مَرقُس 3 - Gilaki New Testament

شفأ شَبّأتٚ روجٚ میأن

¹ عیسا ایوأردِه کفرناحوم میأن بوشؤ کنیسه‌ و اویَه ایتأ مردأکَ بیدِه کی اونی دٚس جٚه کأر دکفته بو.

² او روج شبّأت، هنٚ وأسی اونی موخألفأن اونَ پأستأندوبود کی اگه او مردأکَ هو روجٚ میأن شفأ بٚبخشه، ایچی بٚدأرٚد کی اونَ محکومَ کونٚد کی شَبّأتٚ میأن کأر کونه.

³ عیسا او مردأکَ بٚفرمأسته: «بیأ اَیَه بئیس کی همٚتأن بتأنٚد تٚرَه بیدینٚد!»

⁴ بأزین خو دیمَ وأگردأنِه و خو موخألفأنَ بٚفرمأسته: «ایتأ سؤال شیمی جَا دأرم، هوطو کی شریعتٚ گه شَبّأتٚ روجٚ میأن وأستی خُبی کودن یا بدی؟ اینسأنٚ جأنَ وأستی نیجأت دٚئن یا اَنکی اونَ هلأکَ کودن؟» هیکس گبی نٚزه.

⁵ عیسا غیظٚ اَمرأ اوشأنی‌یَ کی اونی دؤرٚوٚر ایسأبود فأندرسته و اوشأنی سنگٚ دیلٚ جَا دیلخورَ بوسته و او مردأکَ بٚفرمأسته: «تی بألَ رأستَ گیر!» مردأکٚم خو بألَ رأستَ کوده و اونی دٚس سألیمَ بوسته.

⁶ فریسیأن دفأتن کنیسه‌ جَا بوشؤده بیرون و بوشؤده (هیرودیأنٚ) کسأنٚ ورجأ کی کس‌کسٚ اَمرأ صلاح مصلحت بوکونٚد کی عیسا کوشتٚنٚ رِه ایتأ رأ بیأفٚد.

مردوم عیسا جَا ایطأعت کونٚده

⁷ هو وخت، عیسا خو شأگردأنٚ اَمرأ بوشؤ دریأچه کنأر و خٚیلیأن جٚه جلیلٚ مردومأنم اونی دونبألسر رأ دکفتد.

⁸ هطویم خٚیلی جٚه یوهودیه و اورشلیم و ادومیه مردومأن و اُردنٚ روخأنٚ او طرف، حتّا صور و صیدونٚ جَا بوشؤده اونی دونبألسر چونکی اونی موجیزه‌یأنٚ خٚوٚرَ بشتأوستٚده.

⁹ جِمئیت اَنقذر زیأد بو کی خو شأگردأنَ بٚفرمأسته ایتأ لوتکأ اونی رِه حأضیرَ کونٚد کی مردوم اونی سٚر فونتورکد.

¹⁰ چونکی هو روج، خٚیلیأنَ شفأ بخشه‌یی، اوجوری کی تومأمٚ نأخوشأن اونی ور فوتورکستٚد کی اونَ دٚس بٚزٚنٚد و شفأ بیأفٚد.

¹¹ اوشأنی‌یٚم کی نأپأکٚ روحأن اسیر بود، وختی اوشأنی چومأن اونَ دکفتی، اونی ورجأ کفتید خأکٚ سٚر و ایجگره اَمرأ گفتید: «تو خودا پٚسری!»

¹² ولی عیسا خٚیلی تأکید اَمرأ اوشأنَ فرمأستی کی مردومٚ ورجأ نٚگد اون کیسه.

عیسا دوأزده‌تأ شأگرد

¹³ بأزین، عیسا بوشؤ ایتأ کوه جؤر و اوشأنی جَا کی اینتخأب بوکوده بو، دعوت بوکوده کی بأیٚد اونی ورجأ.

¹⁴ بأزین، اوشأنی جَا دوأزده نفرَ اینتخأب بوکوده و اوشأنَ روسول نأم بٚنأ کی همیشٚک اونی اَمرأ بٚبٚد و اَشأنَ اوسه کونه کی خودا پیغأمَ مردومٚ گوش فأرٚسأنٚد

¹⁵ و اَ ایقتدأرَ بٚدأرٚد کی پٚلیدٚ روحأنَ بیرونَ کونٚد.

