مَرقُس 10 - Gilaki New Testamentعروسی کودن ایتأ ایلاهی فرمأن ایسه 1 عیسا کفرناحومٚ جَا بوشؤ یوهودیه سرزیمینٚ ور، اُردنٚ روخأنٚ شرقٚ ور. بأزم ایتأ عألمه مردوم اونی دؤر جمَ بوستٚد و اونم همیشٚکی عأدتٚ مأنستَن، اوشأنی آمؤختٚنٚ جَا موشغولَ بوسته. 2 بأزین بعضی جٚه فریسیأن بأمؤده کی بوگو موگو اَمرأ اونی موچَ بیگیرٚد. پس عیسایَ بوگفتد: «آیا مردأی ایجأزه دأره خو زنَ طلأقَ ده؟» 3 عیسایٚم اوشأنی جَا وأوٚرسِه: «موسا دروأره‌یٚ طلأقَ دئنٚ چی فرمأن بٚدأ؟» 4 جوأب بٚدأده: «موسا وئأشته کی مرد ایتأ طلأق نأمه بینیویسه و خو زنأکَ وِلَ کونه.» 5 عیسا بٚفرمأسته: «موسا شیمی سنگ دیلی وأسی اَ فرمأنَ بٚدأ. 6 ولی خلقتٚ اوّل، خودا "اَشأنَ مردأک و زنأی خلق بوکوده." 7 و"هنٚ وأسی ایسه کی مرد خو پئر و مأرٚ جَا سیوأ وأبه و دوچوکه خو زنأکَ 8 و او دونه ایتأ بٚدأ." بأزین، اونی پٚسی اوشأن دِه دونه جأن نییٚده بلکی ایتأ جأن ایسٚد. 9 بأزین اونچی کی خودا دوچوکأنه، اینسأن نوأ سیوأ وأکونِه.» 10 بأزین وختی عیسا خأنه میأن تنأ بو، اونی شأگردأن ایوأردِه اَ مأجیرأ رِه گبَ سٚرَ گیفتٚد. 11 عیسا اوشأنَ بٚفرمأسته: «اونی کی خو زنأکَ طلأقَ دِهه و ایتأ دِه زنأکٚ اَمرأ عروسی کونه، نسبٚت به خو زنأی زٚنأ بوکوده. 12 هطو اگه ایتأ زنأی خو مردأکٚ جَا سیوأ وأبه و ایتأ دِه مردأکٚ اَمرأ عروسی بوکونه، اونم زٚنأ بوکوده.» عیسا و کوجه زأکأن 13 مردوم خوشأنی زأکأنَ بأوٚردٚد عیسا ورجأ کی اوشأنی سٚرٚ رو دٚس بٚنه و اوشأنَ برکت بٚدأ. امّا عیسا شأگردأن هنٚ وأسی اوشأنَ ملأمت بوکودٚد. 14 امّا وختی عیسا، شأگردأنٚ کردکأرَ بیدِه، نأرأحتَ بوسته و اَشأنَ بوگفته: «وئألید زأکأن بأیٚد می ورجأ اوشأنی مأنع نیبید. چونکی خودا ملکوت اوشأنی شینه کی اَ زأکأنٚ مأنستَن ایسٚد. 15 رأس‌رأسِی شٚمٚره گم کی اونی کی خودا ملکوتَ ایتأ زأکٚ مأنستَن قوبیل نوکونه، هیوخت نتأنه بشه اونی دورون.» 16 بأزین زأکأنَ کٚشَ گیفته و اَشأنی سٚرٚ رو دٚس بٚنأ و اوشأنَ برکت بٚدأ. زیأدی ثروٚتٚ خطر 17 وختی عیسا خأستی بشه سٚفر، اینفر توندٚ تأکیدی بأمؤ، اونی جولو زانو بٚزِه و وأوٚرسِه: «اَی خوروم اوستأد، چی وأ بوکونم کی اَبدی زٚندیگی‌یَ بٚدٚس بأوٚرٚم؟» 18 عیسا اونی جَا وأوٚرسِه: «چٚره مٚرَه خوروم دؤخأنی؟ جغرز خودا هیکس نیکو نییٚه! 19 امّا تی سوألٚ وأسی، تو کی حوکمأنَ دأنی قتل نوکون، زٚنأ نوکون، دوزدی نوکون، دورُغٚ شهأدت نٚدن، هیکسَ گول نزن و تی پئر و مأرٚ ایحترأمَ بٚدأر.» 20 مردأی جوأب بٚدأ: «تومأمٚ اَ حوکمأنَ جٚه او وخت کی زأی بوم، انجأم بٚدأم.» 21 عیسا اونَ محبت و گرمی اَمرأ فأندرسته و بٚفرمأسته: «تو فقد ایچی کم دأری؛ بوشو هرچی دأری بوفروش و اونی پولَ فأدن فِقِرأنَ کی آسمأنٚ میأن تٚرَه گنج بٚبه نه زیمینٚ سٚر! بأزین بیأ و می جَا ایطأعت بوکون!» 22 مردأی ایتأ بهم بوخورده و نأاومیدٚ دیمٚ اَمرأ، جٚه اویَه بوشؤ، چونکی خٚیلی مأل و مینأل دأشتی. 23 عیسا ایپچه خو دؤرٚورَ فأندرسته و بأزین خو شأگردأنَ بٚفرمأسته: «چندر دوشوأره اینفر کی خٚیلی مأل و مینأل دأره بشه خودا ملکوت میأن.» 24 شأگردأن، عیسا اَ گبٚ جَا مأتَ بوستٚد. پس عیسا ایوأردِه بوگفته: «اَی زأکأن، خودا ملکوتٚ دورون شؤئؤن خٚیلی دوشوأره. 25 ایتأ شوتورٚ دٚوأرٚستن سوزنٚ سولأخٚ جَا رأحتتره تأ اَنکی ایتأ مأل و مینألدأرٚ آدم، بشه خودا ملکوتٚ دورون!» 26 شأگردأن اَ گبٚ جَا مأتَ بوستٚد و وأورسئده: «پس کی تأنه نیجأتٚ بیأفه؟» 27 عیسا اوشأنَ فأندرسته و بٚفرمأسته: «اینسأنی فیکرٚ اَمرأ اَ کأر بوستنی نییٚه، ولی خودا فیکر اَمرأ اَطو نییٚه، چونکی خودا رِه همه چی ایمکأن دأره.» 28 بأزین پطرس بوگفته: «اَمأن جٚه همه چی دٚس بٚکشِییم کی تی جَا ایطأعت بوکونیم.» 29 عیسا جوأب بٚدأ: «خأطر جم بیبید، اگه اینفر ایچی می وأسی و اینجیل وأسی جٚه دٚس بٚدأ، خو خأنه، برأر، خأخور، پئر، مأر، زأی و مأل و مینألٚ مأنستَن، 30 خودا اونَ صد برأبر ویشتر خأنه، برأر، خأخور، پئر، مأر و زأی و زیمین فأدَه، رنج و زحمتٚ اَمرأ و آینده دونیأ میأنم، اَبدی زٚندیگی اونی سأم بِه. 31 ولی خٚیلیأن کی اَسه اوّلٚده، آخر بٚدأ و اوشأنی کی آخرٚده، اوّل بٚدأ.» عیسا آخری وأر شِه اورشلیم 32 بأزین اوشأن رأ دکفتد اورشلیمٚ ور. عیسا پیشتر شؤیی و شأگردأن اونی دونبألسر. نأخٚوٚرکی شأگردأن مأتَ بوستٚد و اوشأنی جأنَ ترس دکفته. عیسا دوأزده شأگردَ فأکشه ایتأ گوشٚه و ایوأردِه اوشأنَ بوگفته چی سرنیویشتی اورشلیمٚ میأن اونٚ رِه پیش اَیِه. اون بٚفرمأسته: 33 «اَسه شیم اورشلیم و اویَه اینسأنٚ پٚسرَ، پیله کأهینأن و دین عألیمأنٚ دٚس ایسپأرٚده. اوشأن اونَ مرگ رِه محکوم کونٚده. بأزون اونَ ایسپأرٚده رومیأنٚ دٚس. 34 اَشأن اونَ رخشنٚ گیرده و اونی دیمَ فیلی فوکونده، اونَ شلأق زنٚده و آخرپٚسی اونَ کوشٚده، ولی سه روجٚ پٚسی زٚنده به.» ایتأ بیخودی خأهیش 35 یعقوب و یوحنا (زبدی پٚسرأن) بأمؤده اونی ورجأ و بوگفتد: «اوستأد، ایمکأن دأره کی اَمِرِه ایتأ لوطفی بوکونید؟» 