عبرأنیأن 9 - Gilaki New Testamentقدیمٚ عیبأدتی مرأسیم 1 هر جور بٚبه، او اوّلی قول و قرأر کی خودا ایسرأییلٚ قومٚ اَمرأ دٚوٚستٚه، عیبأدتٚ رِه قأنون، و پرستٚشٚ رِه جأجیگأ دأشتی. اَ پرستٚشٚ جأجیگأ، ایتأ چأدر بو کی اینسأنٚ دٚسٚ اَمرأ چأکوده بوبوسته. 2 اَ چأدر جٚه دو تیکه چأکوده بوستی. ایوٚرٚ میأن کی «موقدسٚ جأجیگأ» نأم دأشتی، طلأیی شمدأن، میز و نأنٚ حوضور بٚنأ بوستی. 3 دویُمی ور، «موقدس‌ترین جأجیگأ» دؤخأده بوستی و ایتأ پرده اونَ اوّلی ورٚ، جَا سیوأ وأکودی. 4 اَ جأجیگأ میأن، ایتأ طلأیی آتش‌دأن و عهدٚ صوندوق نٚهأ بو. اَ صوندوقٚ دورون و بیرون، خألصٚ طلأ اَمرأ رو بیگیفته بوبوسته بو. صوندوقٚ دورون، دوتأ پأنه سنگ نٚهأ بو کی اوشأنی رو خودا ده‌تأ فرمأن بتأشته بوبوسته بو. ایتأ طلأیی ظرفم پور جٚه «مَنّا»، او صوندوقٚ دورون نٚهأ بو. «مَنّا» هو نأنی ایسه کی خودا هر روج بیأبأنٚ میأن بنی‌ایسرأییلَ فأدأیی. هطویم، هارونٚ دٚسٚ‌چو کی ای زمأت گولٚ زٚپّه بٚزِه بو، اَ صوندوقٚ دورون بٚنأ بوبوسته بو. 5 عهدٚ صوندوقٚ سٚرپوش، رحمتٚ تخت، دؤخأده بوستی، خودا پورجلالٚ نیگهبأنٚ فٚرٚشته‌یأن خوشأنی بألأنَ تختٚ رو پهنأ کوده بود. تومأمٚ اَشأن، خوشأنی رِه مأنی مٚفوم دأرٚده کی اَسه وخت نییٚه جٚه اوشأن گب بٚزٚنم. 6 وختی اَ چیزأن اَطو دیچه بِه، کأهینأن خوشأنی وظیفه‌یأنٚ انجأم دٚئنٚ رِه، هطو تترج شٚده عیبأدتٚ جیگأ اوّلی قیسمتٚ دورون. 7 ولی اویتأ تیکه میأن، فقد پیله کأهین تأنه بشه بودورون، اونم فقد ایوأر، سألٚ میأن! اون خو اَمرأ ایپچه جٚه قوربأنی خونَ بردی بودورون و رحمتٚ تختٚ سٚر پأشأنه‌یی، کی خو گونأیأن و ایسرأییلٚ قومٚ گونأیأنٚ رِه کفأره بوکونه. 8 ولی روح‌القدس جٚه تومأمٚ اَشأن، اَمٚرَه آموجه کی شریعتٚ قدیمٚ رأ روشٚ موطأبٚق، او زمأت کی عیبأدتٚ جیگأ اوّلی ور پأبرجأیه، معمولی مردوم هیوخت نٚتأنٚده بٚشٚد او موقدس‌ترین جأجیگأ دورون. 9 اَن اَسه هه زمأتَ نیشأن دِهه. چونکی پیشکشأن و قوربأنیأنٚ کی کأهین فأدِه، نتأنِه او عیبأدت کودن کسٚ ویجدأنَ کأمیل پأکَ کونه. 10 چونکی اَ شریعت فقد ظأهیری مرأسیمأنٚ اَمرأ سٚر و کأر دأره و خوردن و وأخوردن و غوسل و بوشؤر وأشور و اَجور چیزأنٚ رِه موشغوله. اَ مرأسیمأن فقد او بِیتره رأ روشٚ، فأرٚسِئنٚ وخت رِه قأبیل انجأم دٚئن بو. مسیح ایتأ کأمیلٚ قوربأنی ایسه 11 بأزین، مسیح او خورومٚ کأرأنٚ پیله کأهینٚ مأنستَن ایسه کی اَسه انجأم بوبوسته. اون بوشؤ آسمأنٚ کأمیلتر و پیله‌تره چأدرٚ دورون، ایتأ چأدر کی نه اینسأنٚ دٚسٚ اَمرأ بٚسأخته بوبوسته و نه اَ دونیأ رِه کی خلق بوبوسته. 12 اون ایوأر همیشٚکٚ رِه بوشؤ او موقدس‌ترین جأجیگأ دورون و قوربأنی خونَ فوکوده رحمتٚ تختٚ سٚر، ولی بوز و مأنٚده خون نه، بلکی خو خونَ، کی اونی اَمرأ اَمی همیشٚکی نیجأتَ چأکوده. 13 موسا شریعتٚ موطأبٚق، کأهینأن بوزأن و ورزأیأن و مأنده‌یأنٚ خأکسترَ، اوشأنی سٚر کی رسم و روسومأن گفتیدی نٚجٚستٚ بوسته بود، پأشأنٚه‌ییدی، کی اَشأنٚ جأن پأکَ بٚه. 14 پس بیدینید چندر ویشتر، مسیحٚ خون اَمی ویجدأنَ جٚه کأرأنی کی مٚردنٚ ور شؤیی، پأکَ کونِه کی بتأنیم زٚنده خودایَ خیدمت و عیبأدت بوکونیم. چونکی مسیح، خودا همیشٚکی روحٚ اَمرأ، خؤرَه بی‌عأیب، خودایٚ تقدیم بوکود. 