لوقا 2 - Gilaki New Testamentعیسا مسیح بودونیأ اَمؤن 1 او وختأن، اوگوستوس، رومٚ فرمأنروأ، دستور بٚدأ کی مردومَ تومأمٚ سرزیمینأنٚ دورون کی اونی فرمأنروأیی جیر نٚهأ بو سٚرشومأری بوکونٚد. 2 اَ اوّلی سٚرشومأری او وختی ایتفأق دکفته کی کورینیوس سوریه فرمأنروأ بو. 3 سٚرشومأری شرکٚت کودنٚ وأسی، هر کس وأستی بوشؤبی هو شهرأنی کی بودونیأ بأمؤ بو. 4 جٚه اَ خأطر، یوسف هم ناصره شهرٚ جَا کی اوستأنٚ جلیلٚ میأن نٚهأ بو، بوشؤ بیت لحمٚ یوهودیه شرأ کی داوودٚ پأدیشأ اویَه بودونیأ بأمؤ بو، چونکی اون جٚه داوودٚ پأدیشأ نتأج بو. 5 مریم کی یوسفٚ نأمزود بو و خو شکم دأشتنٚ آخری روجأنَ گوذرأنندوبو، اونی اَمرأ بوشؤ کی ایسم نیویسی بوکونه. 6 هو وخت کی بیت لحمٚ میأن ایسأبود، مریمٚ زأیمأنٚ وخت فأرٚسِه 7 و خو اوّلی زأکَ کی پٚسر بو، بودونیأ بأوٚرده و اونَ قوندأقٚ دورون وأپخته و ایتأ تیلنبأرٚ دورونی بوخوسأنه، چونکی اوشأنٚ رِه اویَه موسأفرخأنه دورون جأ نوبو. فٚرٚشته‌یأن و چوپأنأن 8 او شهرٚ دؤرٚورٚ صأرأیی میأن، چوپأنأنی ایسأبید کی شبٚ رِه خوشأنٚ گلّه‌یأن جَا موحأفیظت کودید. 9 او شب، نأخٚوٚرکی ایتأ فٚرٚشته اوشأنی میأن ظأهیرَ بوسته و خوداوندٚ جلالٚ روشنأیی اوشأنی دؤرٚور دٚتأوٚسته و همٚتأن بترسئید. 10 امّا فٚرٚشته اوشأنَ ایطمینأن بٚدأ و بوگفت: «نوأترسِئنید! من ایتأ خورومٚ خٚوٚر شِمِره دأرم، ایتأ خوروم خٚوٚر همٚتأ مردومٚ خوشألی وأسی! 11 و اون اَن ایسه کی هه ایمرو داوودٚ شهرٚ دورون، ایتأ نیجأت بٚدأ کس شِمِره بودونیأ بأمؤ، هونی کی مسیح و خوداونده. 12 می گبأنٚ دوروستی نیشأنه‌یأن اَن ایسه کی ایتأ قوندأقه زأکَ دینید کی قوندأقٚ دورونی وأپخته و تیلنبأرٚ دورونی بوخوسأنِده.» 13 ایوأرکی ایتأ دسته پور جٚه آسمأنأنٚ فٚرٚشته‌یأن هو فٚرٚشته‌یَ دوچوکستٚده. اوشأن خودا عیبأدتٚ وأسی، آوأز خأندید و گفتید: 14 «خودایَ آسمأنأنٚ دورونی جلال بٚبه و زیمین رو، او مردومٚ میأن کی خودایَ خوشألٚ کونٚده، صفأ و آرأمٚش بٚبه!» 15 هطو کی فٚرٚشته‌یأن آسمأنٚ جَا وأگردٚستٚده، هو چوپأنأن کس‌کسٚ بوگفتٚده: «بأئید بیشیم بیت لحم و اَ عجیبٚ کأرَ کی خودا اونی خٚوٚرَ اَمٚرَه بٚدأ، اَمی چومأنٚ اَمرأ بیدینیم.» 16 پس توندأ تأکیدی اَمرأ بوشؤده بیت لحم و مریم و یوسفَ بیأفتٚد. بأزون ایتأ قوندأقه زأکَ بیدِده کی ایتأ تیلنبأرٚ دورون خوفته بو. 17 اَ مأجیرأیَ چوپأنأن دفأتن همٚتأنٚ گوش فأرٚسأنِد و او گبأنی‌یَ کی فٚرٚشته دروأره‌یَ قوندأقه زأی بوگفته بو وأگویا بوکودٚد. 18 هرکی اوشأنی گبأنٚ ایشتأوستی، قأقَ بوستی. 