افسسیان 4 - Gilaki New Testament

ایمأندأرأنٚ ایتحأد

¹ من کی خوداوندٚ خیدمت کودنٚ وأسی اَیَه زندأن میأن ایسأم، شیمی جَا ایلتیمأس کونم جوری زٚندیگی و رفتأر بوکونید کی شأیسته‌یٚ شیمی موقأم بٚبه، هو موقأم کی خودا شٚمٚره بٚبخشه.

² فروتن و مهرٚوأن بیبید، کس‌‌کسٚ اَمرأ صبور بیبید و او محبت وأسی کی کس‌کسَ دأریدی، شیمی چومَ جٚه کس‌کسٚ گونأیأن و ایشتیوأیأن دٚوٚدید.

³ تومأمٚ شیمی حقٚ سعی‌یَ بٚزنید کی آشتی و ریفأقتٚ جَا کی شٚمٚره کس‌کسٚ اَمرأ دوچوکأنه ایستفأده بوکونید کی او ایتحأدی‌یَ کی خودا روح بخشه، قأیم بٚدأرید.

⁴ اَمأن همٚتأن ایتأ بدنٚ شین ایسیم و اَمی همٚتأنٚ میأن ایتأ "روح" سأکین ایسه، ینی روح‌القدس و اَمأن همٚتأن ایتأ اومیدٚ فأرٚسِئنٚ وأسی دعوت بوبوستیم، ینی او جلال کی خودا اَمِرِه حأضیرَ کوده.

⁵ اَمِرِه فقد ایتأ خوداوند، ایتأ ایمأن و ایتأ تعمید وجود دأره.

⁶ اَمأن همٚتأن ایتأ خودا دأریم کی اَمی همٚتأنٚ پئر و بوجؤرتر جٚه امّا همٚتأنه و اَمی همٚتأنٚ میأن و اَمی ذره ذره وجود میأن زٚندیگی کونه.

⁷ هطویم، مسیح خو مصلحتٚ اَمرأ جٚه خو رحمتٚ فرأوأنی هرتأ جٚه اَمٚرَه ایتأ بوخصوصٚ فیض بٚبخشه.

⁸ جٚه اَ خأطر موقدسٚ کیتأبأن میأن بأمؤ: «او وخت کی بوشؤ بوجؤرترین جأجیگأ، خٚیلیأنَ اسیری ببرده و خو قومَ پیشکشأن بٚبخشه.»

⁹ دیقت بوکونید کی وختی گه "بوجؤر بوشؤ"، آیا جغرز اَن ایسه کی وأستی اوّل زیمینٚ بیجیرترین جأجیگأیأنٚ دورون بوشؤ بی؟

¹⁰ اونی کی بوشؤ بیجیر، هونی ایسه کی بوشؤ بوجؤر، جٚه همٚتأ آسمأنأن بوجؤرتر کی همٚتأ جأجیگأ میأن همه چی‌یَ خو حوضورٚ جَا پورَ کونٚه.

¹¹ اَطو بو کی اون خودش بعضیأنَ، بٚبخشه کیلیسایَ کی روسول بٚبٚد، ایتأ عیده‌یٚم پیغمبر، ایتأ عیده موبشر و ایتأ عیده دِه‌یٚم شبأن و معلم.

¹² اَ آدمأنٚ وظیفه اَنه کی خودا قومَ اونی کأرٚ وأسی آمأدَه کونٚد و کیلیسایَ چأکوند کی مسیح بٚدٚن ایسه.

¹³ اَ کأر ایدأمه یأفه تأ او وخت کی اَمأن همٚتأن خودا پٚسرٚ شنأخت و اونٚ ایمأن دأشتٚن دورون ایتأ نظر فأرٚسیم و بألغَ بیم و اَمی روحأنی قد و قوأره، مسیح کأمیلٚ قد و قوأره اندأزه فأرٚسِه.

¹⁴ او وخت دِه کوجه زأکأنٚ مأنستَن نیبیم کی هرتأ آدمٚ گبأن و دورُغأنٚ وأسی کی اَمی گول زِئن رِه گده، هر دٚقّه اَمی ایمأنٚ جَا وأگردیم،

^15-16 بلکی عشق و علأقه اَمرأ همیشٚک رأستی دونبأل شیم. رأستٚ گب زنیم، رأستٚ کردکأر کونیم و رأست زٚندیگی کونیم کی اَطویی کم‌کم همٚتأ کأرٚ میأن مسیح مأنستَن بیبیم کی کیلیسا سٚر ایسه. مسیح هیدأیتٚ اَمرأیه کی تومأمٚ اونی بٚدٚن، ینی کیلیسا خوشأنٚ جأ میأن ایسٚده. هرتأ قیسمت جٚه بٚدٚن ایتأ کأر بوخصوصٚ اَمرأ، البأقی‌یٚ قیسمتأنَ یاور دِهه، جوری کی تومأمٚ بٚدٚن کأمیلٚ سأق و سألیمی میأن و پورجٚه محبت، روشد کونه.

