عبرأنیأن 10 - Gilaki New Testamentمسیح خون، گونأیَ حتم پأکَ کونِه 1 موسا شریعت و اونی مذهبی رسم و روسومأن، فقد ایتأ شیکل و شمأیل و محوٚ سأیه ایسٚه جٚه او خورومٚ کأرأنی کی وأستی مسیح اَمِرِه سوغأت بأوٚره، ولی اوشأنٚ رأس‌رأسِی شیکل و شمأیل نییٚه. هنٚ وأسی، اَطوچی شریعت نتأنِه هو سأل بٚسأل تترج قوربأنیأنٚ اَمرأ، اوشأنی‌یَ کی عیبأدتٚ وأسی خودا ورجأ اَیٚده، کأمیلَ کونٚه. 2 چونکی اگه قودرت بدأشته بی اَ کأرَ بوکونٚه، ایتأ قوربأنی وٚست بو کی عیبأدت کودن کس، ایوأر همیشٚکٚ رِه، پأک بٚبه و دِه هیذره فیکر نوکونه کی تقصیر کأره و گونأ بوکوده. 3 اوطویی کی دینیم اَ همٚتأ سألٚ قوربأنیأن، مردومٚ ویجدأنَ آرأمَ کودنٚ عوض، گونأ کودن و فرمأن نبردنٚ زرخٚ خأطره‌یَ اوشأنَ بٚخأطر اَوٚره. 4 چونکی ایمکأن نأرِه گأبأن و بوزأنٚ خون، رأس‌رأسِی گونأ مأله‌یَ پأکَ کونٚه. 5 هنٚ وأسی بو کی وختی مسیح اَمؤندوبو اَ دونیأ دورون، بوگفته: «تو قوربأنی و پیشکشی رِه ریغبٚت نأشتی؛ بلکی ایتأ جأن مِرِه آمأدَه کودی؛ 6 جٚه سوجأنئنی قوربأنی و گونأ قوربأنی رأضی نیبی. 7 بأزون بوگفتم: "اَسه اَیٚم کی تی خأستَ، اَی خودا، انجأم بدم؛ هوطو کی کیتأبٚ دورون می جَا بینیویشته بوبوسته."» 8 مسیح اوّل بٚفرمأست: «تو قوربأنی، پیشکشی، سوجأنئنی قوربأنی و گونأ قوربأنی رِه ریغبٚت نأشتی و تٚرَه اوشأنی جَا خوش نأمؤیی» (اگه چی اَشأنَ شریعتٚ پأکأرٚ سٚر تقدیم کودیدی). 9 و بأزین بٚفرمأسته: «اَسه اَیٚم کی تی خأسته‌یَ، اَی خودا، انجأم بدم.» اَطویی، سأبٚقٚ عهدَ بأطیلَ کونِه کی دویُمی عهدٚ پأکأرَ بٚنه. 10 هوطو اَ عهد و تأزه رأ روش مأنستَن، عیسا ایوأردِه خو جأنَ اَمی وأسی فٚدأ کونِه کی اَمٚرَه بٚبخشه و پأکَ کونه. 11 شریعت و سأبٚقٚ عهدٚ موطأبٚق، کأهینأن هر روج مذبح جولو بٚپأ ایسٚده و قوربأنیأنی‌یَ تقدیم کونٚده کی هیوخت نتأنِه گونأیأنَ جٚه بین ببره. 12 ولی مسیح فقد خؤرَه ایوأر قوربأنی مأنستَن خودایَ تقدیم بوکوده کی گونأیأنَ بیأمؤرزه؛ و بأزون، عیزت و گولأز کودنٚ جأجیگأ بوجؤر بوجؤرأن، خودا رأستٚ ور بینیشته، 13 و رأفأ ایسأ کی اونی دوشمنأن اونی پأ جیر تأودأ بٚبٚد. 14 اون ایتأ قوربأنی اَمرأ، همه‌یٚ اوشأنی‌یَ کی خوشأنی گونأیأنٚ جَا پأکَ بٚده، همیشٚکٚ رِه کأمیلَ کونِه. 15 روح‌القدسٚم گووأ دِهه کی اَن رأسته، فٚرمأیه: 16 «اَن هو عهد ایسه کی او روجٚ میأن اَشأنٚ اَمرأ دٚوٚدٚم: می حوکمأنَ اَشأنٚ دیلٚ دورون نٚهٚم و اَشأنٚ فیکر دورونی نیویسٚم.» 17 بأزون ایدأمه بٚدأ، بٚفرمأسته: «اَشأنٚ خطأ کأری‌یَ بٚخشم و اوشأنی گونأیأنَ دِه بٚخأطر نأوٚرٚم.» 18 پس اَسه کی اَمی گونأیأن همیشٚکٚ رِه بٚبخشه و جٚه خأطرَ شؤ، دِه چی نیأزی ایسٚه کی گونأیأنٚ آمؤرزئنٚ رِه، ایوأردِه قوربأنی فأدیم؟ نیجأتٚ قأیم دأشتنٚ رِه وأخب بوستن 19 بأزین، اَی جأنٚ برأرأن، اَسه تأنیم عیسا خونٚ وأسی، رأست بیشیم او موقدس‌ترین جأجیگأ دورون، خودا حوضور؛ 20 چونکی او زمأت مسیحٚ جأن صلیبٚ سٚر پأرَه بوسته، رأس‌رأسِی معبدٚ موقدس‌ترین جأجیگأ پرده‌یٚم پأرَه بوسته؛ و اَطویی اون ایتأ تأزه رأ وأکوده کی زٚندیگی فأدِه کی اَمٚرَه فأرٚسأنه خودا موقدسٚ حوضور. 