عبرأنیأن 3 - Gilaki New Testament

مسیح موقأم جٚه موسا بوجؤرتره

¹ پس اَی جأنٚ دیلٚ برأرأن و خأخورأن، اَی سیوأ وأکوده‌یأن و خودا دؤجین بوبوسته‌یأن کی آسمأنٚ فأرٚسِئنٚ رِه دعوت بوبوستیدی، بأیید دروأره‌یٚ عیسا فیکر بوکونیم، او کسی‌یَ کی ایعترأف کونیم خودا روسول و اَمی پیله کأهینه.

² عیسا، خودایَ، کی اونَ اَ موقأمٚ سٚر بٚنأ، وفأ بوکوده، هوطو کی موسا تومأمٚ خودا خأنه کأرأنٚ دورون، وفأ کودنٚ اَمرأ خیدمت بوکوده.

³ ولی عیسا، چندر ویشتر جٚه موسا، ایحترأم و جلال دأشتی، هوطو کی اونی کی خأنه‌یَ چأکونه حورمت، خودٚ خأنه جَا ویشتره.

⁴ هطویم، هرتأ خأنه اینفرٚ دٚسٚ اَمرأ بوجؤر شِه، ولی فقد خودا ایسه کی همه چی‌یَ بوجود اَوٚره.

⁵ موسا همٚتأ کأرأنٚ دورون خودا خأنه‌یَ وفأ کودنٚ اَمرأ خیدمت بوکوده، ولی اون فقد ایتأ خیدمتگوزأر بو؛ و جٚه اوّل اونی کأر ویشتر، گووأ دٚئن دروأره‌یٚ او کأرأنی بو کی وأستی خودا اوشأنٚ پٚسی گب بٚزٚنه.

⁶ ولی مسیح «پٚسرٚ» موقأمٚ میأن ایسأ کی تومأمٚ خودا خأنه‌ ایختیأرَ دأره. و اَ «خأنه» اَمأن ایمأندأرأن ایسیم، اَ شرطٚ اَمرأ کی اَمی جورأتَ بٚدأریم و او اومیدٚ دورون کی در مسیح دأریم، پأبرجأ و قأیم بیئسیم.

⁷ هنٚ وأسی ایسه کی روح‌القدس اَمٚرَه وأخٚوٚرَ کونه، فٚرمأیه: «اگه ایمرو خودا صدایَ ایشتأویدی،

⁸ شیمی دیلَ سختَ نوکونید، هو کأری کی شیمی پیله بأبأیأن خوشأنی یاغیگیری زمأتٚ رِه بوکودٚده، و بیأبأنٚ دورون مٚرَه ایمتحأن بوکودٚده.

⁹ اویَه، شیمی پیله بأبأیأن، چهل سأل می کأرأنَ بیدِه بود ولی بأزم می صبرَ آزمأیش و ایمتحأن بوکودٚده.

¹⁰ هنٚ وأسی او نتأجٚ جَا برزخَ بوستم و بوگفتم: "اَشأنی دیل دأیم می جَا وأگرده و دِه می فرمأنَ نٚبرده."

¹¹ پس می توندی میأن قسم بوخوردم کی دِه هیذره می آسأیشٚ دورون رأ نیافٚده.»

¹² پس اَی جأنٚ برأرأن و خأخورأن، بٚپأیید کی ایتأ جٚه شومأن گونأکأرٚ دیل و بی‌ایمأنٚ دیل نأشتی بی، کی اونَ زٚنده خودا جَا دورَ کونه.

¹³ بلکی هر روج، تأ او زمأت کی هنو، «ایمرو» دؤخأده به، کس‌کسَ تِشویق بوکونید، نوکونه کی هیتأ جٚه شومأن گونأ گولَ بوخوره و اونی دیل سنگَ بٚه.

¹⁴ چون اگه تأ آخرپٚسی وفأ بوکونیم و اَمی ایمأنٚ اوّلی روجأنٚ مأنستَن، اَمی ایعتمأدَ خودایَ قأیم بٚدأریم، بأزون مسیحٚ جلالٚ دورون سأم بریم.

¹⁵ و موقدسٚ کیتأبأنٚ اَ وأخٚوٚر کودنَ جٚه خأطرٚ نٚبٚرید، کی فٚرمأیه: «اگه ایمرو خودا صدایَ ایشتأویدی، شیمی دیلَ سختَ نوکونید، هو کأری کی شیمی پیله بأبأیأن خوشأنٚ یاغیگیری زمأتٚ رِه بوکودٚد.»

¹⁶ دأنیدی اوشأنی کی خودا صدایَ بشتأوستٚده و یاغیگیری بوکودٚد، کیأن بود؟ آیا هوشأنی نوبود کی موسا هیدأیت کودنٚ اَمرأ، مصرٚ جَا بیرون بأمؤد؟

¹⁷ دأنیدی کیأن بود کی چهل سألٚ زمأت، خودایَ برزخَ کودأندوبود؟ مگه هوشأنی نوبود کی گونأ بوکودٚد و بأزین، اوشأنٚ جنأزه بیأبأنٚ دورون بٚکٚفت و جٚه میأن بوشؤ؟

¹⁸ و خودا کیأنٚ وأسی قسم بوخورد و بوگفته کی هیذره اونی آسأیشٚ دورون نٚشٚده؟ مگه دروأره‌یٚ هوشأن نوبو کی اونی جَا نأفرمأنی بوکوده بود؟

¹⁹ پس دینیم کی بی‌ایمأنی وأسی نتأنٚستٚده بودورون بٚشٚد.