مَرقُس 8 - Gilaki New Testamentچأر هیزأر نفرٚ خورأکی دئن 1 ایتأ جٚه هو روجأن، ایوأردِه ایتأ عألمه مردوم بأمؤده اونی ورجأ جمَ بوستٚد و ایوأردِه اوشأنی خوردنی تومأنَ بوسته. عیسا خو شأگردأنَ دؤخأده و اوشأنَ بٚفرمأسته: 2 «می دیل اَ مردومٚ رِه سوجه، هسأ سه روج ایسه کی می اَمرأ ایسأده و دِه هیچی اَشأنٚ رِه نمأنسته کی بوخورٚد. 3 اگه اَشأنَ ویشتأ اوسه کونم بٚخأنه، حتم دأنٚم کی رأ میأن ضعف کونٚده، چونکی بعضیتأن جٚه دورٚ رأ بأمؤده.» 4 اونی شأگردأن تعجوبٚ اَمرأ بوگفتد: «اَ صأرأ دورونی جٚه کویه تأنیم اَشأنی شکمٚ سِئرَ کودنٚ وأسی نأن بیأفیم؟» 5 عیسا وأوٚرسِه: «چندر نأن دأریدی؟» جوأب بٚدأده: «هفتأ نأن» 6 پس مردومَ بٚفرمأسته کی زیمینٚ سٚر بینیشینٚد. بأزین هفتأ نأنَ فأگیفت و خودایَ شوکر بوکود و تیکه تیکه کوده، فأدأد خو شأگردأنَ. اوشأنم نأنأنَ فأدأده مردومَ. 7 چنتأ کوجه‌دأنه مأئی‌یٚم بیأفتٚد. مأئیأنم برکت بٚدأ و خو شأگردأنَ بٚفرمأسته کی مردومٚ میأن سأم بوکونٚد. 8 مردوم همٚتأن بوخوردٚد و سِئرَ بوستٚد. بأزین شأگردأن هفتأ زیبیل البأقی‌یٚ خوردیأنٚ جَا جمَ کودٚد. 9 اوشأنی کی اویَه ایسأبود چأرهیزأر نفر فأرٚسِده. بأزین عیسا اوشأنَ اوسه کوده 10 و دفأتن خو شأگردأن اَمرأ لوتکأ بینیشته و بوشؤ دلمانوته شرأ. فریسیأنٚ موجیزه خأستٚن 11 وختی فریسیأن عیسا اَمؤنٚ جَا وأخٚوٚرَ بوستٚد، جمَ بوستٚد کی اونی اَمرأ بوگو موگو رأ تأوٚدٚد. اوشأن اونی ایمتحأن کودن وأسی، ایتأ آسمأنی نیشأنه اونی جَا بٚخأستده کی خو ایقتدأرَ ثأبیت بوکونه. 12 عیسا ایتأ آه خو دیلٚ جَا بٚکٚشه و بوگفته: «چٚره اَ نسل همش ایتأ نیشأنه دونبأل گردِه؟ رأس‌رأسِی شٚمٚره گم، اوشأنَ هیچ نیشأنه فأندم!» 13 پس اوشأنَ بٚنأ و لوتکأ بینیشت و بوشؤ دریأچه او طرف. هیرودیس و فریسیأنٚ تورشٚ خمیر 14 ولی شأگردأن جٚه قبلٚ شؤئؤن، جٚه خأطرَ دأ بود کی بٚقأعیده نأن اوسأنٚد و لوتکأ دورونی فقد ایتأ نأن دأشتیدی. 15 هوطو کی دریأچه میأن پیش شؤئؤندوبود، عیسا اوشأنَ وأخٚوٚرَ کوده و بوگفته: «بٚپّأئید و شٚمٚره جٚه فریسیأن و هیرودیسٚ تورشٚ خمیر دؤر بٚدأرید.» 16 پس شأگردأن نأن نأوٚردٚنٚ وأسی بینأ بوکودٚد کس‌کسٚ اَمرأ بوگو موگو کودن. 17 عیسا بٚفأمٚسته کی اوشأن کس‌کسٚ اَمرأ چی وأسی بوگو موگو کودأندٚرٚده. پس بوگفته: «چٚره جٚه اَ خأطر کی نأن نأریدی بوگو موگو کودأندریدی؟ آیا هنویٚم نیدینیدی و نٚفأمیدی؟ آیا شیمی دیل اَندر سخته کی نتأنیدی بفأمید؟ 18 شومأن کی چوم دأریدی، چٚره پس نیدینیدی؟ چٚره شیمی گوشأنَ وأزَ نوکونیدی کی بشتأوید؟ 19 خأطرَ دٚئید کی چوطو پِنج هیزأر نفرَ پنج‌تأ نأن اَمرأ سِئرَ کودم؟ او بٚمأنسته‌یأنٚ جَا چنتأ زیبیل پورَ کودیدی؟» جوأب بٚدأده: «دوأزده‌تأ زیبیل» 20 بوگفته: «وختی هفتأ نأنٚ اَمرأ، چأر هیزأر نفرَ سِئرَ کودم، چندر زیبیل خورده‌یأنٚ جَا جمَ کودیدی؟» بوگفتٚده: «هفتأ زیبیل!» 