15 اَطویی، مسیح اَ تأزه قرأرٚ اَمرأ بأمؤ کی تومأمٚ اوشأنی کی جٚه خودا ور دعوت بوبوستده، بتأنٚد بأیٚد اونی ور، همیشٚکی برکتأنَ کی خودا وعده بدأبو، فأگیرد؛ چونکی مسیح اوشأنٚ گونأیأنٚ وأسی فٚدأ بوبوسته کی اوشأنَ، گونأیأنٚ موجأزأتٚ جَا کی قدیمٚ شریعتٚ زمأتٚ میأن بوکودٚده، آزأدَ کونٚه. 16 ای زمأت کی ایتأ وصیت اینفرٚ جَا بأقی مأنه، پیشتر جٚه اَنکی ارث سأم بٚبه، وأستی اوّل بیرون بأیٚه کی اونی کی وصیت بوکوده بٚمٚرده یا زٚنده‌یه. 17 ایجور دِه شأ گفتن، وصیت نأمچه فقد وصیت بوکوده کسٚ مٚردنٚ پٚسی ارزش دأره، و تأ او زمأت کی اون زٚنده‌یه، هیتأ جٚه اونی وأرثأن نٚتأنٚده خوشأنی سأمَ فأگیرد. 18 هنٚ وأسی، پیشتر جٚه اَنکی قدیمی قول و قرأر بٚخأیٚه انجأم بٚبه، مسیحٚ جأن فأدأنٚ نیشأنٚ دٚئنٚ وأسی، خون بٚپأشأنِه بوبوسته. 19 پس اَطو کی موسا اوّل تومأمٚ خودا حوکمأنَ ایسرأییلٚ قومٚ رِه وأگویا بوکوده؛ بأزون مأنده‌یأن و بوزأنٚ خونَ اوسأده و آب و زوفا و سورخٚ پشمٚ اَمرأ، خودا حوکمأنٚ کیتأبٚ رو و مردومٚ سٚر فوکوده، 20 و بوگفته: «اَن او عهدٚ خون ایسه کی خودا فأدأ و خأیه اونی جَا فرمأن ببرید.» 21 بأزون هوطویی، موقدسٚ چأدرٚ سٚر و تومأمٚ هرچی کی عیبأدتٚ مرأسیمٚ میأن بٚکأر شؤیی سٚر، خون بٚپأشأنِه. 22 اَطویی شأ گفتن اوّلی قول و قرأر مأنستَن، تقریبٚن همه چی خونٚ اَمرأ پأکَ بٚه و بودونٚ اَنکی خونی فٚوٚه، هیتأ گونأ بٚبخشه نیبه. 23 هنٚ وأسی، او موقدسٚ چأدر کی زیمینٚ شینه و اونی همٚتأ چیزأن، کی ایتأ نومونه و ایتأ سأیه جٚه آسمأنی چیزأن بود، وأستی حیوأنأنٚ خونٚ اَمرأ پأکَ بٚه، ولی اوشأنٚ اصل آسمأنٚ میأن نٚهأ، او قوربأنیأنٚ اَمرأ کی جٚه اَشأن بِیترده. 24 چونکی مسیح نوشؤ او عیبأدتٚ جیگأ دورون کی اینسأنٚ دٚسٚ اَمرأ چأکوده بوبوسته بو کی فقد ایتأ او آسمأنٚ رأس‌رأسِی عیبأدتٚ جیگأ مأنستَن بو، بلکی بوشؤ هو آسمأنٚ دورون کی اَسه جٚه اَمی ور خودا ورجأ ظأهیرَ بٚه. 25 هنٚم بٚگم کی، اون خؤرَه چن‌وأر قوربأنی نوکوده؛ پیله کأهینٚ کأرٚ مأنستَن کی زیمینٚ سٚر کونِه انجأم نٚدأ؛ چونکی پیله کأهین همٚتأ سألٚ رِه قوربأنی حیوأنأنٚ خونَ موقدس‌ترین جأجیگأ دورون پیشکش کونه. 26 اگه اَطوچی لأزیم بوستی، مسیح وأستی جٚه اوّلٚ دونیأ تأ اَسه دائیم خو جأنَ فٚدأ بوکونه. ولی اَطو نییٚه. مسیح ایوأر و همیشٚکٚ رِه دونیأ آخر آخرأنٚ میأن بأمؤ کی خو جأنَ اَمِرِه فٚدأ بوکونه و گونأ قوّتَ همیشٚکٚ رِه جٚه ریشه خوشکَ کونه. 27 اَن ایتأ نیشأن جٚه هه زمأت ایسه کی اونی میأن، پیشکشأن و قوربأنیأنی تقدیم به کی نتأنه عیبأدت کودن کسٚ ویجدأنَ کأمیل پأکَ کونه، و تومأم هوطو کی خوداوندٚ حوکمٚ اَمرأ، اینسأن ایوأر میرِه و اونٚ پٚسی دأوری نوبت فأرٚسِه، 28 مسیحم فقد ایوأر خو جأنَ فٚدأ بوکوده کی ایتأ قوربأنی عوض، خٚیلیأنٚ گونأیأنَ پأکَ کونٚه. ولی ایوأردِه اَیِه کی، اوشأنی‌یَ کی اونی وأسی صبر و شوقٚ اَمرأ رأفأ ایسأده، نیجأت بٚبخشه. |
© 2024 Transform Iran
Transform Iran