غلاطیأن 2 - Gilaki New Testament

روسولأن، پولسٚ پیغأمَ قوبیل بوکودٚد

¹ بأزین چأردٚه سأل کی بوگوذٚشته، دووأره برنابا اَمرأ بوشؤم اورشلیم و تیتوسٚم می اَمرأ ببردم.

² می شؤئؤن خودا هیدأیتٚ اَمرأ بو تأ دروأره‌یٚ او پیغأم کی خأیم قومأنی کی یوهودی نییٚده رِه وأگویا بوکونم می مسیحی برأرأنٚ اَمرأ مشوٚرت بوکونم و کس‌کسَ نظرٚ وأوٚرسٚم. من اَ اومیدٚ اَمرأ کی کیلیسا پیله کسأن می پیغأمَ کأمیلن بفأمٚد و اونَ قوبیل بوکوند، اوشأنی اَمرأ خٚلوٚتی گب بٚزئم

³ خوشبختأنه هطویم بوبوسته و اوشأن هیذره موخألفت نوکودٚد، جوری کی حتّا جٚه می همسفر تیتوسٚم کی یوهودی نوبو نخأستٚد کی ختنه بٚبه.

⁴ البت ختنه مأجیرأیَ اوشأنی پیش بٚکشِئده کی خوشأنَ مسیحی دأنستیدی، امّا رأستشه بٚخأیید مسیحی نوبود. اوشأن فوضولی وأسی بأمؤد تأ بفأمٚد اَمی آزأدی عیسایَ مسیحٚ میأن چوطو ایسه و بیدینٚد چنقذر یوهود قأنونأنٚ جَا ایطأعت کونیم. اَشأن حقٚ سعی زئیدی کی اَمٚرَه خوشأنٚ قأنونأن و حوکمأنٚ غولأم چأکونٚد.

⁵ امّا اَمأن اوشأنی خأسته‌یأنٚ وأسی ای دٚقّه‌یٚم تسلیم نوبوستیم، چونکی خأستیم اینجیلٚ پیغأمٚ دوروستی شِمِره حیفظ بٚبه.

⁶ کیلیسا پیله کسأنم می پیغأمأنَ هیچی ایضأفه نوکودٚده. هطویم، اَنٚم بٚگم کی اوشأنی پُست و موقأم مٚرَه موهیم نییٚه، چونکی همٚتأن خودا ورجأ برأبرید.

^7-9 بأزین وختی یعقوب و پطرس و یوحنا کی کیلیسا سوتونأن معروف ایسٚد، بیدِده چوطو خودا می جَا ایستفأده کودأندٚره تأ اوشأنی کی یوهودی نییٚد اونی ور اوسه کونم، برنابا و می اَمرأ دٚسٚ ریفأقت بدأد و اَمٚرَه تِشویق بوکودٚده کی اَمی بشأرت کأر اوشأنی کی یوهودی نییٚد ایدأمه بٚدیم و اوشأنم یوهودیأن میأن خوشأنی خیدمتَ ایدأمه بٚدٚد. در اصل هو خودایی کی مٚرَه اوشأنی کی یوهودی نییٚده هیدأیتٚ وأسی ایستفأده بوکوده، پطرسٚم یوهودیأنٚ هیدأیتٚ کودن وأسی اینتخأب بوکوده، چونکی خودا هر کودأم جٚه اَمٚرَه ایتأ نوبوّتٚ بوخصوص بٚبخشه.

¹⁰ فقد سفأرش بوکودٚده کی همیشٚک کیلیسا فِقِرأنَ جٚه خأطر نبریم کی البت منم اَ کأرٚ انجأم دئنَ دوس دأشتیم.

پطرسَ شمأتٚت کودن

¹¹ امّا وختی پطرس بأمؤ «انطأکیه»، البأقی آدمأنٚ ورجأ اونَ سخت شمأتٚت بوکودم، چونکی رأس‌رأسِی تقصیرکأر بو؛

¹² جٚه اَ خأطر کی وختی فأرٚسِه انطأکیه، اوّل او مسیحیأنٚ اَمرأ کی یوهودی نوبود، ایتأ سٚفره سٚر نیشتی. امّا وختی ای عیده جٚه کیلیسا پیله کسأن کی یعقوبٚ ور جٚه اورشلیم بأمؤده، خؤرَه کنأر فأکشه و دِه اوشأنی اَمرأ کی یوهودی نوبود ایتأ سٚفره سٚر نینیشته چونکی جٚه اَ آدمأنٚ شمأتٚت کودن کی ایصرأر کودیدی همٚتأن وأستی ختنه بٚبٚد ترسِئی.