زٚندیگی‌یٚ تأزه در مسیح

¹⁷ بأزین، او ایقتدأر اَمرأ کی خودا مٚرَه بٚبخشه، تأکیدٚ اَمرأ گم کی دِه مردومی مأنستَن کی خودایَ نشنأسٚده زٚندیگی نوکونید، اوشأنی مأنستَن کی اوشأنی فیکر و ذهن پریشأن ایسه.

¹⁸ اَشأنی فیکر تأریکَ بوسته و جٚه او زٚندیگی کی خودا بخشه دؤر دکفتٚده، چٚره کی خوشأنٚ فیکرَ دٚوٚستده و خوشأنی دیلَ اونی وأسی سنگَ کودٚد.

¹⁹ اَشأنٚ رِه موهیم نییٚه چی کأری خُبه و چی کأری بد، فیسأدٚ دورونی غرقَ بوستٚد و خوشأنٚ نفس و شهوتٚ خأسته‌یأنٚ وأسی هر نأجور کأری کونٚده و هی‌کأری جَا رو وأنگردأنٚده.

²⁰ امّا مسیح اَجور رأ و روش، زٚندیگی وأسی شٚمٚره نأمؤخته.

²¹ اگه رأس‌رأسِی اونی صدایَ بشتأوستیدی و او حِئقتأن کی دروأره‌یٚ خودش بٚفرمأسته، بفأمستیدی؛

²² پس اَسه وأسی شیمی زٚندیگی قدیمی خُلق و خو و قدیمی رأ روشَ ایتأ لیوأسٚ مأنستَن، شیمی جأنٚ جَا بٚکنید، او لیوأس کی گول‌زٚنٚ نفسٚ اَمرأ فأسیدَ بِه.

²³ شیمی فیکر و ذهنَ تأزه کونید.

²⁴ هطویه، وأستی تأزه خُلق و خویَ دوکونید، خُلق و خویی کی چأکوده بوبوسته کی عیدألت و قودوسیتٚ میأن، خودا مأنستَن بٚبه.

²⁵ پس دورُغ گفتنٚ جَا دٚس بٚکشید. شیمی تومأمٚ گبأن شیمی همسأده‌یأنٚ اَمرأ رأست بٚبه، چونکی اَمأن همٚتأن ایتأ بدنٚ عُصم و اعضأییم.

²⁶ ولأنید غیظ شٚمٚره حریف بٚبه و شٚمٚره بٚگونأ فأکشه. پیشتر جٚه اَنکی آفتأب غروب بوکونه، خشمَ شیمی جَا دورَ کونید.

²⁷ شیطانَ رأ فأندید.

²⁸ اگه اینفر جٚه شومأن پیشتر دوزد بو، وأستی فوری اَ کأرٚ جَا دٚس بٚکٚشه و هو دٚسأنٚ اَمرأ آبرومندأنه کأر بوکونه کی بتأنه فِقِرأنَ یاور بٚده.

²⁹ شیمی زوأن رو بد و نأجور گبأن نأوٚرید، بلکی شیمی گبأن خُب و موفید بٚبه تأ اوشأنی‌یَ کی ایشتأوده خیر و برکت فأرٚسأنه.

³⁰ جوری زٚندیگی نوکونید کی خودا قودوسٚ روح رِه بأعیثٚ غم و غورصه و دیلخوری‌ بٚبه، چونکی تأ او روجٚ آزأدی و فدیه بوستن اون او مُهری ایسه کی نیشأن دِهه خودا شیمی صأب ایسه.

³¹ هرتأ زرخی، غیظ، عصبأنیت، دأد و فریأد، بددٚهٚنی و نیفرتَ شیمی جَا دورَ کونید

³² و در عوض کس‌کسٚ اَمرأ مهرٚوأن و دیلسوج بیبید و کس‌کسَ بٚبٚخشید، هطو کی خودایٚم، مسیحٚ وأسی شٚمٚره بٚبخشه.