یعقوب 2 - Gilaki New Testament

فرق نٚهنٚ جَا دوری کودن

¹ می جأنٚ دیلأن، چوطو تأنیدی ایدعأ بوکونید کی عیسا مسیح، او پورجلالٚ خوداوندٚ شین ایسید، اَسه اَنکی افرأدٚ میأن فرق نیهید؟

² فیکر بوکونید اینفر شیمی کیلیسا بأیٚه کی گیرأنٚ لیوأس دوکوده و طلأ انگوشترأن خو انگوشتأنٚ رو دأره و هو زمأتٚ رِه ایتأ فِقِرٚ آدم شندره پندٚره لیوأسٚ اَمرأیم بودورون بأیٚه

³ و شومأن او پولدأرٚ آدمَ ویشتر توجه بوکونید و بِیترین جأجیگأیأنَ اونَ تعأروف بٚزنید ولی او فِقِرٚ بیگید: «بوشو اویَه بئیس یا اگه خأیی زیمینٚ سٚر بینیش!»

⁴ آیا اَن نیشأن نٚده کی شومأن آدمأنٚ اَرزٚستٚنَ، اوشأنَ دأر و ندأرٚ اَمرأ دینیدی؟ آیا ایشتیوأ فیکرأنٚ اَمرأ اوشأنَ قیضأوت نوکودید؟

⁵ جأن و دیلٚ برأرأن و خأخورأن، مٚرَه گوش بدید: «خودا فِقِرٚ مردومَ اینتخأب بوکوده تأ ایمأنٚ دورون مألدأر بٚبٚد و خودا ملکوت جَا ایستفأده بوکونٚد، هو ملکوتی کی خودا اوشأنٚ وعده بٚده کی اونَ دوس دأرٚده.»

⁶ اَسه اَنکی شومأن فِقِرَ، کوچیک دأنیدی. آیا جٚه خأطر ببردید کی هه مأل و مینألدأرأنٚد کی شیمی حقٚ لقد دٚمٚج کودنٚ پٚسی شٚمٚره فأکٚشأنِده دادگأ میأن؟

⁷ اغلب هَشأنٚده کی عیسا مسیحَ کوفر گده ینی هو کسی کی اونَ شریفٚ نأم شیمی رو نٚهأ.

⁸ چندر خُب بو، کی همیشٚک اَ شأهأنه حوکمَ کی موقدسٚ کیتأبأنٚ دورون بأمؤ فرمأن ببردیبید کی فٚرمأیه: «تی همسأده‌یَ تی جأنٚ مأنستَن دوس بٚدأر.»

⁹ ولی وختی فرق نیهیدی، شریعتٚ اَ حوکمه لقد دٚمٚج کونید و اَطویی گونأ کودأندرید.

¹⁰ اونی کی خودا حوکمأنٚ همٚتأیَ موبٚمو انجأم دِهه، ولی ایتأ کوجه‌دأنه کأرٚ دورون ایشتیوأ بوکونه، اونٚ تقصیر او کسَ اَندر ایسه کی خودا حوکمأنٚ همه لقد دٚمٚج بوکوده.

¹¹ چون هو خودایی کی بٚفرمأسته: «زٚنأ نوکون» اَنٚم بوگفته کی «قتل نوکون». پس اگه زٚنأ نوکونید ولی قتل بوکونید، هرطور کی بٚبه خودا حوکمٚ جَا فرمأن نٚبردید و اونی ورجأ تقصیر کأریدی.

¹² پس اوشأنَ مأنستَن گب بٚزنید و کردکأر بوکونید کی اوشأنٚ رِه حوکمأنی اَمرأ دأوری به کی آزأدی اَوٚره.

¹³ چون اونی رِه کی اَ دونیأ دورون رحم نوکوده، رحم نیبه؛ ولی اگه مردومٚ اَمرأ مهرٚوأن بوبوسته بید، بأزون ایلاهی رحمت زور اونی دأوری سٚر بأش به.