19 امّا مریم، تومأمٚ اَ مأجرأیأنَ خو دیلٚ دورونی دأشتی و ویشتر وختأن دروأره‌یٚ اون فیکر کودی. 20 بأزین چوپأنأن وأگردٚستٚده صأرأیی خوشأنٚ گلّه‌یأن ورجأ و جٚه اَ خأطر کی هوطو فٚرٚشته‌یأنٚ گبأنٚ مأنستَن بیدِده و بشتأوستٚده، خودایَ شوکر بوکودٚد. عیسایٚ تقدیم کودنٚ مرأسیم، خودا خأنه میأن 21 او زأکٚ هشتومی روج کی فأرٚسِه، اونی ختنه کودنٚ مرأسیم رِه اونی ایسمَ عیسا بٚنأد، ینی هو ایسمی کی فٚرٚشته جٚه قبل اَنکی مریم شکم اوسأنه، اونی رِه اینتخأب بوکوده بو. 22 ایتأ روج کی قرأر بو عیسا پئر و مأر خوشأنٚ طهأرتٚ مرأسیمٚ وأسی کی موسا شریعتٚ میأن نٚهأ بو بٚشٚد اورشلیم خودا خأنه، عیسایٚم خوشأنی اَمرأ ببردٚد کی خودایَ تقدیم بوکونٚد؛ 23 چونکی شریعتٚ میأن بأمؤ بو کی هرتأ خأنوأرٚ اوّلی پٚسر زأی وأستی خوداوندٚ رِه تقدیم بٚبه. 24 پس عیسا پئر و مأر خوشأنی طهأرتٚ وأسی، او قوربأنی کی لأزیم بویَ تقدیم بوکودٚد کی هوطو شریعتٚ قأنونٚ مأنستَن دونه قُمری یا دونه کوتٚر زأی بو. شمعونٚ نوبوّت کودن 25 او وختأن ایتأ خوروم مردأی کی خودا جَا حیسأب بردی و روح‌القدس جَا پور بو، اونی ایسم شمعون بو، اورشلیمٚ دورونی زٚندیگی کودی. اون مسیح رأفأ ایسأبو کی بأیٚه و ایسرأییلَ نیجأت بٚدأ. 26 روح‌القدس اونی رِه آشیکأرٚ کوده بو تأ او مسیح کی وأستی بأمؤبی‌‌یَ، نیدینه، نیمیره. 27 او روج، روح‌القدس اونَ هیدأیت بوکود کی بشه خودا خأنه و هو وختی کی یوسف و مریم، کوجه‌دأنه عیسایَ بأوٚردٚد کی هوطو شریعتٚ مأنستَن خودایَ تقدیم بوکونٚد، 28 شمعون، اونَ کٚشٚه گیفت و خودایَ شوکر بوکوده و بوگفته: 29 «خودایأ، اَسه دِه تأنٚم خیأل رأحتی اَمرأ می چومأنَ دونیأ جَا دٚوٚدٚم، هوطو کی قول بٚدأ بی. 30 می چومأنٚ اَمرأ، تی نیجأتَ بیدِم، 31 هو نیجأتی کی تومأمٚ اومتأنٚ رِه فرأهم بوکودی. 32 اون ایتأ نورٚ مأنستَن البأقی اومتأنَ دتأوٚه و تی قوم، ایسرأییلٚ نتأجٚ سٚربولندٚ کونه!» 33 یوسف و مریم مأت و قأق ایسأ بود و جٚه اونچی کی عیسا جَا بوگفته بوستی قأقَ بوسته بود. 34 امّا شمعون اوشأنی رِه دوعأی خیر بوکوده. بأزین، او زأکٚ مأر، مریمَ بوگفته: «اَ زأی اینتخأب بوبوسته کی خٚیلی جٚه ایسرأییلٚ نتأجٚ کفتن و ویریشتنَ بأعیث بٚبه، و ایتأ نیشأنه بٚبه کی اونی ضد گب بٚزٚنٚد. 35 و اَطویی خٚیلیأنٚ دیلأنٚ میأن، فیکری کی دٚرٚه آشیکأرَ به. ایتأ شٚمشیرٚم ایسه کی تی