متّی 28 - Gilaki New Testament

عیسا مورده‌یأنٚ جَا ویریزه

¹ شَبّأتٚ پٚسی، یکشنبه روجٚ رِه صُب دٚم، مریم مجدلیه و اویتأ مریم، بوشؤده قبر سٚر.

² نأخٚوٚرکی ایتأ توندٚ زیمین لرزه بوبوسته، چونکی خوداوندٚ ایتأ جٚه فٚرٚشته‌یأن، آسمأنٚ جَا بأمؤ بیجیر، مقبٚره ور بوشؤ و سنگی کی اونه دهأنه سٚر نٚهأبو‌یَ گٚرأ دأ ایتأ کنأره و اونی سٚر بینیشت.

³ فٚرٚشته دیم توخ توخ زِیی و اونی لیوأس وٚرفٚ مأنستَن سیفید بو.

⁴ نیگهبأنأن اونی دئنٚ اَمرأ زهله بوکودٚده، بپرکٚستٚد و مٚیّتٚ مأنستَن، بی‌حرکت زیمینٚ سٚر بکفتٚد.

⁵ فٚرٚشته زنأکأنٚ بوگفته: «نوأترسِئنید! دأنٚم عیسا دونبأل گردیدی کی بوشؤ صلیبٚ سٚر؛

⁶ اون اَیَه نئیسأ! هوطو کی خودش بوگفته بو، زٚنده بوسته. بأئید او جیگأ کی اونی جسدَ بٚنأ بود، شیمی چومٚ اَمرأ بیدینید.

⁷ و اَسه توندأ توند بیشید، اونی شأگردأنَ بیگید کی اون زٚنده بوسته و جلیلٚ ور شِه کی اوشأنَ اویَه بیدینه. جٚه خأطرَ ندید اَ پیغأمَ اوشأنَ فأرسأنید.»

⁸ زنأکأن ترس و ایتأ پیله شأدی اَمرأ قبرٚ جَا بوشؤده بیرون و توندأ توند بوشؤده شأگردأنٚ ورجأ کی فٚرٚشته پیغأمَ اوشأنَ فأدٚد.

⁹ هوطویی کی دووٚستندوبود، ایوأرکی عیسا‌یَ خوشأنَ ور بیدِد! اون بوگفته: «سلأم!» زنأکأن اونی پأ دکفتد و شورو بوکودٚد پرستٚش کودن.

¹⁰ عیسا اوشأنَ بٚفرمأسته: نوأترسِئنید! بیشید و می برأرأنَ بیگید کی هر چی توندتر بٚشٚد جلیل کی مٚرَه اویَه بیدینٚد.»

نیگهبأنأنٚ گوزأرش

¹¹ زنأکأن هنو فأنرٚسِه بود شهر، کی چنتأ نیگهبأن جٚه قبرٚ سٚر، خوشأنَ فأرٚسأنِد شهر و اَ موضو‌یَ پیله کأهینأن رِه وأگویا بوکودٚده.

¹² اوشأنم، پیله کسأنٚ دِئن پٚسی و مشوٚرت اَمرأ، نیگهبأنأنَ خٚیلی پول فأدأده،

¹³ بوگفتٚده: «کی بیگید، "عیسا شأگردأن شبٚ رِه بأمؤده و وختی اَمٚرَه خأب بٚسٚرَ شؤ، اونی جسدَ بودوزدأنِده."

¹⁴ اگه اَ موضو فرمأندأرٚ گوش فأرٚسٚه، اَمأن اونی جوأبَ دیهیم کی شِمِره موشکیل پیش نأیِه.»

¹⁵ نیگهبأنأن رشوه‌یَ فأگیفتد و اَ دورُغٚ خٚوٚرَ پٚخشَ کودٚده، جوری کی جٚه او زمأت تأ اَسه، یوهودیأن اَ نقلَ بأوٚر کونٚده.

عیسا پیله فرمأن

¹⁶ بأزین عیسا یأزده‌تأ شأگرد بوشؤده جلیل و ایتأ کو جور کی عیسا بوگفته بو، جمَ بوستد.

¹⁷ وختی عیسایَ اویَه بیدِده، اونَ پرستٚش بوکودٚد، ولی بعضی جٚه اوشأن شک دأشتیدی کی اون هو عیسا بٚبه.

¹⁸ بأزون عیسا بأمؤ جولو و اوشأنَ بٚفرمأسته: «تومأمٚ ایختیأرأن آسمأن و زیمین دورون مٚرَه فأدأ بوبوسته.

¹⁹ پس بیشید تومأمٚ قومأنَ می شأگرد چأکونید و اوشأنَ، پئر و پٚسرَ و روح‌القدسٚ ایسمٚ اَمرأ آبٚ جَا تعمید بدید؛

²⁰ و اوشأنَ بأموجید کی تومأمٚ دستورأنی‌یَ کی شٚمٚره بٚدأم، ایطأعت بوکونٚد. موطمٚین بیبید هر جأ کی بیشید، حتّا اگه دونیأ دورترین جیگأیم بٚبه، من همیشٚک شیمی اَمرأ ایسأم!»