یعقوب 5 - Gilaki New Testament

ظألیمٚ مألدأرأنٚ آخرپٚسی

¹ و اَسه شومأن ای مألدأرأن خُب فأندٚرید! زٚهأر بٚزنید چون وأشتنأکٚ بلأیأن شیمی رأفأ ایسأ.

² جٚه اَسه شیمی مأل و مینأل جٚه بین بوشؤ و شیمی گیرأنٚ لیوأسأنٚم بید بٚزِه ایسه.

³ شومأن اَ زودگوذرٚ دونیأ دورون، طلأ و نوقره جمَ کونید، نأخٚوٚر جٚه اَنکی اَ کأرٚ اَمرأ، شِمِره قیأمتٚ روجٚ دورون موجأزأت جمَ کودأندرید. چون هوطو کی شیمی طلأ و نوقره‌یَ مورأن بٚزِه، آتشٚم شیمی جأنَ خوره.

⁴ خُب بشتأوید! او کأرٚگٚرأنٚ ایجگره‌یَ کی شیمی کیشأورزی زیمینأنٚ سٚر کأر بوکودٚد، بشتأوید؛ او کارگرأنٚ کی گول بٚزِئید و اوشأنَ دسمزدٚ فأندأیید. اَشأنٚ ایجگره آسمأنٚ لچه‌یَ بوجؤر بوشؤ و خوداوندٚ آسمأنٚ لشکرأنٚ گوش فأرٚسِه.

⁵ شومأن شیمی عُمر سالأنَ اَ دونیأ دورون خوش بُگذرأنِیید و عیأشی بوکودید و چأق و چلّه گوسوندأن مأنستَن بوبوستید کی سٚر وأوینی روجٚ رِه آمأدِیید.

⁶ شومأن بی‌گونأ اینسأنَ کی نتأنٚستی خو جَا دفأع بوکونه، محکوم بوکودید و بوکوشتید. نٚبد

زحمتأنٚ دورون صبر دأشتٚن

⁷ و امّا شومأن ای جأنٚ دیلٚ برأرأن کی خوداوند عیسا مسیح وأگردٚستنٚ وأسی روجٚ ایشمأریدی، صبر بٚدأرید و ایتأ کیشأورزٚ مأنستَن بیبید کی خو بأارزشٚ مأصولٚ جمَ کودن وأسی تأ پأییز ایسه.

⁸ پس شومأنم صبر بٚدأرید و یقین بٚدأرید کی خوداوند زود وأگرده.

⁹ ای برأرأن، وختی موشکلأنٚ دورون گریفتأرٚ بید، البأقیأنٚ تقصیرکأر نیگیرید و اَشأنَ جَا شیکأیت نوکونید کی خوداوندٚم شٚمٚره محکوم نوکونه، چون اون خو عأدیلأنه دأوری کودنَ سٚرگیره.

¹⁰ صبر و تحمولَ خوداوندٚ پیغمبرأنٚ جَا بأموجید.

¹¹ همه‌یٚ اوشأنی کی زٚندیگی دورون صبر و تحمول بدأشتده، خوشبختٚ بوستد. "ایوب" ایتأ مثأل جٚه اوشأنی ایسه کی تومأم موشکلأن و خٚیلی سختیأنٚ اَمرأ خو صبر و ایمأنٚ جٚه دٚس نٚدأ و خوداوندٚم آخرپٚسی اونَ عأقبت بٚخیر بوکوده، چون خوداوند خٚیلی رحیم و مهروأنه.

¹² جٚه همه چی موهیمتر، هی زمأت قسم نوخورید، نه آسمأن و زیمینٚ و نه ده هیچی‌یَ. اگه گیدی "آها" شیمی گب رأس‌رأسِی آها بٚبه و اگه گیدی "نه"، شیمی منظور رأس‌رأسِی نه بٚبه تأ اَطویی شیمی جَا گونأ بیرون نأیٚه و موجأزأت نیبید.

دوعأ قودرت

¹³ شیمی میأن اگه اینفر درد و رنجٚ میأن ایسأ، دوعأ بوکونه. اوشأنی کی خوشألده، خوداوند وأسی شوکرگوزأری آوأزأنَ بٚخأند.

¹⁴ اگه اینفر نأخوش احوألٚ وأستی کیلیسا پیله کسأنٚ جَا بٚخأیٚه کی بأیٚد و اونٚ رِه دوعأ بوکوند، اونَ روغنٚ اَمرأ پأکٚ کونٚد و خوداوند جَا اونٚ رِه شفأ بخأیٚد

¹⁵ و او دوعأ کی ایمأن اَمرأ بٚبه، نأخوش احوألٚ آدمَ شفأ بخشه و خوداوند اونَ ویریزأنه. اگه‌یٚم گونأیی بوکوده بی، اونٚ رِه بٚبخشه به.

¹⁶ کس‌کسٚ ورجأ شیمی گونأیأنَ وأگویا بوکونید و کس‌کسٚ شفأ گیفتن رِه دوعأ بوکونید. عأدیلٚ مردأکٚ رأس‌رأسِی دوعأ، قودرت دأره و بأوٚر نوکودنی اَثر دأره.

¹⁷ ایلیا ایتأ اَمی مأنستَن‌ چی آدم بو. اَنٚ اَمرأ، هو زمأت کی تومأمٚ دیلٚ اَمرأ دوعأ بوکود کی وأرٚش نوکونه، سه سأل و نیمٚ رِه وأرٚش نوکود!

¹⁸ و هو زمأت دوعأ بوکود کی وأرٚش بٚوأره، وأرٚش وأرٚستٚن سٚر بیگیفت و زیمین مأصول بأوٚرٚد.

اَویرَ بوسته آدمٚ وأگردأنِن حِئقتٚ ور

¹⁹ جأنٚ دیلٚ برأرأن، اگه اینفر رأستٚ رأ جَا کجٚ بو و خو ایمأنَ جٚه دٚس بٚدأ، امّا اینفر اونَ یاور بٚده تأ حِئقتٚ ور وأگرده،

²⁰ اَ شخص کی اونٚ خودا ور وأگردٚستنَ بأعیث بوبوسته، بٚدأنه کی ایتأ اَویرَ بوسته جأنٚ همیشٚکی جٚه بین شؤئؤنٚ دٚسٚ جَا نیجأت بٚدأ و اونَ خٚیلی گونأیأنٚ بٚخشئنٚ بأعیث بوبوسته.