یعقوب 1 - Gilaki New Testament

¹ جٚه یعقوب، خودا و خوداوند عیسا مسیحٚ غولأم، او دوأزده‌تأ قبیله رِه، ینی یوهودی نتأجٚ ایمأندأرأن کی دونیأ سرتأسرٚ شرأ پٚخشٚده. سلأم!

سختیأنٚ دورون شأد بوستن

² جأنٚ دیلٚ برأرأن و خأخورأن، وختی دوشوأریأن و سخت ایمتٚحأنأن جٚه هر ور شٚمٚره فوتورکٚده، خٚیلی شأد بیبید،

³ چون ایمتحأن و دوشوأریأنٚ دورون شیمی صبر و تحمول ویشترٚ به.

⁴ پس وئألید شیمی صبر و تحمول بوجؤر بشه و کأر خؤرَه تومأم و کأمیلَ کونه، چون اَطویی کأمیل و بالیغٚ آدمأن بید و هیچی دِه ایحتیأج نأرید.

⁵ ولی اگه اینفر جٚه شومأن خودا ایرأده درک کودنٚ رِه حیکمت و فأم بٚخأیٚه وأستی اونَ خودا جَا بٚخأیٚه جٚه او خودایی کی دٚس و دیلوأزی اَمرأ اونَ فأدَه، بی‌اَنکی آدمَ ملأمت بوکونه، و اونَ فأدأ به.

⁶ ولی وختی اونی جَا درخأست کونید، اونٚ رِه شک اونسأنید، بلکی یقین بٚدأرید کی خودا شیمی دوعأ جوأبٚ دِهه، چون اونی کی شک کونه دریأ موجٚ مأنه کی بأدٚ اَمرأ اَسر اوسر شِه.

^7-8 اَطوچی آدم سوسته و هیوخت نتأنه قأیم تصمیم بیگیره. پس اگه ایمأنٚ اَمرأ دوعأ نوکونید، خودا جوأب دئنٚ رأفأ هم نئیسید.

⁹ او ایماندأرأنی کی اَ دونیأ مأل و مینألٚ جَا هیچی نأرٚده، نوأستی خوشأنَ خأر بدأنٚد، بلکی وأستی او بوجؤرٚ جأجیگأ وأسی کی خودا اَشأنَ فأدأ، گولأز بوکوند.

¹⁰ اَسه اَنکی مأل و مینألدأرأنٚ وأستی خوشأنی حیقأرت و خأری رِه گولأز بوکونٚد، چٚره کی صأرأ گولٚ مأنستَن جٚه بین شٚده.

¹¹ چونکی آفتأب خو وٚل بیگیفته گرمأ اَمرأ اَیِه و او گولأنٚ خوشکٚ کونه. اونٚ زٚپّه هم کفه و اونٚ قشنگی جٚه بین شِه. اَطویی ایسه کی مأل و مینألدأرأنٚم هوطویی کی تیجأرتٚ رِه موشغولٚد جٚه بین شٚده و محوٚ بٚده.

¹² خوشبحألٚ اونی کی زٚندیگی سختٚ ایمتحأنأنَ تحمول بوکونه، چون وختی کی اَ ایمتحأنأنٚ جَا خو سٚرٚ رأستَ گیره، خوداوند همیشٚکی زٚندیگی تأجٚ اونَ فأدَه، هو تأج کی تومأمٚ او کسأنی کی اونَ دوس دأرده‌یٚ وعده بٚدأ.

¹³ وختی اینفر فیتٚ بوسته، گونأ ور فأکٚشی به، خؤرَه گومأن نوکونه کی خودا اونٚ فیتٚ کونه، چون خودا گونأ و بدی جَا دؤر ایسأ و هیکسٚم اونٚ انجأم دئنٚ رِه فیتٚ نوکونه.

¹⁴ فیتٚ بوستن اَمی هوسأنٚ جَا بیرون اَیِه کی اَمٚرَه گول زٚنِه و بٚدأم تأوٚده.

¹⁵ اَجور فیکرأن و مِیلأن وختی جمَ بٚه، گونأ اونٚ جَا بیرون اَیِه. گونأیٚم وختی پیله بٚه، مرگ اونی جَا بیرون اَیِه.

¹⁶ پس ای جأنٚ دیلٚ ایمأندأرأن، اَویرَ نیبید.

¹⁷ جٚه خودا ور فقد خوروم و کأمیلٚ چیزأن اَمٚرَه فأرٚسِه، اونی جَا کی تومأمٚ نورأنٚ خألیق ایسه و سأیه دیمه مأنستَن نییٚه کی اَرأ اورأ بشه و تغییر نوکونه.

¹⁸ اون اَطو ایرأده بوکوده کی اَمٚرَه حِئقتٚ کلامٚ ینی اینجیلٚ پیغأمٚ اَمرأ تأزه زٚندیگی بٚبخشه کی اَمأن اونی خلق بوبوسته‌یأنٚ نوبری بیبیم.

خودا کلامَ انجأم دئن

¹⁹ پس اَی می جأنٚ دیلأن، هرتأ جٚه شومأن ایشتأوٚستٚنٚ میأن توند، گب زِئن میأن کونٚد و برزخٚ بوستنٚ میأن سوست بٚبه.

²⁰ چونکی اینسأنٚ غضب ولأنه خودا عیدألت انجأم بٚبه.

²¹ اَنٚ وأسی، هرتأ نٚجٚستٚ اخلاق و هرتأ شرورٚ کأرأنٚ جَا شٚمٚره دورَ کونید و فروتنی اَمرأ او کلامی کی خودا شیمی دیلٚ دورون بکأشته‌یٚ، قوبیل بوکونید؛ چون اَ کلام قوّت دأره شیمی جأنأنَ نیجأت بٚده.

²² ولی جٚه خأطرٚ ندید کی اَ کلامٚ نوأستی فقد ایشتأوٚستٚن، بلکی وأستی اونَ انجأم دئن. پس شٚمٚره گول نزنید،

²³ چون اونی کی فقد کلامٚ ایشتأوه ولی اونَ انجأم نٚده، اونَ مأنه کی خو دیمٚ آینه دورون فأندٚره،

²⁴ ولی هطو کی آینه جَا دورَ به خو قیافه‌یَ جٚه خأطرٚ ده.

²⁵ ولی اونی کی خودا کلامَ، کی بشرٚ آزأدی رِه کأمیلٚ قأنون ایسه، توجه بٚدأره، نه فقد اونَ همیشٚک بٚخأطر دأره، بلکی اونَ فرمأنم بٚره و خودا اونَ فرمأن بردنٚ برکت دِهه.

²⁶ هرکی خؤرَه مسیحی بٚدأنه، ولی نتأنِه خو توندٚ زٚوأنٚ بٚدأره، خؤرَه گول زِئندره و اونی مذهب هیذره نی اَرزِه.

²⁷ خودای پئرٚ چومٚ میأن او مسیحی بی‌عأیب و پأک ایسه کی یتیمٚ زأکأن و ویوه زنأکأنَ یاور بٚدأ و خوداوندٚ رِه وفأ کونه و خؤرَه دونیأ پٚلیدیأنٚ جَا دؤر دأره.