁵ بأزون بشتأوستم اَ فٚرٚشته کی آبأنٚ فٚرٚشته بو، گفتی: «اَی قودوس، کی ایسأیی و ایسأبی، تو اَ حوکمأنٚ میأن کی اوسه کودی عأدیلی.»

⁶ چونکی اوشأن تی پیغمبرأن و موقدسأنٚ خونَ فوکودٚده. پس اوشأنَ خون فأدأیی کی وأخورد، چونکی هن اَشأنٚ سزأیه.»

⁷ او وخت ایتأ صدا مذبحٚ جَا بشتأوستم کی گفتی: «هطویه، اَی خوداوند، ای خودا کی پور جٚه قودرتی، تو عیدألت و حقٚ جَا قیضأوت و موجأزأت کونی.»

⁸ بأزون چأرومی فٚرٚشته خو پیأله‌یَ خورشید رو خألِه کوده کی خورشید خو آتش اَمرأ همٚتأنَ بوسوجأنِه.

⁹ پس همٚتأن او توندٚ گرمأ جَا بوسوختٚد. ولی اَنٚ عوض کی خوشأنٚ نأجورٚ کردکأرأن و فیکرأنٚ جَا توبه بوکوند و خودایَ جلال بٚدٚد، اَ بلأیأنٚ وأسی اونَ کوفر گفتیدی.

¹⁰ پنجومی فٚرٚشته خو پیأله‌یَ فوکوده او وحشٚ تختٚ رو، جوری کی اونی تأج و تخت بوشؤ تأریکی جیر، و اونی بألأخأیأن دردٚ شیدّت جَا، خوشأنٚ لبأنَ گأز گیفتیدی.

¹¹ اَشأنٚم خوشأنی زخمأنٚ دردٚ جَا، آسمأنٚ خودایَ کوفر بوگفتٚده و خوشأنٚ نأجورٚ کردکأرٚ جَا توبه نوکودد.

¹² شیشومی فٚرٚشته خو پیأله‌یَ فراتٚ پیله روخأنٚ رو خألِه کوده و او روخأنٚ آب خوشکَ بوسته، جوری کی شرق پأدیشأیأن بتأنستده خوشأنی سروأزأنَ بودونٚ اَنکی مأنع اَمرأ روبرو بٚبٚد ببرد غرب ور.

¹³ بأزین بیدِم سه تأ پٚلیدٚ روح گوزکأ شمأیل، جٚه اژدها و او وحش و دورُغی پیغمبرٚ دٚهٚنٚ میأن بیرون بأمؤد.

¹⁴ اَ پٚلیدٚ روحأن کی تأنٚده موجیزه‌یٚم بوکوند، بوشؤده تومأمٚ دونیأ فرمأنروأیأنٚ سٚروخت کی خودا او پیله دأوری روجٚ رِه، اوشأنَ خوداوندَ ضد جنگٚ میأن تأوٚدٚد.

¹⁵ هسأ، دیقت بوکونید اوچی‌یَ کی عیسای مسیح گه: «او زمأت کی رأفأ نئیسأیید، دوزدٚ مأنستَن اَیٚم! خوشبحأل اونی کی می وأگردٚستنٚ رِه حأضیر ایسٚه و خو رختَ قأیم دأره نوکونه کی برأنده دٚوأره و روسوأ بٚبه.»

¹⁶ او وخت تومأمٚ دونیأ لشکرأنَ ایتأ جیگأ دورون جمَ کودٚد کی عِبری زوأنٚ میأن اونَ «حارمجدون» (ینی «مجدو کوه») دؤخأنده.

¹⁷ هفتومی فٚرٚشته‌یم خو پیأله‌یَ هوا میأن خألِه کود. او وخت او تختٚ جَا کی معبدٚ میأن نٚهأ بو، ایتأ بولندٚ صدا بشتأوستم کی گفتی: «همه چی تومأنَ بوسته!»

¹⁸ او وختٚ میأنی، ایجور گؤرخأنه و پیله زیمین لرزه رأ دکفته کی اینسأنٚ تأریخٚ میأن سأبقه نأشتی.

¹⁹ او پیله شهر بابِلم سه تأ قیسمت بوبوسته و دونیأ البأقی شهرأنم سنگ و کولوخٚ تپه‌یأنٚ مأنستَن بوبوستٚد. اَطویی، خودا بابِلٚ گونأیأنٚ جَا خو چومَ دٚنوٚسته، بلکی خو غیظٚ پیأله آخری قطره‌یَ، اونَ وأخورأنه؛

²⁰ جزیره‌یأن غیبَ بوستد و کوهأن اَرو اورو بوبوستٚد؛

²¹ ایتأ وأشتنأکٚ تگرگ بٚوأرسته مردومٚ سٚر، ایتأ تگرگ کی اونی هرتأ دأنه پنجأه کیلو بو! و مردوم اَ وأشتنأکٚ بلأ وأسی خودایَ کوفر بوگفتٚده و فأش بٚدأده.