متّی 11 - Gilaki New Testament

یوحنا سوأل عیسا جَا

¹ عیسا بأزون کی اَ فرمأنَ خو دوأزده تأ شأگردَ فأدأ، جٚه اویَه بوشؤ کی او کؤگا شهرأنٚ دورون بأموجه و موعیظه بوکونٚه.

² وختی یوحنا کی زندأنٚ دورون ایسأبو، مسیحٚ کأرأنٚ خٚوٚرٚ بشتأوست، خو شأگردأنَ، اونی ورجأ اوسه کوده کی اونی جَا وأوٚرسٚد:

³ «آیا تو هو مسیحی ایسی کی وأستی بأمؤبی، یا وأ اینفرٚ دِه رأفأ بئیسیم؟»

⁴ عیسا اوشأنَ بٚفرمأسته: «وأگردید یوحنا ورجأ و اونچی بشتأوستید و بیدِیید، اونٚ رِه وأگویا بوکونید کی

⁵ چوطو کورأنٚ چومأن وأزَ بٚده، شٚلأن رأ شٚده، جوذأمیأن شفأ یأفده، کرأن ایشتأوده، بٚمٚرده‌یأن زٚنده بٚده و فِقِرأنَ خوروم خٚوٚر اعلام بِه.

⁶ و اونَ بیگید: خوشبحألٚ اونی کی مٚرَه شک نوکونٚه.»

⁷ وختی یوحنا شأگردأن شؤئؤندوبود، عیسا مردومٚ رِه اونی جَا گب زِئنَ، سٚربیگیفته و بٚفرمأسته: «بوشؤبید بیأبأنٚ دورون کی چوجور مردأکی‌یَ بیدینید؟ ایتأ لٚسٚ مردأی، نی مأنستَن، کی هرتأ بأدٚ اَمرأ بٚپٚرکٚش اَیِه؟

⁸ یا رأفأ ایسأبید ایتأ مردأکَ، گیرأنٚ لیوأس اَمرأ بیدینید؟ نه، اوشأنی کی گیرأنٚ لیوأس دوکودٚد، پأدیشأیأنٚ قصرأنٚ دورون زٚندیگی کونٚده.

⁹ ینی بوشؤبید ایتأ پیغمبرَ بیدینید؟ آها، شٚمٚره گم کی یوحنا ایتأ پیغمبرٚ جَایٚم پیله‌تره.

¹⁰ یوحنا هونی ایسه کی موقدسٚ کیتأبأنٚ دورون اونی جَا بینیویشته بوبوسته: "من می قأصیدَ تی پیشتر اوسه کونم، و اون، رأیَ تٚرَه آمأده کونه."

¹¹ «رأس‌رأسِی شٚمٚره گم تومأمٚ اینسأنأنٚ میأن کی تأ اَسه زٚندیگی بوکودٚد، هیکس یوحنا کی تعمید دِهه جَا پیله‌تر نییٚه؛ اَطویی، کوجه‌دأنه‌ترین نفر آسمأنٚ ملکوتٚ دورون اونی جَا پیله‌تره.

¹² «و جٚه یوحنا رسألتٚ زمأتٚ سرگیفتن تأ اَسه، آسمأنٚ ملکوت قودرت و شیدّتٚ اَمرأ پٚخشَ بوستن دٚرٚه، یا اونی حق، خشونت کودأندٚرٚده و پور زورأن اونٚ فوتورکٚده.

¹³ چون تومأمٚ پیغمبرأن و تورأت تأ یوحنا زمأت نوبوّت کودیدی.

¹⁴ و اگه اونچی کی شٚمٚره گم قوبیل کونیدی، اون هو ایلیایٚ نبی ایسه کی هوطو کی پیغمبرأن نوبوّت بوکوده بود، وأستی بأیِه.

¹⁵ هر کی گوش کأر کونه بشتأوه.