قلب میأن فوخأسته به!» آنّا نوبوّت کودن 36 معبدٚ دورون ایتأ زنأی کی خٚیلی پیر بو زٚندیگی کودی کی اونی ایسم آنّا بو، اون فونوئیلٚ دوختر، جٚه اشیرٚ قبیله بو. اون خو مردأکٚ هفت سأل ایزدوأج پٚسی جٚه دٚس بٚدأ بو. 37 و هشتأد و چأر سأل دأشتی کی ویوه بو. آنّا هیوخت معبدَ ترکٚ نوکودی، بلکی شبندروج، دوعأ و روزه اَمرأ خودایَ عیبأدت کودی. 38 هو وختی کی شمعون، یوسف و مریمٚ اَمرأ گب زِئندوبو، آنّایٚم بأمؤ بودورون، خودایَ شوکر بوکوده و تومأمٚ کسأنی‌یَ کی اورشلیمٚ نیجأت بٚدأ کسٚ رأفأ ایسأ بود، جٚه او زأی گب بٚزِه. 39 یوسف و مریم دینی مرأسیمٚ انجأم دئنٚ پٚسی، وأگردٚستٚد خوشأنی شهر ناصره کی جلیل اوستأنٚ میأن نٚهأ بو. 40 عیسا اویَه پیلّه بوسته. اون حیکمتٚ جَا پور بو و خودا فیض اونی رو نٚهأ بو. دوأزده سأله عیسا اورشلیم میأن 41 عیسا پئر و مأر هرتأ سأل، پِسَحٚ عَیدٚ مرأسیمٚ وأسی شؤئید اورشلیم. 42 وختی کی عیسا دوأزده سأل دأشتی، هوطویی یوهودٚ رسم مأنستَن، اونم خوشأنی اَمرأ ببردٚد. 43 عَیدٚ روجأن کی تومأنٚ بوسته، وأگردٚستٚده ناصره. امّا عیسا بودونٚ اَنکی یوسف و خو مأرٚ بٚگه، اورشلیم میأن بئیسأ. 44 اوشأن اوّلی روج، وأخبدأر نوبوستٚده کی اون نئیسأ چونکی فیکر کودید کی اون کأروأنٚ میأن ایسأ. امّا وختی شب دکفته و بیدِده کی عیسا هنو اَشأنٚ ورجأ نأمؤ، خوشأنی فک و فأمیل و ریفِقأنٚ میأن اونی دونبأل بگردٚستٚد، 45 امّا اونَ نیأفتٚد. بأزین مجبور بوبوستٚد وأگردٚد اورشلیم کی اونَ بیأفٚد. 46 آخرپٚسی، سه روج وأموج وأموج پٚسی، اونَ معبٚدٚ صحنٚ دورون بیأفتٚد کی دینٚ عألیمأنٚ میأن نیشته بو و اوشأنی گبأنَ ایشتأوستی و اوشأنی جَا وأورس وُورس کودی. 47 هرکی اونی گبأنَ ایشتأوستی، اونی فأم و جوأب دئنٚ جَا قأقَ بوستی. 48 اونی پئر و مأر وختی اونَ فأندرستٚد قأقَ بوستٚد! اونی مأر، اونَ بوگفت: «می جأنٚ دیلٚ پٚسر چٚره اَ کأرَ اَمی اَمرأ بوکودی؟ من و تی پئر دیلوأپس بیم و تومأمٚ جأجیگأیأنَ تی دونبأل بگردستیم!» 49 عیسا جوأب بٚدأ: «چی نیأزی بو می دونبأل بٚگردید؟ مگه نأنستید می پئرٚ خأنه دورون وأستی بئیسم؟» 50 امّا اوشأن عیسا گبَ نفأمٚستٚده. 51 بأزین عیسا، یوسف و مریم اَمرأ وأگردسته ناصره و همیشٚک اوشأنی جَا فرمأن بردی. اونی مأرٚم تومأمٚ اَ ایتفأقأنَ خو خأطرٚ میأن دأشتی. 52 بأزون عیسا دأنٚستٚن و حیکمتَ قد و قوأره میأن پیلّه بوستی و خودا و مردوم اونَ خوش دأشتیدی. |
© 2024 Transform Iran
Transform Iran