ربط دأشتٚن ایمأن و کردکأر

¹⁴ می جأنٚ دیلأن، اینسأنٚ رِه چی فأیده دأره کی بٚگه: «من ایمأن دأرم» ولی اَ ایمأنٚ خو کردکأرٚ اَمرأ نیشأن نٚده؟ آیا اَطوچی ایمأن تأنه اونَ نیجأت بٚده؟

¹⁵ اگه برأر یا ایتأ خأخور بٚدأرید کی غذأ و لیوأسٚ رِه موحتأج بٚبه

¹⁶ و اونَ بیگید: «بوشو بٚسلأمت! خُب بوخور و تٚرَه گرم بٚدأر» ولی غذأ و لیوأس اونَ فأندید، چی فأیده دأره؟

¹⁷ پس دینیدی او ایمأن کی خیرٚ کأرأنٚ رِه بٚکأر نشه و خورومٚ کأرأنٚ اَمرأ نٚبه، اصلٚن ایمأن نییٚه بلکی پوچٚ موشتٚ مأنه.

¹⁸ اَ ایرأد دوروسته کی اگه اینفر بٚگه: «شومأن گیدی اونچی کی موهیم ایسه، فقد ایمأن ایسه و بس! ولی من گم خورومٚ کأرأنم موهیمٚده. چون شومأن بودونٚ خورومٚ کأرأن نتأنیدی ثأبیت بوکونید کی ایمأن دأریدی. ولی همٚتأن تأنیدی جٚه می کردکأرأن بیدینٚد، بیدینٚد کی ایمأن دأرم.»

¹⁹ ایمکأن دأره اینفر بٚگه: «من ایمأن دأرم کی خودا ایتأ ایسه!» اَن خُبه! ولی اَطوچی آدمٚم وأستی بٚخأطر بٚدأره کی دیوأنٚم اَنَ ایمأن دأرٚده، اوطوچی ایمأنی کی زهله جَا پرکٚده!

²⁰ اَی بی‌عقل! آیا نخأیی بٚفأمی کی ایمأن بی‌اَنکی خودا ایرأده انجأم بٚبه، فأیده و نتیجه نأرِه؟ دوروسته، او ایمأن کی خورومٚ کأرأن بٚبأر نأوٚره، رأس‌رأسِی ایمأن نییٚه.

²¹ مگه بٚخأطر نأرید کی اَمی جد ایبرأهیم هم خو کردکأرأنٚ وأسی خودا ورجأ قوبیل بوبوسته؟ چون اون حأضیرَ بوست کی خو پٚسر ایسحأقَ خودا رِه قوربأنی بوکونه.

²² پس دینید او ایمأنی کی خودایَ دأشتی، وأئأشت کی تومأم و کمأل خودا جَا ایطأعت بوکونه؛ اَطویی، اونی ایمأن اونٚ کردکأرٚ اَمرأ کأمیلَ بوسته.

²³ اَطویی، اونچی کی موقدسٚ کیتأبأنٚ دورون بأمؤ انجأم بوبوسته کی فٚرمأیه: «ایبرأهیم خودایٚ ایمأن بأوٚرٚد و اَن اونی رِه عیدألت بٚحیسأب بأمؤ» و حتّا خودا ریفِق نأم بٚنأ بوبوست.

²⁴ پس دینید کی اینسأن جغرز ایمأن خو کردکأرأنٚ اَمرأ هم نیجأت یأفه.

²⁵ راحابم کی خرأب دأشتی ایتأ ده هطوچی مثأل اَ موضو رو ایسه. اون خو کردکأرأنٚ اَمرأ نیجأت بیأفت، چون خودا قومٚ مأمورأنٚ جیگأ بٚدأ و بأزین، اَشأنٚ جٚه دِه ایتأ رأ سلأمتی اَمرأ اوسه کوده.

²⁶ اَطویی، هوطو کی جأن بی‌روح بٚمٚرده ایسه، ایمأنی‌یم کی خورومٚ کأرأن بٚبأر نأوٚره، بٚمٚرده ایسه.