¹³ بأزون البأقی مسیحیأن کی جٚه یوهود نتأج بود و حتّا برنابایٚم جٚه اَ کأری کی پطرس صلاح بدأنسته، تقلید بوکودٚد.

¹⁴ وختی بفأمٚستٚم و بیدِم کی اَشأن چوطو خوشأنٚ ایمأن و حِئقتٚ اینجیلٚ ضد کردکأر کونٚده، همٚتأنٚ ورجأ پطرسَ بوگفتم: «تو جٚه یوهودٚ نتأج ایسی، امّا خٚیلی زمأته دِه یوهود قأنونأنَ انجأم ندی. پس چٚره خأیی اَشأنی کی یوهودی نییٚده وأدأری کی یوهودٚ قأنون و حوکمأنَ انجأم بٚدٚد؟

¹⁵ «من و تو کی جٚه یوهودٚ نتأجیم و نه اونی کی یوهودی نییٚه و موسا شریعتٚ حوکمأنَ انجأم نٚده،

¹⁶ خُب دأنیم کی اینسأن، شریعتٚ حوکمأنٚ اَمرأ خودا ورجأ پأک و بی‌گونأ بٚحیسأب نأیِه، بلکی فقد عیسا مسیحَ ایمأن دأشتٚنٚ اَمرأ. هنٚ وأسی، اَمأنٚم مسیحٚ عیسایَ ایمأن بأوٚردیم کی جٚه اَ رأ خودا ورجأ قوبیل بیبیم، نه یوهود شریعت رأیأنٚ انجأم دٚئنٚ اَمرأ. چونکی هیوخت، هیکس شریعت حوکمأنٚ دأشتنٚ اَمرأ نیجأت و خوشبختی‌یَ بٚدٚس نأوٚره.»

¹⁷ امّا اگه اَمأن کی جٚه یوهودٚ نتأج ایسیم نیجأتٚ وأسی، مسیحَ ایمأن بأوریم ولی بأزون بفأمیم کی اَمی کأر ایشتیوأ بو و نیجأتٚ بودونٚ انجأم دٚئنٚ شریعت یوهود بٚدٚس نأوریم، آیا اَنَ مأنه کی مسیح بأعیث بوبوسته کی اَمأن گونأکأر بیبیم؟ اصلن اَطو نییٚه!

¹⁸ بلکی اونی خلأف، اگه منم قبلن او قدیمی روشأنَ کی جٚه شریعت حوکمأن بو فوگوردأنِم، ایوأردِه چأکونم، نیشأن دٚهٚم کی گونأکأرٚم و قأنونَ بٚشکنِم.

¹⁹ چونکی وختی حقٚ سعی بٚزِم کی شریعت حوکمأنَ بجأ بأوٚرٚم، بفأمٚستٚم کی محکومٚم. جٚه اَ خأطر شریعتٚ انجأم دٚئنٚ رِه بٚمٚرده‌یٚم و جٚه حقٚ سعی زِئن تومأمٚ اونی قأنونأنٚ انجأم دٚئنٚ وأسی دٚس بٚکشِم، کی بٚتأنم خودا وأسی زٚنده بمأنٚم.

²⁰ می قدیمی زٚندیگی اونی اَمرأ مصلوب بوبوسته. پس من نییٚم کی زٚندیگی کونم، بلکی مسیح ایسه کی می دورونی زٚندیگی کونه! و اَ زٚندیگی کی می زیمینی بدنٚ دورونی کودأندرم، او ایمأن و توٚکول جَا ایسه کی خودا پٚسرَ دأرم کی مٚرَه محبت بوکوده و خؤرَه می وأسی فٚدأ بوکوده.

²¹ من او آدمأنٚ مأنستَن نییٚم کی مسیح مٚردنَ ایتأ بی‌ارزشٚ ایتفأق دأنٚده. چونکی اگه نیجأت جٚه شریعت رأیأن و دینی دستورأن انجأم بوبوسته‌بی دِه لأزیم نوبو کی مسیح خو جأنَ اَمی وأسی فٚدأ بوکونه.