غلاطیأن 1 - Gilaki New Testament

¹ اَ نأمه جٚه پولسٚ روسول ور ایسه. من ایتأ اینسأنی گورو یا موقأم جَا اینتخأب نوبوستم کی روسول ببم، بلکی توسط عیسایٚ مسیح و خودایٚ پئر بو کی اونَ جٚه مورده‌یأن ویریزأنه.

² تومأمٚ اَیَه برأرأن و خأخورأن اَ نأمه نیویشتن غلاطیه کیلیسا رِه می اَمرأ سأم دأرٚده.

³ جٚه حوضورٚ پئر ینی خودا و اَمی خوداوند عیسایٚ مسیح شِمِره فیض و آرأمٚش خأیم. اگه مٚرَه روسول دؤخأنٚم، می منظور اَن نییٚه کی ایتأ مذهبی جِمئیت و یا ایتأ گورو مٚرَه بٚکأرَ گیفتٚده کی روسول ببم. می مأموریت و وظیفه جٚه عیسایٚ مسیح و او خودایی کی پئر ایسه، هو خودایی کی اونَ بعدٚ مرگ زٚنده کوده.

⁴ چونکی مسیح خودا خأسته جَا کی اَمی پئر ایسه خو جأنَ فٚدأ بوکود و بٚمٚرد کی اَمی گونأیأن بٚبخشه بٚبه و جٚه اَ دونیأیی کی پور جٚه گونأیه نیجأت بیأفیم.

⁵ ایحترأم و جلال تأ اَبد خودا شین بٚبه. آمین.

رستگأری رِه دِه رأیی وجود نأرِه

⁶ تعجب کونم به اَ زودی جٚه او خودایی کی شٚمٚره مسیح فیضٚ اَمرأ دؤخأده رو وأگردأنِییدی و شیمی دیمَ ایتأ دِه اینجیل طرف وأگردأنِییدی، ینی ایتأ دِه پیغأمٚ ور اَبدی زٚندیگی یأفتنٚ رِه.

⁷ چونکی جغرز او رأیی کی شِمِره وأگویا بوکودیم ایتأ دِه رأ وجود نأرِه. اوشأنی کی ایتأ دِه رأ شٚمٚره نیشأن دٚهٚده، خأیده شٚمٚره گول بٚزنٚد و مسیح اینجیل حِئقتَ جیرٚ جؤرَ کونٚد.

⁸ هر کی بٚخأیٚه جغرز او رأیی کی اَمأن شٚمٚره نیشأن بٚدأییم ایتأ دِه رأ شیمی سعأدتٚ وأسی نیشأن بٚده، خودا اونَ لعنت بوکونه، حتّا اگه من ببم. اگه ایتأ فٚرٚشته‌یم جٚه آسمأن بیجیر بأیٚه و شٚمٚره ایتأ دِه رأ نیشأن بٚده خودا اونَ لعنت بوکونه!

⁹ ایوأردِه شٚمٚره وأگویا کونم: اگه اینفر بٚخأیٚه ایتأ دِه خٚوٚر نیجأت وأسی جغرز اونچی کی قوبیل بوکودید شٚمٚره اعلام بوکونه، خودا لعنت بوکونه!

¹⁰ آیا اَسه حقٚ سعی زئندرم اینسأنأنَ رأضی بٚدأرم؟ یا خودایَ رأضی بٚدأرم؟ یا اَنکی حقٚ سعی زئندرم مردومَ خوشألَ کونم؟ اگه هنو مردومٚ خوشألٚ کودنٚ دونبأل ایسأبیم، مسیح خیدمتکأر نوبوم.

پولس خو پیغأمَ جٚه مسیح فأگیفته

¹¹ اَی برأرأن و خأخورأن خأستیم بدأنید، او اینجیل کی شٚمٚره بشأرت بٚدأم هو پیغأمٚ نیجأت جٚه ایتأ اینسأنی فیکر نییٚه.

¹² چونکی عیسایٚ مسیح اونَ بودونٚ وأسطه مِرِه آشیکأرَ کوده و وأشکأفأنه. دوروسته، من اونَ هیکسٚ جَا فأنگیفتم و جٚه هیکس نأمؤختم.

¹³ شک نأرٚم کی می زٚندیگی مأجیرأیَ کی هنو یوهودٚ دینٚ جَا ایطأعت کودیم بشتأوستیدی کی چوطو مسیحیأنَ دونبألَ کودیم و اوشأنَ سنگ دیلی اَمرأ اَذِت آزأر کودیم و همیشٚک ایتأ رأ دونبأل دوبوم کی اوشأنی ریشه‌یَ زیمینٚ جَا بٚکنم.

¹⁴ من جٚه ویشترٚ می یوهودی هم سندٚ سالأن ایمأندأرتر بوم و خٚیلی غیرت می دینٚ رسم و روسومأت انجأم دئنٚ وأسی دأشتیم.

^15-16 امّا یوهو همه چی عوضَ بوسته! چونکی او خودایی کی مٚرَه جٚه می مأرٚ شکمٚ دورونی اینتخأب بوکوده بو، خو لوطف و محبتٚ اَمرأ خو پٚسرَ مٚرَه آشیکأرَ کوده و اونَ مٚرَه بشنأسأنه کی بٚتأنم بٚشٚم او اومتأنٚ ورجأ کی یوهودی نییٚده و عیسایٚ مسیح نیجأتٚ رأ وأسی اوشأنَ بشأرت بدم. وختی کی اَ عوضَ بوستن مِرِه ایتفأق دکفته هیکسٚ اَمرأ دروأره‌یٚ اَ مأجیرأ گب نٚزئم.

¹⁷ حتّا اورشلیمٚم نوشؤم کی اوشأنی اَمرأ کی پیشتر جٚه من او پیغأم فأرٚسِئنٚ وأسی اینتخأب بوبوستده، مشوٚرت بوکونم. بلکی بوشؤم عربستأنٚ صأرأیأن، بأزون وأگردستٚم دمشق.

¹⁸ سه سأل کی بوگوذٚشته، آخرپٚسی بوشؤم اورشلیم کی پطرسٚ اَمرأ ایتأ مولأقأت بٚدأرم. اویَه پونزدٚه روج اونی ورجأ بئیسأم.

¹⁹ امّا جٚه البأقی‌یٚ روسولأن، فقد یعقوب اَمی خوداوند عیسا مسیح برأرَ بیدِم.

²⁰ خودا شأهیده کی اَ چی‌یَ کی نیویسٚم عَینٚ حِئقته.

²¹ اَ مولأقأتٚ پٚسی، بوشؤم اوستأنٚ سوریه و قیلیقیه.

²² امّا هنو یوهودیه اوستأنٚ مسیحیأن مٚرَه نیده بود؛

²³ فقد اَیتأ اویتأ جَا بشتأوسته بود کی: «اَمی قدیمی دوشمن، اَسه هو ایمأنی‌یَ بشأرت دِهه کی قبلن خأستی اونَ جٚه بین ببره.»

²⁴ و اَ عوضَ بوستنٚ وأسی کی می دورونی ایتفأق دکفته بأعيث بوبوسته خودایَ شوکر و سپاس بوکونٚد.