موکأشفه 15 - Gilaki New Testament

موسا سورود و بٚرّه سورود

¹ آسمأنٚ میأن ایتأ دِه عجأیب غرأیبٚ نیشأنه بیدِم کی ایتأ موهیمٚ ایتفأقٚ جَا خٚوٚر دٚئی: هفتأ فٚرٚشته، هفتأ آخری بلأیَ بدأشته بود کی فوکوند زیمین سٚر، کی آخرپٚسی خودا غیظ فوروز بأیٚه.

² بأزون، می جولو ایچی بیدِم کی ایتأ دریأ آتش و بولورٚ شٚبأهت دٚئی کی موج زِئی. دریأ کنأرٚ میأن ای عیده بٚپأ ایسأ بود کی او وحش و اونی موجسمه و اونی ایسمٚ نومره رو پیروزَ بوسته بود. اوشأن همٚتأن چنگأنی‌ خوشأنَ دٚسٚ میأن دأشتیدی کی خودا اَشأنَ فأدأ بو،

^3-4 و بٚرّه سورود و موسا، خودا خیدمتگوزأرٚ سورودَ خأندیدی و گفتیدی: «اَی خودایی کی تی مأنستَن نئیسأ، تی کأرأن پیله‌دأنه و پورجلاله! اَی قومأنٚ پأدیشأ، تی رأیأن عیدألت و حقه! اَی خوداوند، کیسه کی تی جَا زهله نوکونه؟ کیسه کی تی نأمَ حورمت نٚنه؟ چونکی تنأ تو پأک ایسی. همٚتأ قومأن اَیٚده و تی حوضور پرستٚش کونٚده، چونکی تی خوروم کأرأنَ دینٚده.»

هفتأ بلأ پیأله

⁵ بأزون، فأندرستٚم و معبد، ینی خودا خیمه‌یَ آسمأن میأن بیدِم کی همٚتأنٚ رِه کأمیل وأز بو.

⁶ او هفتأ فٚرٚشته کی هفتأ بلأیَ بدأشته بود کی زیمینٚ رو فوکوند، خودا حوضورٚ جَا بیرون بأمؤده. اَشأن ایتأ سیفید رخت کی تیمیزٚ کتأنٚ جَا بو و هیذره لکه نأشتی دوکوده بود، و اَشأنٚ سینه دؤرٚم ایتأ طلأیی قِئش دٚوٚسته بود.

⁷ ایتأ جٚه او چأرتأ زٚنده جأنور، هرتأ جٚه او فٚرٚشته‌یأنَ ایتأ زرینٚ پیأله فأدأ کی او خودا کی اَبدٚ رِه زٚنده ایسٚه، غیظٚ جَا پور بو.

⁸ معبد، خودا قودرت و جلالٚ دودٚ جَا پورَ بوسته، جوری کی دِه هیکس نتأنستی بودورون بشه، تأ اَنکی او هفتأ فٚرٚشته، هفتأ بلأیَ فوکودٚد و تومأنَ کودٚد.