¹⁶ «تأنٚم بٚگم اَ نسل چی‌یَ مأنه؟ کوجه زأکأنی‌یَ مأنه کی کوچه و بأزأرٚ میأن کٚرأ بأزی کودندٚرد و خوشأنی ریفِقأنٚ جَا گله شیکأیت کونٚده و گده:

¹⁷ " شِمِره عروسی سأز و نٚقأره بٚزِییم، رقص نوکودیدی، مرثیه بخأندم، گریه نوکودید."

¹⁸ چون یوحنا خو وختٚ خوردن وأخوردن رِه نٚنأیی، گیدی: "دیو بٚزِکه".

¹⁹ ولی اینسأنٚ پٚسر کی میهمأنی شِه و بوخور وأخور کونه، گیدی: " شکم پیس و شرأب خؤرَه و بأج فأگیرأن و گونأکأرأنٚ اَمرأ بینیش ویریز دأره!" ولی حیکمتٚ دوروستی‌یَ، اونی نتیجه و ثمره جَا شأ ثأبیت کودن.»

ایمأن نأشتنٚ نتیجه

²⁰ بأزون عیسا شورو بوکود او شهرأنَ سٚرزنش کودن کی ویشترٚ خو موجیزه‌یأنَ اویَه بوکوده بو، ولی اوشأن خوشأنی گونأیأنٚ جَا توبه نوکودٚد و خودا ور وأنگردستٚد.

²¹ «خورَزین، بیت صیدا شٚمٚره ننگ نییٚه؟ چون اگه موجیزه‌یأنی کی شیمی میأن بوکودم، صور و صیدونٚ فأسیدٚ شهرأنٚ دورون بوکوده بیم، اوشأنی اَهألیأن خٚیلی زمأت پیش، خوشأنی گونأیأنٚ جَا توبه بوکوده بود، و شندره پندٚره دوکوده بود و خأک و خأکستر نیشتیدی کی خوشأنی پٚشیمأنی‌یَ نیشأن بٚدٚد.

²² ولی شٚمٚره گم کی دأوری روجٚ رِه، صور و صیدونٚ اوضأع، جٚه شیمی اوضأع خٚیلی بِیتره.

²³ و تو اَی کَفَرناحوم، آیا آسمأنٚ جَا، بوجؤر شی؟ هیوخت! تو او بیجیر، بٚمٚرده‌یأنٚ دونیأ دورون شی، چون اگه موجیزه‌یأنی کی تی میأن بوکودم، سُدومٚ فأسیدٚ شهرٚ دورون بوکوده بیم، تأ ایمرو، بأقی مأنستی.

²⁴ تٚرَه گم کی دأوری روجٚ دورون، سُدومٚ اوضأع جٚه تی اوضأع خٚیلی بِیتره.»

می ورجأ بأئید

²⁵ بأزین، عیسا دوعأ بوکود و بٚفرمأست: «ای پئر، آسمأن و زیمینٚ صأب، تی جَا ممنون کی اَ کأرأنَ کسأنی جَا کی خوشأنٚ عألیم و زٚبر و زرنگ دأنٚده، قأیمَ کودی و اَشأنَ او کسأنی رِه وأشکأفأنه‌یی کی زأکأنَ مأنٚده.

²⁶ هطویه اَی پئر، تی دیلخوشی اَن بو کی، اَطویی کأر بوکونی.

²⁷ «می پئر همه چی‌یَ می دٚس فأدأ. رأس‌رأسِی هیکس پٚسرَ نشنأسه جغرز پئر و هیکس رأس‌رأسِی پئرَ نشنأسه جغرز پٚسر و اوشأنی‌یٚم کی پٚسر بٚخأیٚه خؤرَه اوشأنَ بٚشنأسأنه.»

²⁸ بأزین بٚفرمأسته: «می ورجأ بأئید، اَی تومأمٚ زحمتکشأن و رنج بیدِکأن و من شٚمٚره آسأیش فأدٚم.

²⁹ می یوغَ بچأنَ گیرید و می جَا بأموجید، چون سٚربیجیر و دیل‌میهرٚوأنم، و شیمی جأنٚ دورون آسأیش یأفیدی.

³⁰ چون می یوغ رأحته و می بأر کی شیمی چأن نٚهٚم، سوبوک.»