عبرأنیأن 4 - Gilaki New Testament

حق و سعی زِئن خودا آسأیشَ دسرسی دأشتٚنٚ رِه

¹ اَسه، اَنٚ اَمرأ کی خودا وعده اونی آسأیشٚ بودورون شؤئؤنٚ وأسی هنو خو قوّتٚ رو نٚهأ، وأستی ترسٚ جَا زهله بوکونیم، نوکونه ایوخت معلوم بٚبه کی اینفر جٚه شیمی میأن اونی فأگیفتنٚ جَا کوتأ بأمؤ بی.

² چون هو خورم خٚوٚر- ینی اونی آسأیشٚ بودورون شؤئؤن – اَمِرِه‌یٚم وأگویا بوبوسته، هوطویی کی اوشأنٚ رِه وأگویا بوبوسته بو، ولی اوشأنٚ رِه هیذره فأیده نوکوده، چٚره کی اوشأنی ایمأنٚ اَمرأ کی فرمأن ببرده بود، شیریک نوبوستٚد.

³ فقد اَمأن کی ایمأن دأریم، تأنیم او آسأیشٚ دورون بیشیم، هوطو کی خودا بٚفرمأسته: «پس می توندی دورون قسم بوخوردم کی می آسأیشٚ هی‌ زمأت بودورون نٚشٚده.»اَسه کی، اونی کأرأن جٚه دونیأ بوجود اَمؤنٚ زمأت، تومأنَ بوسته بو.

⁴ چون موقدسٚ کیتأبأنٚ دورون، ای جأ دروأره‌یٚ هفتومی روج اَطو بأمؤ کی: «خودا هفتومی روجٚ میأن، تومأمٚ خو کأرأنٚ جَا آرأمی بیگیفته.»

⁵ ولی وأزم بوجؤری آیه‌یأنٚ میأن فٚرمأیه: «می آسأیشَ هی‌ زمأت نٚتأنٚده بودورون بٚشٚد.»

⁶ بأزون، مردوم تأنٚده خودا آسأیشٚ دورون بٚشٚد، ولی اوشأنی کی پیشتر اَ خورومٚ خٚوٚرَ فأگیفته بود، نأفرمأنی وأسی بودورون نوشؤده.

⁷ هنٚ وأسی، خودا ایتأ دِه زمأت تعیین بوکوده، و اونَ «ایمرو» نأم بٚنأ. اون اَنَ خٚیلی سالأنٚ پٚسی، جٚه داوود زوأن بوگفته، بٚفرمأسته: «اگه ایمرو خودا صدایَ ایشتأویدی، شیمی دیلَ سختَ نوکونید» کی خودا اَ گبأن بوجؤرٚ خطّأنٚ میأنم وأگویا بوبوسته.

⁸ چون اگه یوشع او زمأت کی ایسرأییلٚ قومَ کنعانٚ سرزیمینَ دورون، بردأندوبو، بتأنسته بی کی اَ آسأیشَ اوشأنَ فأدٚه، دِه لأزیم نوبوستی خودا خٚیلی زمأتٚ پٚسی، دروأره‌یٚ ایتأ دِه روج آسأیش فأدأنٚ وأسی گب بٚزٚنه.

⁹ پس خودا قومٚ رِه شَبّأتٚ روجٚ آسأیش بأقی مأنه. اَ موضو جَا فأمیم کی ایتأ فورصت ایسترأحت و کأمیلٚ آرأمٚشٚ وأسی، ای جیگأ خودا قومٚ رِه ینی اَمی رأفأ ایسأ.

¹⁰ چون تومأمٚ اوشأنی کی خودا آسأیشٚ دورون بوشؤده، اَشأنٚم خوشأنی زحمتأنٚ جَا آسوده بوبوستٚد، هوطویی کی خودا، خلقتٚ کأرٚ تومأنٚ کودنٚ پٚسی، آرامی بیگیفته.

¹¹ پس اَمأنٚم تومأمٚ اَمی حقٚ سعی‌یَ بٚزنیم کی خودا او آسأیش دورون بیشیم، نوکونه کی بنی‌ایسرأییلٚ مأنستَن، فرمأن نبردنٚ وأسی جٚه اونی بودورون شؤئؤن، محرومٚ بیم.

¹² چون خودا کلام زٚنده و پورقودرت و هرتأ تیج و دولبه شٚمشیرٚ جَا ویشتر وأوینه، جوری اَثر کونه کی حتّا جأن و روح، و مفصلأن و خأشٚ مغزَ، جٚه هم سیوأ وأکونِه، و اینسأنٚ فیکرأن و دیلٚ جولفٚ جیگأ‌یأنَ وأشکأفأنه.

¹³ هر جأ کی بیئسیم، خودا اَمٚرَه دأنه دأنه شنأسه؛ زٚنده خودا تیجٚ چومأن، اَمأن همٚتأیَ هوطویی کی ایسیم دینه. هیچی وجود نأرِه کی جٚه خودا چومأن جیگأ بوخورده بمأنه، و اَمأن وأستی، آخرپٚسی، اونَ، حیسأب پس فأدیم.

عیسا مسیح، اَمی پیله کأهین

¹⁴ پس اَسه کی، ایتأ پیله کأهین دأریم کی آسمأنأنٚ جَا دٚوأرٚسته، ینی عیسا، خودا پٚسر، بأیید او ایمأنی‌یَ کی ایعترأف کونیمَ، قأیم بٚدأریم.

¹⁵ اَ پیله کأهین اَمی ضعفأنٚ جَا بی‌خٚوٚر نییٚه، چون اون خودش، هه کأرٚ میأن وسوسه بوبوسته، ولی هیوخت زانو نٚزِه و گونأ نوکوده.

¹⁶ پس بأیید ایطمینأنٚ اَمرأ، بیشیم خودا پور فیضٚ تختٚ ورجأ، کی اون خو رحمتَ اَمٚرَه فأدٚه و خو لوطفٚ اَمرأ، اَمٚرَه او زمأت کی ایحتیأج دأریم کومک بوکونٚه.