متّی 7 - Gilaki New Testament

دیگرأنَ قیضأوت کودن

¹ «دیگرأنَ قیضأوت نوکونید، کی شٚمٚره قیضأوت نوکونٚد.

² چونکی هر جور دیگرأنَ قیضأوت بوکونید و اوشأنٚ رِه رأی بدید، هوطویی شٚمٚره قیضأوت به و هو میلاکٚ اَمرأ کی دیگرأنٚ قیضأوت کونید، شٚمٚره‌یٚم قیضأوت به.

³ چٚره سوبیلَ تی برأرٚ چومٚ دورون دینی، ولی روبارخألَ تی چومٚ دورون نیدینی؟

⁴ چوطو جورأت کونی تی برأرَ بیگی: "وئأل سوبیلَ، تی چومٚ جَا بیرون بأوٚرٚم"، ولی خودتٚ چوم دورون روبارخأل دأری؟

⁵ اَی ریأکأر، اوّل روبارخألَ تی چومٚ جَا بیرون بأوٚر، بأزین تأنی بِیتر بیدینی و تأنی سوبیلَ تی برأرٚ چومٚ جَا بیرون بأوری.

⁶ «اونچی کی موقدسه، سٚکأنَ فأندید، و شیمی مولواریدأنَ خوکأنٚ ور تأنوٚدید، چونکی اوشأن مولواریدأنَ لقد دٚمٚج کونٚده و وأگردٚده، شٚمٚره فوتورکٚده.

وأموجید کی بیأفید

⁷ «بٚخأیید کی شٚمٚره فأدأ بٚبه، وأموجید کی بیأفید؛ بوکوبید کی در شیمی رو وأزَ به.

⁸ چونکی هرکی بٚخأیٚه، بٚدٚس اَوٚره، و هر کی وأموجه، یأفٚه، و هرکی بوکوبٚه، در اونی رو وأزَ بِه.

⁹ شومأن کویتأ اگه اونی زأی اونی جَا نأن بٚخأیٚه، اونَ سنگ فأده؟

¹⁰ یا اگه مائی بٚخأیٚه، اونَ لأنتی فأده؟

¹¹ بأزین کی شومأن، گونأکأرٚ آدمأن، دأنید کی وأستی خورومٚ چیزأن شیمی زأکأنَ فأدید، چندر ویشتر شیمی آسمأنی پئر اوشأنی رِه کی اونی جَا بخأیٚد، خورومٚ چیزأن بخشه.

¹² پس مردومٚ اَمرأ هوطو رفتأر بوکونید کی خأییدی شیمی اَمرأ رفتأر بوکونٚد. اَن اصلٚ تورأت و پیغمبرأنٚ کیتأبأنه.

همیشٚکی زٚندیگی رأیَ بٚدٚس اَوٚردٚن

¹³ «فقد او بأریکه دٚرٚ جَا دٚوأرٚستنٚ اَمرأ تأنید خودا ملکوتَ بٚدٚس بأوٚرید. رأیی کی هلأکَ بوستنٚ ور شِه خٚیلی پت و پأنه و پیله دروأزه دأره و خٚیلیأن ایسأیید کی اونَ اینتخأب کونٚده.

¹⁴ ولی او دٚر کی همیشٚکی زٚندیگی رو وأزَ بِه، خٚیلی تنگه و اونی رأیٚم بأریک، و فقد ایتأ پیچه آدمأن اونی دورون رأ یأفده.

دأر و اونی مِیوه

¹⁵ «شیمی حواس دورُغی پیغمبرأنَ بمأنه، اوشأن آرأمٚ گوسوٚندٚ لیوأسٚ دورون شیمی ور اَیٚده، ولی رأس‌رأسِی درنده گُرگٚدٚه.

¹⁶ اوشأنَ تأنیدی اوشأنی مِیوه جَا بٚشنأسید، ینی اوشأنی کردکأرأنٚ جَا. آیا انگورَ شأ تٚمٚشٚ جَا یا اَنجیلَ وأشٚ جَا چِئن؟

¹⁷ خورومٚ دأر، خورومٚ مِیوه دِهه و نأجورٚ دأر، نأجورٚ مِیوه.

¹⁸ خورومٚ دأر نتأنِه نأجورٚ مِیوه بأوٚره؛ نأجورٚ دأرم نتأنِه خورومٚ مِیوه بأوٚره.

¹⁹ پس هرتأ دأر کی نأجورٚ مِیوه اَوٚره، وأوِه بِه، تأوٚدأ بٚده آتش دورونی.

²⁰ پس چی؟ هوطو کی دأرَ اونی مِیوه جَا شنأسٚده، شومأنم تأنیدی مردومَ اوشأنی کردکأرأنٚ جَا بٚشنأسید.

مسیحٚ رأس‌رأسِی شأگردأن

²¹ «گومأن نوکونید هر کی مٚرَه "خوداوندا! خوداوندا!"دؤخأنه، آسمأنٚ ملکوتٚ دورون شِه. فقد اوشأنی بودورون شٚده کی می آسمأنی پئرٚ ایرأده‌یَ خوشأنی کردکأرأنٚ میأن انجأم دٚهٚده.

²² دأوری روجٚ رِه، خٚیلیأن مٚرَه گده: "خوداوندا! خوداوندا! اَمأن تی نأمٚ اَمرأ نوبوّت بوکودیم و تی پیغأمَ مردومَ فأرٚسأنِییم، تی نأمٚ اَمرأ، دیوأنَ بیرونَ کودیم، و تی نأمٚ اَمرأ خٚیلی موجیزه انجأم بٚدأییم."

²³ ولی من بی‌رودروأسی جوأب دٚهٚم: "هیوخت شٚمٚره نٚشنأختیم. می جَا دورَ بید، اَی بدهکأرأن."»

قأیمٚ پأکأر

²⁴ «هرکی می آموجه‌یأنَ بشتأوه و اوشأنَ انجأم بٚده، عأقیلٚ آدمه. اون هو کسی‌یَ مأنه کی خو خأنٚه‌یَ ایتأ قأیم صخره رو چأکوده.

²⁵ هرچی وأرٚش بٚوأرٚست و سیل بأمؤ، و بأد و توفأن او خأنٚه رو بأمؤ، فوئونگوردٚستٚه، چونکی صخره رو چأکوده بوبوسته بو.

²⁶ ولی هرکی می آموجه‌یأنَ بشتأوه و اوشأنٚ جَا ایطأعت نوکونٚه، بی‌عقله. اون هو کسی‌یَ مأنه کی خو خأنٚه‌یَ فورشٚ سٚر چأکوده.

²⁷ وختی وأرٚش و سیل و بأد و توفأن اونی خأنٚه رو بأمؤ، ایجور فوگوردٚسته کی جٚه اون هیچی نمأنسته.»

²⁸ وختی عیسا اَ گبأنَ تومأنَ کود، مردوم اونی آموجه‌یأنَ جَا قأقَ بوستٚد،

²⁹ چونکی قوّت و ایقتدأرٚ اَمرأ اوشأنَ آمؤختأندوبو، نه یوهودٚ دینٚ عألیمأنٚ مأنستَن.