موکأشفه 11 - Gilaki New Testamentخودا دوتأ شأهید 1 مٚرَه ایتأ اندأزه گیفتنٚ چویَ فأدأده و بوگفتٚده: «بوشو و خودا معبد و هطویم او مذبحَ کی اونی دورونی نٚهأ اندأزه بیگیر، و بأزون اوشأنَ کی اویَه پرستٚش کونٚده، بیشمأر. 2 ولی صأرأ بیرونَ اندأزه نوأگیفتن چونکی البأقی قومأنَ فأدأ بوبوسته؛ اَشأن چهل و دو مأه "موقدسٚ شهرَ" لقد دٚمٚج کونٚده. 3 ولی من، می دوتأ شأهیدَ اوسه کونم و اوشأنَ قودرت فأدٚم کی کُئنه لیوأس دوکونٚد، هیزأر و دویست و شصت روجٚ رِه می پیغأمَ فأرٚسأنٚد مردومٚ گوش.» 4 اَ دوتأ شأهید هو دوتأ زیتون دأر و دوتأ شمدأنٚده کی او خودا حوضورٚ میأن کی تومأمٚ زیمین خودایه بٚپأ ایسٚده. 5 هرکی بٚخأیٚه اَشأنَ اَذِت آزأر بوکونه، ایتأ آتشٚ اَمرأ کی اوشأنی دٚهٚنٚ جَا بیرون اَیِه، جٚه بین شِه. هرکی اوشأنَ اَذِت بوکونه، اَطویی وأستی بیمیره. 6 اَشأن، اَ سه سأل و نیمٚ میأن کی خودا پیغأمَ مردومٚ رِه وأگویا کونٚده، قودرت دأرٚده هر وخت کی بٚخأستده، وأرٚش وأرٚستٚنٚ مأنع بٚبٚد، آبٚ چشمه‌یأنَ، خون چأکوند و دونیأیَ جوروأجورٚ بلأیأنٚ جَا گریفتأرَ کونٚد. 7 وختی او دو نفر خوشأنی سه سأل و نیمٚ شهأدتٚ دؤره‌یَ تومأنَ کونٚد، او وحش او چأهٚ جَا بیرون اَیِه کی ته نأرِه، اَشأنَ جنگستنٚ رِه وأخٚوٚرَ کونِه و اَشأنَ شکست دِهه، کوشِه. 8-9 اوشأنی جنأزه‌یأنٚم سه روج و نیم او پیله شهرٚ خیأبأنأنٚ میأن کی کنأیه اَمرأ سدوم و مصر دؤخأده بِه، نشوٚ نما بٚدأ بِه. اَن هو جیگأیی ایسه کی اَشأنی خوداوندٚم صلیبٚ رو بوکوشته بوبوسته. اَ زمأتٚ میأنی، هیکسَ ولأنده کی اَشأنی جنأزه‌یَ بیگیلَ کونٚه، و مردوم جٚه جوروأجورٚ قومأن اوشأنَ تمأشأ کونٚده. 10 تومأمٚ دونیأ میأن اَ سٚر تأ او سٚر، همٚتأن خودا اَ دوتأ گب بٚزٚن کسٚ مٚردنٚ وأسی کی اَندر مردومَ زلّه کوده بود، جشن و دٚس کلأ کونٚده و کس‌کسٚ رِه پیشکشی اوسه کونٚد. 11 ولی سه روج و نیمٚ پٚسی، او روحی کی زٚندیگی بٚخشه جٚه خودا ور اوشأنی جأنٚ دورونی شِه و اَشأن خوشأنی پأیأنٚ رو بٚپأ ایسٚده. اَ مأجیرأ دِئنٚ اَمرأ همٚتأن زهله کونٚده، 12 و ایتأ صدا آسمأنٚ جَا ایشتأوده کی او دو نفرَ گه: «اَیَه بوجؤر بأیید!» او وخت اَشأن، دوشمنأنٚ قأقٚ بوسته چومأنٚ جولو، اَبرأنٚ اَمرأ آسمأنٚ ور بوجؤر شٚده. 13 هو وختٚ میأنی، ایتأ پیله زیمین لرزه ایتفأق دکفه کی ایتأ قیسمت جٚه ده‌تأ قیسمتٚ شهرٚ شینَ خأکٚ اَمرأ ایتأ کونِه و هفت هیزأر نفر بوکوشته بٚده. او وخت اوشأنی کی زٚنده بمأنستده، ترس جَا، آسمأنٚ خودایَ پرستٚش کونٚده. 14 دوتأ بلأ دٚوأرٚسته. پور زمأت نیبه کی سیومی بلأ جٚه رأ فأرٚسِه. هفتومی شیپور 15 هوطو هه وخت میأن کی هفتومی فٚرٚشته خو شیپورٚ صدایَ بیرون بأوٚرده، آسمأنٚ جَا بولندٚ صدایأن گوشَ فأرٚسِه کی گفتی: «دونیأ پأدیشأیی اَمی خوداوند و اونی مسیح شین بوبوسته و اون همیشٚکٚ رِه پأدیشأ ایسٚه.» 16 او وخت بیست و چأرتأ پیرٚ آدم کی در خودا حوضور خوشأنی تختأنٚ رو نیشته بود، خوشأنی دیمَ زیمینٚ رو بٚنأده، اونَ سوجده بوکودٚده، 17 و بوگفتٚده: «اَی خوداوند، خودایی کی قأدیرٚ موطلقی کی ایسأیی و ایسأبی، تٚرَه سپاس گیمی کی تی پیله قودرتَ تی دٚس بیگیفتی و پأدیشأیی‌یَ جٚه سٚر بیگیفتی. 18 قومأن تی غیظَ دأشتیدی، ولی اَسه تویی کی وأستی اوشأنٚ رِه غیظ بٚدأری. اَسه او زمأته کی مورده‌یأنَ قیضأوت بوکونی و تی خیدمتگوزأرأنَ ینی پیغمبرأن، اوشأنی کی ایمأن دأرٚده و اوشأنی کی تی نأمَ ایحترأم کونٚده، جٚه کوجه‌دأنه و پیله‌دأنه‌یَ جأیزه فأدی. اَسه او زمأته کی همٚتأ اوشأنَ کی دونیأیَ جٚه بین ببردٚده جٚه بین ببری.» 19 او وخت معبد، آسمأنٚ میأن وأزَ بوسته و او صوندوقی کی خودا عهد‌نأمه اونی میأن نٚهأ بو آشیکأرَ بوسته. بأزون گؤرخأنه رأ دکفته و آسمأن نأرِه بٚزِه و تگرگ و زیمین لرزه ایتفأق دکفته. |
© 2024 Transform Iran
Transform Iran