21 پس اَسه کی خودا خأنه کأرأنٚ ایدأره کودن، اَمی اَ پیله کأهینٚ گردن نٚهأ، 22 بأیید ایتأ پأکٚ دیلٚ اَمرأ، رأست بیشیم خودا ورجأ، و کأمیلٚ ایطمینأن بٚدأریم کی اون اَمٚرَه قوبیل کونِه، چونکی مسیحٚ خون اَمی سٚر فووُسته و اَمٚرَه پأکَ کوده؛ اَمی سٚر و جأنم تیمیزٚ آبٚ اَمرأ بوشؤسته بوبوسته. 23 اَسه تأنیم او نیجأتٚ رأفأ بئیسیم کی خودا وعده بٚدأبو، و تأنیم همٚتأنَ بیگیم کی نیجأت بیأفتیم و هیذره شٚکّم نأریم، چون خودا تومأمٚ خو وعده‌یأنَ انجأم دِهه. 24 اَسه، اون همه لوطفی کی خودا اَمِرِه بوکوده، تشکر کودنٚ وأسی، بأیید کس‌کسَ محبت کودن و خورومٚ کأرأنٚ انجأم دٚئنٚ رِه تِشویق و اَنتیریک بوکونیم. 25 و اوطویم کی بعضیتأنٚ رِه عأدته، کیلیسا عیبأدتی مجلسأنٚ اَمؤنٚ جَا غأفیلَ نیبید، بلکی کس‌کسَ تِشویق بوکونید، بوخصوص اَ روجأن کی مسیحٚ وأگردٚستن فأرٚسئندٚره. 26 چونکی اگه اینفر حِئقتٚ شنأختنٚ پٚسی، دأنسته‌بو هطو گونأ بوکونه، اَ گونأیأنٚ پأکَ کودنٚ رِه دِه هیذره قوربأنی ننأ. 27 اَطویی، جغرز او وأشتنأکٚ موجأزأت و پیله آتش کی آدم زهله کونِه و خودا دوشمنأنَ جٚه بین بٚره، رأفأ ایسأن رأیی ننأ. 28 هرکی موسا حوکمأنَ بٚشکٚنه، دو یا سه نفرٚ گووأ دٚئنٚ اَمرأ، بی‌رحمی اَمرأ بوکوشته بِه. 29 اوشأنی کی خودا پٚسرَ کوچیکَ کونٚده چی ویشتر وأشتنأکٚ موجأزأت اوشأنی رأفأ ایسأ، و او خونَ کی اَشأنی گونأیَ پأکَ کونِه و خودا عهدٚ نیشأنه ایسه، بی‌ارزش کونٚده، و روح‌القدسَ کی ایلاهی رحمتٚ بخشش کودن کس ایسه، بی‌حورمتی کونٚده. 30 چونکی اونَ شنأسیم کی بٚفرمأسته: «اینتقأم و جزأ می شینه.» و هطویم فٚرمأیه: «من خودم می قومَ دأوری کونم.» 31 اوشأنی رِه کی اَجور گونأیی بوکودٚده، زٚنده خودا، دٚسٚ میأن دکفتن خٚیلی وأشتنأکه! 32 هی زمأت او روجأنَ جٚه خأطرَ ندید کی مسیحٚ نور شیمی دیلَ تأزه روشنَ کوده بو؛ چونکی او زمأت اگه‌چی شیمی سٚر خٚیلی رنج و زحمت بأمؤ بو، ولی شومأن همه‌یَ تحمول بوکودید و خوداوندٚ رِه وفأ بوکودید. 33 هطویه، شٚمٚره چن‌وأر رخشنَ گیفتٚد و بٚزٚن بیگیر بوکودٚده، و یا اوشأنی کی اَ زحمتأنٚ میأن ایسأبودٚ اَمرأ چأن بٚچأن بید؛ 34 زندأنیأنٚ اَمرأ همدردی کودیدی؛ و او زمأت کی شیمی مأل و مینألَ بردأندوبود، خوش بید، چون دأنستید کی آسمأنٚ میأن بِیترٚ چیزأن شیمی رأفأ ایسأ کی هیوخت جٚه بین نیشه. 35 پس او ایعتمأد و ایطمینأن کی خوداوندَ دأریدی جٚه دٚس ندید، چون ایتأ پیله پأدأش شیمی رأفأ ایسأ! 36 اگه خأییدی خودا خو وعده سٚر وفأ بوکونه، لأزیمه کی شومأنم تومأمٚ صبر و تحمولٚ اَمرأ، خودا خأسته‌یَ انجأم بدید. 37 چونکی «دئرَ بٚه دورُغَ نیبه اونی کی وأستی بأیٚه، اَیِه و دئرَ نوکونه.» 38 و امّا عأدیل ایمأنٚ اَمرأ زٚندیگی کونه. ولی اگه اینفر جٚه اَشأنٚ میأن پسأ پٚسی وأگرده و دِه می رأیَ نشه، اونی جَا رأضی نییٚم.» 39 ولی اَمأن هیوخت خودا جَا وأنگردستیم کی اَطوچی زرخٚ سرنیویشت اَمِرِه بأیٚه، بلکی اَمی ایمأنَ قأیم بٚدأشتیم و اَ ایمأن، اَمی جأنٚ نیجأت دٚئنَ تضمین کونِه. |
© 2024 Transform Iran
Transform Iran