یعقوب 3 - Gilaki New Testament

زوأنٚ خطرأن

¹ می جأنٚ دیلٚ برأرأن و خأخورأن، اوشأنٚ تعداد نفرأن کی خأیده معلم بٚبٚد، خٚیلی نٚبه، چون دأنید، اَمٚرَه کی آمؤختٚندریم، دأوری کودنٚ رِه، خٚیلی ویشتر سخت گیرده.

² معلومٚه کی اَمأن همٚتأن، خٚیلی لغزش خوردنٚ گریفتأرَ بیمی. ولی اونی کی گب زِئنٚ دورون نٚلغزه، اون ایتأ کأمیلٚ آدمٚ و تأنه تومأمٚ خو وجودٚ موسلط بٚبه. اگه اینفر بتأنه خو زٚوأنٚ بٚدأره، قودرت دأره همه چی دورونم خؤرَه موسلط بٚبه.

³ ایتأ پیله اسبَ ایتأ کوجه دهنه اَمرأ رأمَ کونیم و اونَ هر ور کی بٚخائیم ببریم.

⁴ ایتأ کوجه سوکان، پیله کشتی‌یَ هر ور کی نأخودا بٚخأیٚه، هیدأیت کونه حتّا اگه توندٚ بأد بأیِه.

⁵ زوأنم جأنٚ دورون، ایتأ کوجه تیکه‌ ایسه ولی چی لأفی کی نٚزنه. ایتأ کوجه جرقّه تأنه ایتأ پیله جنگلَ وٚل بٚده.

⁶ زوأنم هوطو آتشٚ مأنه و ایتأ دونیأ دورُغٚ جأنٚ عُصم اعضأ میأن کی اونَ سٚر تأ پأیٚ کثیفٚ کونه و تومأمٚ اَمی زٚندیگی رأ دٚوأرٚستنٚ وٚل دِهه و خودشم جهندم آتشٚ دورون سوجه.

⁷ اینسأن بتأنسته همٚتأ وأشی حیوأن، پرنده، خزنده و دریأ موجودأنَ رأمٚ کونه و جٚه اَن پٚسی‌یٚم رأمٚ کونه.

⁸ ولی هیچ اینسأنی نتأنه زوأنٚ رأمٚ کونه. اون ایتأ پٚلیدی ایسه پورجونب و جوش و پریشأن و ایتأ کوشنده زهرٚ جَا پور ایسه.

⁹ اَمی زوأنٚ اَمرأ، خوداوند ینی اَمی پئرَ عیبأدت کونیم و هو زوأنٚ اَمرأیٚم اینسأنأنَ کی خودا شٚبأهت بوجود بأمؤدِیٚ، نیفرین کونیم.

¹⁰ هو دٚهٚنٚ جَا، هم برکت بیرون اَیِه و هم لعنت. می جأنٚ دیلٚ برأرأن و خأخورأن، نوأستی اَطو بٚبه.

¹¹ آیا ایمکأن دأره هو چشمه جَا هم شیرینٚ آب جوش بوکونه و هم شورٚ آب؟

¹² می جأنٚ دیلأن، آیا شأ اَنجیل دأره جَا زیتون چِئن؟ یا رٚزٚ جَا اَنجیل؟ شورٚ آبٚ چشمه‌یم، نتأنه شیرینٚ آب بیرون بأوٚره.

آسمأنی خیرٚد

¹³ آیا شیمی میأن حکیم و بٚفأمٚسته آدم ایسأ؟ پس وئألید خو دأنٚستٚن و فأمٚ، او زٚندیگی رأ روشٚ اَمرأ کی خودایٚ خوش اَیِه‌یٚ و او کردکأرأنی اَمرأ کی فروتنی جَا ویریزه، نیشأن بٚده، هو فروتنی و نرمٚ خُلق و خو کی، حیکمت و فأمٚ جَا بیرون اَیِه.

¹⁴ ولی اگه شیمی زٚندیگی دورون کینه و حیسأدت و خودخأیی نٚهأ، اَلکی عقل و خیرٚدٚ سنگٚ شیمی سینه‌یٚ نزنید کی اَن بدترین نُویٚ دورُغه،

¹⁵ چون هو خیرٚد و حیکمت دورون کی خودا بخشه، اَطو چی خرأبٚ صیفٚت وجود نأرِه بلکی اَشأن دونیأیی و غیرٚروحانی و شیطانی ایسٚد.

¹⁶ اَطویی، هر جأ کی حیسأدت و جأطلبی نٚهأ، هرج و مرج و هرجوردِه شرورٚ کأرأنم بٚچوم خوره.

¹⁷ ولی او حیکمت کی آسمأنٚ جَا بٚبه، اوّل جٚه همه، پأک و نجیبه، بعد صولحٚ دونبألٚ، مؤدب و آرأمٚ؛ البأقیأنٚ اَمرأ حأضیر ایسه بوگو بشتأو بوکونه و اَشأنٚ فیکرأنٚ قوبیل کونه، لبألب جٚه دیلسوجی و خورومٚ کأرأن بو، صمیمی، بی‌ریأ و بی‌پرده‌ ایسه.

¹⁸ اوشأنی کی صولحٚ دونبالٚد، صولحٚ دأنه‌یٚ کأرٚده و عیدألتٚ چینٚده.