36 عیسا وأوٚرسِه: «چی لوطفی؟» 37 بوگفتد: «وختی تی بأشکوه تختٚ رو بینیشتی، وئأل کی ایتأ جٚه اَمأن تی رأستٚ ور و اویتأ تی چپٚ ور بینیشینیم.» 38 عیسا جوأب بٚدأ: «شومأن نأنیدی چی خأستأندریدی! آیا او رنج و عذأبٚ زرخٚ پیأله جَا کی من وأستی وأخٚوٚرم، شومأنم تأنیدی وأخورید؟ یا کی او رنج و عذأبی کی من وأستی اونی میأن تعمید بیگیرم، شومأنم تعمید بیگیرید؟» 39 جوأب بٚدأده: «آها، تأنیم.» عیسا بٚفرمأسته: «البت کی می جأمٚ جَا وأخوریدی و او تعمیدی کی من گیرم، شومأنم گیریدی، 40 ولی من اَ ایختیأرَ نأرٚم کی شٚمٚره می رأستٚ و چپٚ ور بینیشأنٚم. اَ جأجیگأ اوشأنی رِه بدأشته بوبوسته کی پیشتر اینتخأب بوبوستده.» 41 وختی البأقی شأگردأن بفأمستده کی یعقوب و یوحنا چی بٚخأستده،.او دو نفرٚ رِه توندَ بوستٚد. 42 بأزین عیسا خو شأگردأنَ دؤخأده بوگفته: «اَ دونیأ میأن، حأکیمأن مردومٚ رو ریأسٚت کونٚده و اربأبأن خوشأنٚ جیردسأنَ فرمأن دٚهٚده. 43 ولی شیمی میأن نوأستی اَطو بٚبه، بلکی برعکس اونی کی خأیه شیمی میأن پیله‌تر بٚبه. وأستی همٚتأنٚ خیدمتگوزأر بٚبه. 44 اونی کی خأیه شیمی میأن اوّل بٚبه، وأستی همٚتأنٚ غولأم بٚبه. 45 چونکی اینسأنٚ پٚسر نأمؤ کی کسی اونَ خیدمت بوکونه، بلکی بأمؤ کی مردومَ یاور بٚدأ و خو جأنَ مردومٚ وأسی فٚدأ بوکونه. کورٚ مردأکٚ شفأ 46 بأزین فأرٚسِده اَریحا. وختی شهرٚ جَا شؤئؤندوبود بیرون، خٚیلی مردوم اونی دونبألسر رأ دکفتٚده. رأ کنأره، ایتأ کور نیشته بو و گدأیی کودی، اونی ایسم بارتیمائوس بو. 47 وختی بارتیمائوس بشتأوسته کی عیسای ناصری او رأ جَا دٚوأرٚستأندره، بینأ کوده ایجگره زِئن و بوگفته: «اَی عیسا، اَی داوودٚ پٚسر، مٚرَه رحم بوکون!» 48 خٚیلی جٚه آدمأن اونی سٚر فریأد بٚزِده: «سأکیتَ بو» امّا اون قأیم‌تر دأد زِئی: «اَی داوودٚ پٚسر مٚرَه رحم بوکون!» 49 وختی عیسا اونی سٚر و صدایَ بشتأوسته هویه بئیسأ و بٚفرمأسته: «بیگید بأیِه اَیَه» پس مردوم اونَ دؤخأدٚد، بوگفتد: «تی بخت ویریشت؛ ویریز کی تٚرَه دؤخأدأندٚره.» 50 بارتیمائوس خو کُئنه لیوأسَ تأودأ ایتأ کنأره و جٚه خو جأ سٚر وأز بوکوده و بوشؤ عیسا ورجأ. 51 عیسا وأوٚرسِه: «چی خأیی تٚرَه بوکونم؟» بوگفته: «اوستأد خأیم بیدینٚم.» 52 عیسا اونَ بٚفرمأسته: «بوشو کی تی ایمأن تٚرَه شفأ بٚدأ.» او مردأی فوری بتأنسته بیدینه و عیسا دونبألسر رأ دکفته. |
© 2024 Transform Iran
Transform Iran