موکأشفه 14 - Gilaki New Testament

بٚرّه و اوشأنی کی آزأدَ بوستٚد

¹ بأزین بٚرّه‌یَ بیدِم کی اورشلیمٚ میأن، صهیونٚ کوه سٚر بٚپأ ایسأ. اونی اَمرأ صد و چهل و چأر هیزأر نفر آدم ایسأ بود کی اونی ایسم و اونی پئرٚ ایسم اوشأنی پیشأنی سٚر بینیویشته بوبوسته بو.

² بأزون، ایتأ صدا آسمأنٚ جَا بشتأوستم کی آبشأرٚ فووُستن و گؤرخأنه نٚأره مأنستَن بو، ولی هطو اوشأنی کی چنگ زنٚده آوأزٚ مأنستأنم بو.

³ اَ گورو، خودا تختٚ ورجأ و او چأرتأ زٚنده جأنور و بیست و چأرتأ پیرٚ آدمٚ روبرو ایتأ تأزه سورود خأندیدی. اَ سورودَ هیکس نتأنستی بٚخأنه، جغرز او صد و چهل و چأر هیزأرتأ آدم کی تومأمٚ دونیأ جَا ایوأردِه بیهه و آزأدَ بوسته بود.

⁴ اوشأن هو آدمأنی ایسٚد کی خوشأنَ، زنأکأنٚ اَمرأ آلودَه نوکودد، چونکی باکره ایسٚد. اوشأن هرتأ جیگأ کی بٚرّه شِه، اونَ دونبألَ کونٚد. اَ آدمأن جٚه مردوم میأن بیهه بوبوستٚد کی هچین ایتأ موقدس پیشکشی مأنستَن خودا و بٚرّه‌یَ پیشکش بٚبٚد.

⁵ اَشأن پأک ایسٚد و ایرأدی نأرٚده و حتّا ایتأ دورُغ هرمأله اَشأنی دٚهٚنٚ جَا بیرون نأمؤ.

سه‌تأ فٚرٚشته

⁶ او وخت ایتأ دِه فٚرٚشته‌یَ بیدِم کی آسمأنٚ وٚسٚط پروأز کودی و اَبدی اینجیلٚ خوشألی پیغأمَ زیمینٚ آدمأنٚ رِه بٚره کی هرتأ قوم و قبیله گوش، جٚه هرتأ زوأن و نتأجَ فأرٚسأنه.

⁷ فٚرٚشته بولندٚ صدا اَمرأ گفتی: «خودا جَا بٚترسید و اونَ جلال بدید، چونکی اَسه او وخت فأرٚسِه کی مردومَ قیضأوت بوکونه. اونَ پرستٚش بوکونید کی آسمأن و زیمین و دریأ و چشمه‌یأنَ خلق بوکوده.»

⁸ بأزون ایتأ دِه فٚرٚشته‌یَ بیدِم کی اونی دونبألسر بأمؤ و بوگفته: «بابِل سقوط بوکود، او پیله‌دأنه شهر ویرأنَ بوسته، چونکی تومأمٚ دونیأ قومأنَ فأسیدَ کودی و اوشأنَ وأدأشتی کی اونی فیسأدٚ شرأب و لأبألیگری جَا مستَ بٚد.»

⁹ بأزون سیومی فٚرٚشته بأمؤ و دأد بٚزِه: «اوشأنی کی او وحش و اونی موجسمه‌یَ پرستٚش بوکوند و اونی نیشأنه‌یَ خوشأنٚ پیشأنی یا دٚسٚ رو بٚنٚد،

¹⁰ خودا غیظ و موکأفأت پیأله‌یَ کی اونی دورون هیذره تخفیف و ایستثنأ ننأ، وأخورٚده و موقدسٚ فٚرٚشته‌یأن و "بٚرّه" حوضور، آتش شوأله‌یأن میأن عذأب کشٚده.

¹¹ او آتشٚ دود کی اَشأنَ عذأب دِهه همیشٚکٚ رِه بوجؤر شِه، او جوری کی شبندروج آسأیش نأرٚده، چونکی او وحش و اونی موجسمه‌یَ پرستٚش بوکودٚد و اونی نیشأنه ایسمَ خوشأنٚ جأنٚ رو بٚزِد.

¹² لأزیمه کی خودا موقدسٚ قوم اَ وضعیتٚ میأن قأیم بئیسٚد، خودا دستورأنَ ایطأعت بوکوند و خوشأنٚ ایمأنَ عیسا رو بٚدأرٚد.»

¹³ او وخت، ایتأ صدا آسمأنٚ جَا بشتأوستم کی مٚرَه گفتی: «اَنَ بینیویس: خوشبحأل اوشأنی کی جٚه اَنٚ پٚسی در خوداوند میرٚده.» و روح بوگفته: «هسأ دِه جٚه تومأمٚ دردأن خلأصَ بٚده، و خوروم کأرأن وأسی کی بوکودٚد پأدأش فأگیرد.»

زیمینٚ مأصولَ وأچِئن

¹⁴ بأزون هطو کی فأندرستیم، ایتأ سیفیدٚ اَبرَ بیدِم کی اینفر اونی رو نیشته بو کی اینسأنٚ پٚسرَ شٚبأهتَ دٚئی. اونی سٚرٚ رو، ایتأ طلأیی تأج و اونی دٚسٚ میأن ایتأ تیجٚ دأز چومَ دکفتی.

¹⁵ ایتأ دِه فٚرٚشته معبد جَا بأمؤ و ایتأ بولندٚ صدا اَمرأ، اونَ کی اَبرٚ رو نیشته بویَ بوگفته: «دأزَ بٚکأر تأوٚد و وأوین، چونکی وأوِئنٚ زمأت ایسه و زیمینٚ مأصول برسِه.»

¹⁶ پس اونی کی اَبرٚ رو نیشته بو، خو دأزَ بٚکأر تأوٚدأ و زیمینٚ مأصول وأوِه بوبوسته.

¹⁷ بأزون، ایتأ دِه فٚرٚشته او معبدٚ جَا کی آسمأنٚ دورونی نٚهأ بأمؤ بیرون. اونم ایتأ تیجٚ دأز خو دٚسٚ میأن دأشتی.

¹⁸ بأزون ایتأ دِه فٚرٚشته مذبحٚ جَا بیرون بأمؤ کی آتشٚ ایختیأر و قودرت اونی دٚسٚ دورونی نٚهأ بو. اون او فٚرٚشته‌یَ کی دأز اونی دٚسٚ دورون نٚهأ بویَ بوگفته: «هسأ تی دأزَ بٚکأرَ گیر کی خوشه‌یأنَ جٚه زیمینٚ رٚزٚ سٚر وأچینی، چونکی اونی انگورأن بٚرٚسِئده و قیضأوت کودنٚ وأسی حأضیرَ بوسته.»

¹⁹ پس او فٚرٚشته، زیمینَ خو دأزٚ اَمرأ وأوین وأوین بوکوده و انگورأنَ خودا غیظٚ پیله ظرفٚ میأن دوکود.

²⁰ انگورأنَ او ظرف دورونی کی جٚه شهر بیرون نٚهأ بو، اَندر پأ اَمرأ لقد دٚمٚج بوکودٚده کی ایتأ روخأن خونٚ جَا رأ دکفته کی اونی درأزأ ۱۶۰۰ تیر پرتأب کودن بو و اونی بولندی ایتأ اسبٚ دهنه اَندر بو.