فیلیمون 1 - Gilaki New Testament

¹ اَ نأمه جٚه پولس ور ایسه کی مسیحٚ عیسا اینجیلٚ خوروم خٚوٚرٚ وأگویا کودنَ وأسی زندأنٚ دورون ایسأ و جٚه اَمی برأرم تیموتائوس ور. اَ نأمه‌یَ فیلیمونَ رِه، اَمی جأنٚ دیلٚ ریفِق و همکأرٚ رِه نیویسٚم،

² هطویم اَمی خأخور اَپفیه و اَمی همسنگران، اَرخیپوس و او کیلیسا رِه کی تی خأنه دورون چأکوده بِه.

³ جٚه اَمی پئر، خودا و اَمی خوداوند، عیسا مسیح، فیض و آرأمٚشٚ شِمِره خأیم.

دوعأ کودن و شوکرگوزأری

⁴ جأن و دیلٚ فیلیمون، هر وأر کی تِرِه دوعأ کونم، اوّل خودایَ تی وجود رِه شوکر کونم،

⁵ چونکی البأقیأنٚ جَا ایشتأوٚم کی عیسایٚ خوداوندٚ رِه چی قورصٚ ایمأنی دأری و تومأمٚ موقدسأنٚ حق، ینی ایماندأرأنٚ حقٚ دورون چی محبتی انجأم دیهی.

⁶ دوعأ کونم ایمأن و ایعتمأدی کی خوداوندَ دأری، البأقیأنٚ رِه وأگو بوکونی کی اوشأنٚ رویٚم اَثر بٚنه و بیدینٚد کی عیسا مسیح جَا چی خورومٚ موأهب و خُبیأنی تٚرَه فأدأ بوبوسته.

⁷ منم تی محبتٚ جَا اَی برأر، خوشی و دیل‌آرامی بیأفتم، چون تی مهرٚوأنی، ایمأندأرأنَ دیلأنٚ تأزه کوده.

پولسٚ خأهیش اُنیسیموسٚ وأسی

⁸ جٚه اَ خأطر، اگه چی در مسیح حق دأرم جیسأرت بوکونم و تٚرَه دستور بدم اونچی‌یَ کی دوروسته انجأم بدی،

⁹ ولی محبت وأسی، خوش دأرم اونَ خأهیش کودنٚ مأنستَن بٚگم. دوروسته، من، پولسی کی پیرٚ بوستم، کی اَسه مسیح عیسا خیدمت کودنٚ وأسی زندأنی‌یٚم بوبوستم،

¹⁰ تی جَا تمنا کونم می زأی اُنیسیموسٚ اَمرأ کی او زمأت کی زندأنٚ دورون ایسأبوم، اونٚ رِه پئر ایمأنی بوبوستم، مهرٚوأن بیبی.

¹¹ انیسیموس (اَنٚ اَمرأ کی اونی نأم "موفید" مأنی دِهه) قبلنأن تِرِه موفید نوبو، ولی اَسه چی تِرِه و چی مِرِه موفیده.

¹² اَسه کی اونَ وأگردأنٚم تی ورجأ، تومأم اَنَ مأنه کی می دیلَ اوسه کونم.

¹³ خأستیم اونَ می ورجأ بٚدأرم، تأ اَ زمأتٚ دورون کی اینجیلٚ پیغأمٚ وأگویا کودنٚ وأسی زندأنٚ دورون ایسأم، تی عوض مٚرَه یاور بٚده.

¹⁴ ولی نخأستیم بی‌اَنکی تو رأضی بیبی اَ کأرَ انجأم بدم کی تی خورومٚ کأر مجبوری سٚر نٚبه، بلکی تی میل و ایختیأرٚ جَا بٚبه.

¹⁵ شأید اون اَنٚ وأسی ایتأ کوجه زمأت تی جَا سیوأ بوبوسته کی همیشٚکٚ رِه وأگرده تی ور،

¹⁶ ولی دِه غولأم و بٚرٚده مأنستَن نه، بلکی غولأمٚ جَا بوجؤرتر، ایتأ جأنٚ برأر مأنستَن. اون مِرِه خٚیلی عزیزایسه، ولی تِرِه ویشتر عزیزایسه، چونکی هم ایتأ همنو ایسه و هم ایتأ برأر در خوداوند.

¹⁷ اگه رأس‌رأسِی مٚرَه تی ریفِق دأنی، هوطویی کی می پیشوأز بأمؤیی، اونَ پیشوأزم بیشی و اونَ قوبیل بوکونی.

¹⁸ اگه‌یٚم جٚه پیشتر تٚرَه ضرر بٚزِه یا تٚرَه بدهکأرایسه، اونَ می حیسأب بٚنه.

¹⁹ من، پولس، اَنَ می دٚسٚ اَمرأ نیویسٚم کی اونَ تٚرَه وأگردأنٚم. اگه چی دووأره یأد اَوٚردٚن لأزیم نییٚه کی تونم تی جأنَ مٚرَه مدیونی.

²⁰ اَطویی، می جأنٚ برأر، اَ محبتَ می حق دورون بوکون کی می دیل کی خسته‌‌ ایسه خوشألَ به و مسیحَ شوکر بوکونم.

²¹ اَ نأمه‌یَ تٚرَه نیویسٚم، چون یقین دأنٚم کی هر چی تی جَا بخأیٚم حتّا ویشتر جٚه اونَ مِرِه انجأم دیهی.

²² اَنٚم بٚگم، ایتأ اوتاقٚم مِرِه آمأدَه کون، چون اومید دأرم کی خودا شیمی دوعأیَ قوبیل بوکونه، ایجأزه بٚده کی زود بأیٚم شیمی ورجأ.

²³ می هم‌زندأنی اِپافراس، کی اونم عیسا مسیحٚ اینجیلٚ پیغأمٚ وأگویا کودنٚ وأسی زندأنٚ دورون ایسأ، سلأم رٚسأنه.

²⁴ می همکأرأن، مرقس، اَرِستَرخوس، دیماس و لوقایٚم سلأم رٚسأنده.

²⁵ اَمی خوداوند عیسا مسیحٚ فیض شیمی روحٚ اَمرأ بٚبه.