افسسیان 6 - Gilaki New Testamentزأکأن و پئر و مأر 1 ای زأکأن، شیمی پئر و مأرٚ جَا ایطأعت بوکونید کی اَ کأر دوروسته، چونکی خوداوند شیمی زٚندیگی ایختیأرَ اوشأنی دٚس بیسپأرده. 2 اوّلی حوکم کی وعده اَمرأ ایسه اَنه: «تی پئر و مأرَ عزیز بٚدأر 3 کی عأقبت بٚخیر بیبی و زیمین رو درأزٚ عُمر تی نصیب بٚبه.» 4 اَیَه ایتأ گبٚم شومأ پئر و مأرأنٚ اَمرأ دأرم: «شیمی زأکأنَ ویشتر جٚه اندأزه شمأتٚت نوکونید، نوکونه اوشأنَ غیظٚ گیره و اوشأنی دیل بشکفه. اَشأنَ اوجوری کی خوداوند قوبیل کونه، محبت اَمرأ بأموجید و جٚه خودا کلام اَشأنَ پند و اَندرز بدید.» اربأبأن و غولأمأن 5 ای غولأمأن، اَ دونیأ دورون ترس و ایحترأم اَمرأ شیمی اربأبأنٚ جَا ایطأعت بوکونید و اَشأنٚ جٚه تومأمٚ شیمی جأن و دیل خیدمت بوکونید، هوطو کی فیکر کونید مسیحَ خیدمت کودأندریدی. 6 جوری نٚبه کی فقد شیمی وظأیفَ اوشأنی ورجأ خُب انجأم بدید و وختی نئیسأیید اونی جَا جیویزید. بلکی مسیح خأدیمأنٚ مأنستَن همیشٚک وظیفه شنأس بیبید کی خودا خأسته‌یَ جأن و دیل اَمرأ انجأم بدید. 7 عشق و علأقه اَمرأ کأر بوکونید، دوروست اوطو کی خوداوند رِه کأر کونیدی، نه اینسأنٚ رِه. 8 جٚه خأطر نٚبٚرید کی چی غولأم بیبید چی آزأد، هرتأ خوروم کأرٚ وأسی کی انجأم دیهیدی، خوداوند جَا پأدأش فأگیریدی. 9 و شومأن اربأبأن، شیمی غولأمأن و جیردسأنٚ اَمرأ دوروستٚ کردکأر بٚدأرید، هوطو کی اَشأنٚم بوگفتم شیمی اَمرأ دوروستٚ کردکأر بٚدأرٚد. اوشأنَ نترسأنید. جٚه خأطر نٚبٚرید کی شومأنم غولأم ایسید، عیسا مسیحٚ غولأم. شومأن هر دوتأن ایتأ اربأب دأریدی و اون هیکسٚ طرفَ نیگیره. روحأنی جنگٚ سلاح 10 آخرسٚر، شیمی جَا خأیم کی شیمی وجودٚ دورون خوداوند پیله قودرت جَا نیرو فأگیرید و پور زور بیبید. 11 خودا تومأمٚ سلاحأنٚ اَمرأ شٚمٚره تجهیز بوکونید کی بتأنید جٚه وسوسه‌یأن و شیطانٚ حقّه‌یأن قأیم بئیسید. 12 بدأنید کی اَمی جنگ اینسأنأنٚ اَمرأ نییٚه، او اینسأنأن کی گوشت و خون دأرٚده، بلکی اَمأن او جأنورأنی اَمرأ کی او بیدِه نوبوسته دونیأ جَا حوکومت کونٚده و بیدِه نٚبٚده جنگیم، ینی شیطانی موجودأن و ظولومأتٚ شرورٚ فرمأنده‌یأنٚ اَمرأ. دوروسته، اَمی جنگ اَشأنٚ اَمرأیه، سپأیأنی جٚه شرورٚ روحأن اَمرأ کی دونیأ روحأنٚ دورون زٚندیگی کونٚده. 13 پس خودا ایتأ ایتأ سلاحأنٚ جَا ایستفأده بوکونید، او وختی کی شیمی دوشمن، شیطان شٚمٚره فوتورکه کی بتأنید اونی فوتورکستنأنَ بأطیلَ کونید و آخرپٚسی، شیمی پأ سٚر قأیم بئیسید. 14 امّا اَنی وأسی "رأستی قأیمٚ قِئشَ" شیمی کمر دٚوٚدید و "خودا عیدألتٚ زره‌یَ" دوکونید. 15 "اینجیلٚ پأاَفزأرَ کی آرأمٚش دِهه" دوکونید کی همٚتأ جأجیگأ بیشید و اینجیلٚ پیغأمَ همٚتأنٚ رِه وأگویا بوکونید. 16 تومأمٚ اَشأنی سٚر، "ایمأنٚ سپرم" اوسأنید کی اونی کومک اَمرأ بتأنید او شیطانٚ آتشی تیرأنَ خأموشَ کونید. 17 نیجأتٚ کولأخودَ شیمی سٚر بنید و روحٚ شٚمشیرَ کی هو خودا کلام ایسه، شیمی دٚس بیگیرید. 18 هر شرأیطٚ میأن انوأع و اَقسأمٚ دوعأیأن و خأسته‌یأنٚ اَمرأ در روح‌القدس دوعأ بوکونید! و همیشٚک، آمأده بیبید و دوعأ کودنَ همٚتأ موقدسأنٚ رِه مودأم ایدأمه بدید. 19 می وأسییٚم دوعأ بوکونید تأ هر وخت کی می دٚهٚنَ گب زِئن وأسی وأزَ کونم، رأس‌رأسِی کلمه‌یأن مٚرَه بٚبخشه بٚبه کی بٚتأنم بودونٚ ترس اینجیلَ رمز و رأزٚ مردومَ نیشأن بدم، 20 هو اینجیل کی اونی روسول بوبوستم امّا ایتأ روسول زندأنی و غُل و زینجیلٚ میأن! پس دوعأ بوکونید کی اونَ شوجأعتٚ اَمرأ وأگویا بوکونم، اوطو کی شأیسته ایسه. آخری سلأمأن 21 اَمی جأنٚ دیلٚ برأر و خوداوند بأوفأ خیدمتکأر، تیخیکوس جٚه می احوأل و اونچی کی کونم، شٚمٚره وأخبدأرَ کونه. 22 اونَ فقد جٚه اَ خأطر اوسه کونم شیمی ورجأ تأ جٚه چند و چوندٚ اَمی احوأل وأخبدأر بیبید و اونی گبأنٚ ایشتأوٚستٚنٚ اَمرأ دیلگرم و تِشویق بیبید. 23 دوعأ کونم کی خودایٚ پئر و اَمی خوداوند عیسا مسیح شٚمٚره جأنٚ دیلٚ برأرأن، آرأمٚش و محبت و ایمأن بٚبخشه. 24 تومأمٚ اوشأنَ کی اَمی خوداوند عیسا مسیحَ اَبدی محبتٚ اَمرأ دوس دأرٚده، فیض بٚبه. |
© 2024 Transform Iran
Transform Iran