عبرأنیأن 1 - Gilaki New Testamentعیسا مسیح خودا پٚسره 1 خٚیلی زمأتأن پیشتر، خودا چن‌وأر و جوروأجورٚ شیوه‌یأنٚ اَمرأ، جٚه طریقٚ پیغمبرأن، اَمی پیله بأبأیأنٚ اَمرأ گب بٚزِه، 2 ولی اَ آخرٚ روجأنٚ دورون، جٚه طریقٚ خو پٚسر، اَمی اَمرأ گب بٚزِه. رأس‌رأسِی، خودا همه‌چی ایختیأرَ خو پٚسرَ بیسپأرده، و دونیأ و تومأمٚ موجودأنَ، اونٚ اَمرأ بوجود بأوٚرٚد. 3 خودا پٚسر، خودا جلالَ دتأوأنه و تومأمٚ اونٚ وجودَ، کأمیل نیشأن دِهه. اون خو پورقوّتٚ کلامٚ اَمرأ تومأمٚ دونیأیَ گردأنِندره. اون بأمؤ اَ دونیأ دورون کی، خو جأنَ فٚدأ بوکونه، و اَمٚرَه پأکَ کونه، اَمی قدیمٚ زٚندیگی، کی گونأ میأن نٚهأ بویَ، جٚه بین ببره؛ بأزون، گولأز کودن جأجیگأ لچه سٚر، ینی موتعألٚ خودا رأستٚ دٚس بینیشت. مسیحٚ پیله‌تری فٚرٚشته‌یأنٚ رو 4 اَطویی، اون جٚه فٚرٚشته‌یأن پیله‌تر بوبوست. اونی نأمٚم اَ پیله‌تری‌یَ گووأ دِهه: «خودا پٚسر!» اَن او نأمی ایسه کی خودای پئر اونَ فأدأ، و جٚه همٚتأ فٚرٚشته‌یأنٚ نأم و لقبٚ بوجؤرتره؛ 5 چون خودا هیوخت هیتأ جٚه فٚرٚشته‌یأنَ نفرمأسته: «تو می پٚسری؛ ایمرو من تی پئر بوبوستم.» هطویم بٚفرمأسته: «من اونی پئر بٚم، و اون می پٚسر.» 6 و هو زمأت کی اونی پیله زأی اَمؤندوبو اَ دونیأ دورون، بٚفرمأسته: «تومأمٚ خودا فٚرٚشته‌یأن اونَ پرستٚش بوکوند!» 7 خودا دروأره‌یٚ فٚرٚشته‌یأن فٚرمأیه:«اون خو فٚرٚشته‌یأنَ بأدٚ مأنستَن اوسه کونه، و خو غولأمأنَ وٚل بیگیفته آتشٚ مأنستَن.» 8 ولی دروأره‌یٚ خو پٚسر فٚرمأیه: «اَی خودا، تی پأدیشأیی تأ اَبد برقرأره؛ تی حوکومتٚ اَساس، عیدألت و رأستی سٚر نٚهأ؛ 9 تو عیدألتَ دوس دأری و شرورٚ کأرأنٚ جَا بیزأری؛ پس، خودا، ینی تی خودا، تٚرَه ویشتر جٚه هر کی، شأدمأنی روغنٚ اَمرأ مَسح بوکوده.» 10 اون هطویم پٚسرَ گه: «خوداوندا، جٚه اوّل، تو زیمینٚ پأکأرَ بٚنأیی، و آسمأنأنَ، تی دٚسٚ اَمرأ چأکودی. 11 اوشأن جٚه بین شٚده، ولی تو ایسأیی. اوشأن همه ژندره لیوأسٚ مأنستَن، پوخٚده. 12 ردأ مأنستَن اوشأنَ وأپیچأنی و کُئنه لیوأسٚ مأنستَن فیشأنی. ولی تو اَبدی ایسی و تِرِه هیوخت تومأنَ بوستن وجود نأرِه.» 13 خودا هیتأ جٚه خو فٚرٚشته‌یأنَ نوگفته: «می رأستٚ دٚس بینیش کی تی دوشمنأنَ تی پأ جیر بِئگأنٚم.» 14 چون فٚرٚشته‌یأن، روحأنی ایسٚد کی فقد خیدمت کونٚده، و یاور دٚئن و پأستٚن رِه اوشأنی جَا اوسه بٚده کی نیجأتَ ارث بٚرٚده. |
© 2024 Transform Iran
Transform Iran