21 بوگفته: «هنویٚم نٚفأمیدی؟» عیسا ایتأ کورٚ مردأکَ شفأ دِهه 22 وختی کی فأرٚسِده بیت صیدا، ایتأ کورٚ مردأکَ بأوٚردٚد اونی ورجأ و اونی جَا خأهیش بوکودٚد کی اونی رو دٚس بٚنه و شفأ بٚدأ. 23 عیسا او مردأکٚ دٚسَ بیگیفته و جٚه او دیهأت ببرده بیرون، اونی چومأنَ فیلّی وأسِه و خو دٚسأنَ اونی چومأن رو بٚنأ و اونی جَا وأوٚرسِه: «هیچی دینی؟» 24 مردأی خو دؤرٚورَ فأندرسته و بوگفته: «دینٚم ولی نه خٚیلی خُب. مردومَ دأرأنٚ تنه مأنستَن دینم کی رأ شؤئؤن دٚرٚده.» 25 عیسا ایوأردِه خو دٚسأنَ او مردأکٚ چومأنَ رو بٚنأ. بأزین اونی چومأن وأزَ بوسته و بتأنسته بیدینه و همه چی‌یَ خُب دٚئی. 26 عیسا اونَ اوسه کوده بٚخأنه و خأنوأر ورجأ و بٚفرمأسته کی دیهأتٚ دورونی نشه. پطرسٚ عیسا رِه چی فیکر کونه 27 عیسا خو شأگردأنٚ اَمرأ، جلیلٚ اوستأنَ بٚنأ و بوشؤ قیصریه فیلیپی دیهأتٚ میأن. رأ دورون اَشأنی جَا وأوٚرسِه: «مردومٚ نظر دروأره‌یٚ من چیه؟ اوشأن فیکر کونٚده من کیسٚم؟» 28 شأگردأن جوأب بٚدأده: «بعضیأن گده هو یوحنا کی تعمید دِهه ایسی، بعضیأنٚم گده ایلیا یا ایتأ جٚه پیغمبرأن ایسی کی ایوأردِه ظوهور بوکوده.» 29 وأوٚرسِه: «شومأن چی گیدی؟ شومأن فیکر کونید من کیسٚم؟» پطرس جوأب بٚدأ: «تو مسیح ایسی.» 30 ولی عیسا اَشأنَ دستور بٚدأ، تأکید بوکوده دروأره‌یٚ اون هیکسَ هیچی نٚگد. عیسا پیشتر دروأره‌یٚ خو مرگ گه 31 بأزین عیسا اوشأنَ بوگفته لأزیمه کی اینسأنٚ پٚسر خٚیلی اَذِت و آزأر بیدینه و شیخأن و پیله کأهینأن و دینٚ عألیمأنٚ جَا محکوم بٚبه، بوکوشته بٚبه، ولی سه روجٚ پٚسی زٚنده به. 32 عیسا وختی اَ مأجیرأیَ آشیکأرأ بوگفته، پطرس اونَ فأکشه ایتأ کنأره و اونَ بوگفته کی نوأستی اَجور گبأن خو زوأنٚ سٚر بأوٚره. 33 عیسا وأگردسته و شأگردأنَ فأندرسته؛ بأزین ایتأ توندٚ گبٚ اَمرأ پطرسَ بٚفرمأسته: «می جَا دورَ بو اَی شیطان! تو اینسأنی چومأن اَمرأ اَ مأجیرأیَ فأندری، نه خودا چومٚ اَمرأ.» 34 بأزون شأگردأن و مردومَ دؤخأده و بٚفرمأسته: «اگه اینفر جٚه شومأن بٚخأیٚه می جَا ایطأعت بوکونه وأستی خودخأیی جَا دٚس بٚکٚشه و خو صلیبَ بچأنَ گیره و می جَا ایطأعت بوکونه. 35 هرکی بٚخأیٚه خو جأنَ نیجأت بٚدأ، اونَ جٚه دٚس دِهه ولی هرکی خو جأنَ می وأسی و اینجیلٚ وأسی جٚه دٚس بٚدأ، اونَ نیجأت دِهه. 36 «چی فأیده دأره کی اینسأن تومأمٚ دونیأیَ ببره، امّا خو جأنَ جٚه دٚس بٚدأ. 37 مگه جأنٚ جَا اَرزشدأرتر ایچی شأ یأفتن؟ 38 و اگه کسی اَ فأسیدٚ زمأتٚ میأن کی پور جٚه گونأ ایسه، می جَا و می گبأنٚ جَا عأرنأموس بٚدأره، اینسأنٚ پٚسرم وختی کی خو پئر جلالٚ میأن، موقدسٚ فٚرٚشته‌یأنٚ اَمرأ وأگرده، اونی جَا عأرنأموس دأره.» |
© 2024 Transform Iran
Transform Iran