¹⁶ او دوأزده نفرَ کی اینتخأب بوکوده، اَشأنٚد: شمعون (کی عیسا اونَ "پِطرُس" لقب بٚدأ)؛

¹⁷ یعقوب و یوحنا (کی زبدی پٚسرأن بود و عیسا اوشأنَ "رعدٚ پٚسرأن" لقب بٚدأ)؛

¹⁸ آندریاس، فیلیپ، بَرتولُما، متا، توما، یعقوب (حلفی پٚسر)، تَدّای، شمعون (فدأییأنٚ حیزبٚ شین)

¹⁹ و یوهودأیَ اسخریوطی (هون کی بأزین عیسایَ خیأنٚت بوکوده)

عیسایَ نأجورٚ بُهتأن زنٚده

²⁰ وختی عیسا وأگردسته او خأنه‌یی کی زٚندیگی کودی بأزم خٚیلیأن اویَه جمَ بوستٚده، اوجوری کی غذأ خوردنٚ رِه فورصت نوکودٚد.

²¹ وختی اونی فکٚ فأمیلأن اَ خٚوٚرَ بشتأوستٚده بأمؤده کی اونَ ببرد خودشٚ خأنه چونکی فیکر بوکودٚد خو عقلَ جٚه دٚس بٚدأ.

²² چنتأ جٚه دینی عألیمأنٚم کی اورشلیم جَا بأمؤ بود، بوگفتد: «شیطان بوشؤ اونی جٚلدٚ دورون! اون پٚلیدٚ روحأنَ، پٚلیدٚ روحأنَ رییس قودرتٚ اَمرأ بیرونَ کونه.»

²³ عیسا اَشأنَ دؤخأده خو ورجأ و اَشأنٚ رِه مثلأنی بٚزِه، اَشأنی جَا وأوٚرسِه: «چوطو به کی شیطان خُورَ بیرونَ کونه؟

²⁴ ایتأ مملکت میأن کی داخلی جنگ بٚبه، اونی جٚه بین شؤئؤن حتمیه.

²⁵ هطویم، ایتأ خأنه کی اونی میأن دوشمنی وأسی سیوأ بوستن ایتفأق دکفه، فوگورده

²⁶ و اگه شیطان خو ضد بأج بأج بوبوسته‌بی و خو اَمرأ بجنگسته‌بی، هیکأری‌یَ انجأم دئن نتأنٚستی و تأ هسأ جٚه بین بوشؤ بو.

²⁷ بأزین، چوطو به کی اینفر بشه ایتأ قوی مردأی، شیطان مأنستَنٚ اونی مأل و مینألَ چأپؤ بوکونه؟ فقد اینفر اونی جَا پور زورتر تأنه اَ کأرَ بوکونه، اینفر کی بتأنه اونَ دٚوٚده و اونی خأنه‌یَ چأپؤ بوکونه.

²⁸ اَنکی شٚمٚره گفتأندرم رأس‌رأسِی ایسه کی هرتأ گونأ و کوفر بٚبخشه به،

²⁹ امّا اونی کی روح‌القدسَ کوفر بٚگه، هیوخت بٚبخشه نیبه و همیشٚک اَ گونأ سینگینی بأر اونی چأنٚ سٚر مأنه.»

³⁰ عیسا هنٚ وأسی اَ چیزأنَ بوگفته کی مردوم اَنٚ جأ کی اونی موجیزه‌یأنَ روح‌القدسٚ قودرتٚ جَا بدأنٚد، گفتیدی کی اون شیطانٚ قودرتٚ اَمرأ موجیزه کونه.

عیسا رأس‌رأسِی خأنوأر

³¹ بأزین عیسا مأر و برأرأن بأمؤده و هو بیرون بئیسأده، اینفرَ اوسه کودٚد کی اونَ وأخٚوٚرَ کونه.

³² هطو کی عیسا ایتأ عیده میأن نیشته بو، اونَ پیغأم بٚدأده، بوگفتد: «تی مأر و برأرأن بیرون تی رأفأ ایسأده.»

³³ اَشأنٚ جوأبٚ میأن بٚفرمأسته: «می مأر کیسه؟ می برأرأن کیأن ایسٚد؟»

³⁴ و اوشأنی‌یَ کی اونی دؤرٚوٚر نیشته بود، فأندرسته و بٚفرمأسته: «اَشأن می مأر و برأرأنٚد.

³⁵ اونکی خودا خأسته‌یَ بجأ بأوٚره، می برأر و خأخور و مأر ایسه.»