موکأشفه 10 - Gilaki New Testament

کوجه‌دأنه طومأر فٚرٚشته دٚسٚ میأن

¹ بأزون ایتأ دِه پور قودرتٚ فٚرٚشته‌یَ بیدِم کی آسمأنٚ جَا اَمؤیی بیجیر. اونی دؤرٚورَ اَبر بیگیفته دأشتی و اونی سٚرٚ جؤر ایتأ رنگین کمأن نٚهأ بو. اونی دیمٚم خورشیدٚ مأنستَن شبق زِئی و اونی پأیأن آتشٚ سوتونأنٚ مأنستَن بو.

² اونٚ دٚسٚ میأنی ایتأ وأزَ بوسته کوجه‌دأنه طومأر نٚهأ بو. اون خو رأستٚ پأیَ دریأ رو و چپٚ پأیَ زیمینٚ رو بٚنأ،

³ و ایتأ بولند صدا هچین شیرٚ نأرِه مأنستَن بیرون بأوٚرده. اونی جوأبٚ رِه هفتأ گؤرخأنه گب بٚزِده.

⁴ حأضیرَ بوستأندوبوم کی گؤرخأنه‌یأنٚ گبَ بینیویسٚم کی نأخٚوٚرکی ایتأ صدا آسمأنٚ جَا مٚرَه بوگفته: «دٚس بٚدأر! گؤرخأنه‌یأنٚ گب، نوأستی آشیکأرَ بٚه. اوشأنَ نوأنیویشتن!»

⁵ او وخت او فٚرٚشته کی خوشکی و دریأ رو بٚپأ ایسأ بو، خو رأستٚ دٚسَ رأستَ کوده آسمأنٚ ور،

⁶ و اونَ کی همیشٚک زٚنده ایسه و آسمأنَ تومأمٚ اونی جأنورأن اَمرأ، و زیمینَ تومأمٚ اونی جأنورأنٚ اَمرأ، و دریأیَ تومأمٚ اونی جأنورأنٚ اَمرأ خلق بوکوده، قسم بوخورده کی دِه هیتأ معطلی پیش نأیِه،

⁷ بلکی او وخت هفتومی فٚرٚشته شیپورَ بٚزٚنه، خودا نقشه کی رأزَ مأنِه انجأم بِه، هوطویی کی خودا خو پیغمبرأنَ وعده بٚدأ بو.

⁸ ایوأردِه ایتأ صدا آسمأنٚ جَا مٚرَه بوگفته: «بوشو و وأزَ کوده طومأرَ او فٚرٚشته جَا کی دریأ و خوشکی رو بٚپأ ایسأ، فأگیر.»

⁹ پس اونَ نیزدیکَ بوستم و اونی جَا بخأستٚم طومأرَ مٚرَه فأدَه. بوگفته: «فأگیر و بوخور. وختی اونَ تی دٚهٚنٚ میأن بٚنأیی، عسلٚ مأنستَن شیرینه، ولی وختی بوخوردی تی مأدٚه زرخَ بِه.»

¹⁰ پس طومأرَ فأگیفتٚم و بوخوردم. دوروست هوطو کی بوگفته بو، می دٚهٚنٚ دورونی شیرین بو، ولی وختی بوخوردم می مأدٚه زرخَ بوسته.

¹¹ او وخت مٚرَه بوگفته: «تو وأستی ایوأردِه دروأره‌یٚ قومأن، نتأجأن، زوأنأن و خٚیلی پأدیشأیأن، نوبوّت بوکونی.»