مَرقُس 4 - Gilaki New Testamentکیشأورزٚ نقل 1 ایوأردِه عیسا دریأچه ورجأ مردومٚ آمؤختٚنَ سٚر بیگیفت ایتأ عیده‌یٚم اونی دؤر جمَ بوستٚد، جوری کی مجبور بوبوسته ایتأ لوتکأ بینیشینه و ایپچه سأحیلٚ جَا دورَ بٚه و جٚه هویه مردومٚ رِه گب بٚزٚنه. 2 اون خٚیلی چیزأنَ نقلٚ مأنستَن مردومَ آمؤختی، اَ نقلٚ مأنستَن: 3 «گوش بدید! ایروج ایتأ کیشأورز بوشؤ خو زیمینٚ سٚر کی دأنه بٚپأشأنِه. 4 وختی کی دأنه پأشأنِندوبو، ایپچه جٚه او دأنه‌یأن بٚکفتٚده رأ سٚر و پرنده‌یأن بأمؤده اوشأنَ خوشکٚ زیمین جَا اوسأدٚد و بوخوردٚد. 5 بعضیتأن فووُستٚده ایجور خأک سٚر کی اونی جیر سنگلأخ زیمین بو. خٚیلی زود او زیمینٚ رو کی جولفٚ نوبو زٚپّه بٚزِد. 6 ولی وختی کی خورشید بوجؤر بأمؤ، همٚتأن بوسوختٚد و جٚه بین بوشؤده. چونکی جولفٚ ریشه نأشتیدی. 7 ایپچه جٚه او دأنه‌یأن تمشأنٚ میأن دکفتٚده و تمشأن پیلّه بوستٚد، او نأزکٚ گیأیأنٚ خٚفَه کودٚد و ولأشتٚد کی مأصول بٚدٚد. 8 ولی ایپچه جٚه او دأنه‌یأن خوروم زیمین سٚر بکفتٚد و زٚپّه بٚزِد و مأصول بأوٚردٚد، سی یا شصت یا صد برأبرٚ اوچی کی بکأشته بوبوسته مأصول بأوٚردٚد. 9 بأزین بوگفته: «هر کی گوش ایشتأوه، گوش بوکونه!» 10 بأزون، وختی او دوأزده نفر و البأقی‌یٚ اونی شأگردأن اونی اَمرأ تنأ بوبوستٚد، اونی جَا وأورسئده: «اَ نقلٚ مأجیرأ چیسه؟» 11 عیسا جوأب بٚدأ: «خودا ملکوتٚ رأزأنٚ فأمٚستٚن شٚمٚره فأدأ بوبوسته، ولی اوشأنی رِه کی می جَا ایطأعت نوکونٚده همه چی‌یَ وأستی نقلأنٚ اَمرأ گفتن، 12 کی اَ موقدسٚ کیتأبأنٚ بینیویشته ایتفأق دکفه کی "وختی اونچی‌یَ کی انجأم دٚهٚم فأندٚرٚد، اونَ نفأمٚده. وختی اونچی‌یَ کی گم ایشتأوده، اونَ درک نوکونٚده. اگه نه، می ورجأ وأگردٚده و بٚبخشه بد."» 13 بأزین اَشأنٚ رِه بوگفته: «اگه اَ نقلٚ منظورَ نفأمستیدی، البأقی نقلأنَ کی بٚگم، چوطو خأیید بفأمید؟ 14 منظور جٚه کیشأورز اونی ایسه کی خودا پیغأمٚ دأنه مأنستَن مردومٚ دیلٚ میأن کأره. 15 او خوشکٚ جأده کی بعضی دأنه‌یأن اونی میأن بٚکفته، اوشأنی‌یَ مأنٚده کی خودا پیغأمَ ایشتأوده، چونکی اَشأنٚ دیل سخت ایسه، شیطان اَیِه و اونچی‌یَ کی بکأشته بوبوسته دوزدأنه و بٚرِه. 16 او خأکی کی اونی جیر سنگ بو، آدمأنی‌یَ نیشأن دِهه کی خودا پیغأمَ ایشتأوده و دفأتن ذوقٚ اَمرأ قوبیل کونٚده. 17 ولی جٚه اَ خأطر کی ریشه نأرٚده، خٚیلی دوأم نأوٚرٚده. هرچن اَشأن اوّل خُب پیش شٚده ولی هطو کی کلامٚ وأسی اَذِت و آزأر بیدینٚد، فوری خوشأنٚ ایمأنَ جٚه دٚس دٚهٚده. 18 او زیمینی کی تٚمٚش دوبو، او آدٚمی‌یَ نیشأن دِهه کی کلامَ ایشتأوه، 19 ولی زٚندیگی دیلوأپسییأن، مأل و مینألٚ زرقٚ و برق و البأقی چیزأنی کی اونَ به تئب تأوٚدِه، خودا کلامَ اونی دورونی خٚفَه کونه و هیذره اونی جَا مأصول نأوٚره 20 و امّا خوروم زیمین اوشأنی‌یَ نیشأن دِهه کی خودا کلامَ قوبیل کونٚده کی سی یا شصت یا صد برأبر جٚه اوچی کی بکأشتٚده مأصول دٚهٚده.» چرأغٚ نقل 21 بأزین اَشأنی جَا وأوٚرسِه: «ایتأ چرأغَ کی روشنَ کونٚده، آیا اونَ پیأله یا تختٚ جیر نٚهٚده؟ نه، بلکی اونَ ایتأ چأر پأیه رو نٚهٚده کی اونی نور همٚتأ جأجیگأیأنَ دٚتأوه. 22 هطویم اونچی کی لأ بٚدأکٚ ایتأ روج نمأیأنَ به و اونچی کی قأیمَ بوستِیه آشیکأرَ به. 23 «هر کی گوش ایشتأوه، گوش بوکونه.» 24 بأزین ایدأمه بٚدأ: «اونچی کی ایشتأویدی، خُب دیقت بوکونید! چونکی هرچی ویشتر دیقتٚ اَمرأ بشتأوید، شٚمٚره ویشتر درک فأدأ بِه یا اَنکی و ویشتٚرٚم فأگیریدی. 25 اونی کی اوچی‌یَ کی دأره بتأنه خُب بٚکأرَ گیره بأزم اونَ ویشتر فأدأ بِه، ولی اونی کی خو کأرَ خُب انجأم نٚده، اوچی‌یٚم کی پیسخأله بٚبه جٚه دٚس دِهه.» ایتأ دأنه نقل کی روشد کونه 26 «هسأ ایتأ دِه دأستأن نقل کونم کی بدأنید خودا ملکوت چوطو ایسه؛ ایتأ کیشأورز خو زیمینٚ سٚر دأنه بٚپأشأنِه و بوشؤ. 27 روجأن بوشؤده و بی اَنکی کیشأورز بفأمه چی ایتفأقی دکفته، او دأنه آرأم‌آرأمِی زٚپّه بٚزِه و پیلّه بوسته. 28 چونکی زیمین بی اَنکی کسی یاور بٚدأ خودش دأنه‌یَ بوجؤر اَوٚره. ینی اوّل اونی سأقه بوجؤر اَیِه، بأزون خوشه چأکوده به و آخرپٚسی دأنه، خوشه میأن ظأهیرَ به 29 و وختی مأصول برسه، کیشأورز خو دأره‌یَ اوسأنه کی مأصولَ وأوینه.» خردٚلٚ دأنه نقل 30 بأزین بوگفته: «خودا ملکوتَ چوطو تأنٚم شِمِره وأشکأفأنٚم؟ اونَ چی نقلٚ اَمرأ شِمِره وأشکأفأنٚم؟ 31 خردٚلٚ دأنه مأنستَن ایسه کی هرچن ایتأ جٚه کوجه، دأنه‌یأنی ایسه کی زیمینٚ میأن کأرٚده. 32 ولی وختی کی بکأشته بوبوسته، جٚه تومأم گیأیأن پیله‌تر به و اونی شأخه‌یأن پیلّه به، اوجوری کی پرنده‌یأن بتأنٚد اونی سأیه جیر لأنه چأکونٚد.» 33 اون، خودا پیغأمَ تأ اویَه کی مردوم بتأنستد بفأمٚد، خٚیلی دأستأنأن و نقلأنٚ اَمرأ اَشأنٚ رِه گفتی. 34 همیشٚک عیسا اَطو مردومَ دأستأن و نقلٚ اَمرأ آمؤختی. امّا وختی کی خو شأگردأنٚ اَمرأ تنأ بوستی، تومأمٚ نقلأنٚ معنأیَ اوشأنی رِه وأشکأفتی. عیسا دریأ توفأنَ آرأمَ کونه 35 او روج غروب دٚمٚ رِه، عیسا خو شأگردأنَ بٚفرمأسته: «بیشیم دریأچه اوطرف.» 36 پس اوشأنی‌یَ کی سأحیلٚ میأن جمَ بوسته بود، اوسه کودٚد و هو لوتکأ اَمرأ کی عیسا اونی دورونی نیشته بو رأ دکفتٚده. ایتأ عیده‌یٚم البأقی لوتکأیأنٚ اَمرأ اوشأنی دونبألسر بوشؤده. 37 اَندر زمأتی نوبوسته کی ایتأ توندٚ توفأن رأ دکفته. وأشتنأکٚ موجأن، لوتکأیَ ایجوری کوبستی کی پور دِه بأقی نوبو آبٚ جَا پورَ به، غرقَ بٚه. 38 امّا عیسا لوتکأ سرجأکش، خو سٚرَ ایتأ موتکّأ رو بٚنأ و خؤرَه رأحت خوفته بو. اونی شأگردأنَ هولَ گیفته و اونَ ویریزأنٚده و بوگفتد: «اوستأد، اَمی فیکر نییی؟ غرقَ بوستأندٚریم!» 39 اون ویریشته بأدٚ سٚر دأد بٚزِه و دریأیَ دستور بٚدأ: «سأکیتَ بو! آرأم بئیس!» هو زمأت بأد جٚه حرکت بئیسأ و تومأمٚ جأیأن آرأمَ بوسته. 40 عیسا خو شأگردأنَ بٚفرمأسته: «چٚره اَندر بٚتٚرسه بید؟ هنویٚم مٚرَه ایعتمأد نأریدی؟ 41 هطویی کی تومأمٚ اوشأنی جأنَ ترس دکفته بو، کس‌کسَ بوگفتٚده: «اَن دِه کیسه کی حتّا بأد و دریأیٚم اونی جَا حیسأب بٚرٚده!» |
© 2024 Transform Iran
Transform Iran