افسسیان 3 - Gilaki New Testament

پولس، غیرٚیوهودیأنٚ روسول

¹ جٚه اَ خأطر، من خودم پولس کی عیسایَ مسیح خیدمتٚ وأسی و اونی پیغأم کی شٚمٚره وأگویا بوکودم، زندأن میأن ایسأم...

² شک نأرٚم بشتأوستیدی کی خودا اَ بوخصوص وظیفه‌یَ مٚرَه بیسپأرده کی ایتأ موبأشرٚ مأنستَن اونی فیضَ شٚمٚره کی یوهودی نیئید رِه وأگویا بوکونم.

³ هوطو کی پیشتر خولاصه بوبوسته شِمِره بینیویشتم، خودا خو نقشه پور رمز و رأزَ مِرِه وأشکأفأنه.

⁴ اَنَ نیویسٚم کی وأشکأفأنٚم اَ مسیح رأز چوطو مِرِه آشیکأرَ بوسته.

⁵ قدیمأن خودا اَ رأزَ خو قومٚ اَمرأ در میأن ننأ بو، امّا اَسه اونَ خو روح وأسی خو پیغمبرأن و موقدسٚ روسولأنٚ رِه وأشکأفأنِه.

⁶ اَ رأز اَنه، اوشأنی کی یوهودی نییٚده، او پیله ارثٚ میأن کی خودا زأکأنٚ شینه، یوهودیأنٚ مأنستَن سأم بٚرٚده و هر دوتأن دعوت بوبوستٚد کی مسیح بدنٚ شین، ینی کیلیسا بٚبٚد. هر دوتأن عیسا مسیح و اینجیلٚ پیغأمَ ایمأن اَوٚردٚنٚ اَمرأ خودا وعده‌یأنَ کی خوروم برکتأن ایسه فأگیرده.

⁷ خودا اَ فیضَ مٚرَه فأدأ کی همٚتأنَ جٚه اَ نقشه وأخبدأرٚ کونم و اَ مأموریتٚ انجأم دٚئنٚ وأسی او قودرت و توأنأیی‌ لأزیمَ بٚبخشه.

⁸ دوروسته، خودا اَ فیضَ مٚرَه بٚبخشه کی جٚه کوجه‌دأنه موقدسینٚم کوجه‌دأنه‌ترم کی خوروم خٚوٚرَ اوشأنی‌یَ کی یوهودی نییٚده فأدٚم کی اَشأنی رِه چی ارزنده گنجی در مسیح در دسترس بٚنأ بوبوسته کی هیذره نشأ اونَ توصیف کودن

⁹ و همٚتأنٚ رِه روشنَ کونم کی خودا اَ رأزَ چوطو انجأم دِهه، او رأز کی قدیمی دورأنأنٚ میأن همه چی خودایٚ خألقٚ میأن جیگأ بٚدأ بوبوسته بو.

¹⁰ اونی نقشه جٚه تومأمٚ اَشأن اَن بو کی اَسه کیلیسا جَا جوروأجور جهتأنٚ خودا حیکمت وأسی آسمأنی سأمأنأنٚ میأن فرمأنروأیأن و صأب‌منصبأنٚ رِه ظأهیرَ بٚه

¹¹ و اَن دوروست اونی اَبدی نقشه بو کی اونَ اَمی خوداوند عیسایٚ مسیح دٚسٚ اَمرأ انجأم بٚدأ.

¹² اَسه، تأنیم مسیح و اونی ایمأن دأشتنٚ وأسی بودونٚ اَنکی ترس و ایضطرأبی بٚدأریم، ایطمینأن و ایعتمأد اَمرأ بأییم خودا ورجأ.

¹³ پس، خأهیش کونم جٚه اَ کردکأر کی اَیَه می اَمرأ کونٚده، نأاومید و دیلسرد نیبید. شیمی وأسی ایسه کی من اَ رنج و زحمتأنَ کشئندرم و اَن شٚمٚره وأستی بأعیثٚ ایفتخأر و دیلگرمی بٚبه.

پولسٚ دوعأ روحأنی نیرویأنٚ رِه

^14-15 بأزین، وختی خودا نقشه حیکمت و بوزورگی‌یَ فیکر کونم، زانو زنٚم و خودا ورجأ کی اَ ایلاهی خأنوأرٚ پئر ایسه دوعأ کونم، هو خأنوأر کی بعضی جٚه اوشأن آسمأنٚ میأن و بعضی دِه هنو زیمین سٚر ایسأده.

¹⁶ من اونی جَا خأیم کی خو تومأنٚ نوبوستٚنی بخشش وأسی، شیمی بأطینَ خو روحٚ اَمرأ پورقودرت و توأنمند چأکونه.

¹⁷ دوعأ کونم کی مسیح شیمی دیلٚ میأنی شیمی ایمأنٚ رأ جَا کأمیلن جأ بیگیره. خودا جَا خأیم اَنقد مسیح محبتٚ میأن ریشه بودووأنید

^18-19 کی البأقی خودا زأکأنٚ اَمرأ مسیح محبتٚ طول و عرض و جولفی و بولندی‌یَ بفأمید و اونی مزه‌یَ شیمی زٚندیگی دورونی بیچیشید. اگه‌چی مسیح محبت اَنقد فأل و فرأق ایسه کی اینسأن فیکر کأمیل و دقیق نتأنه اونَ بفأمه، امّا می آروزو اَنه کی اونَ بفأمید و تأ اویَه پیش بیشید کی خودا وجود جَا پورَ بید.

²⁰ هسأ، خودا رِه جلال بٚبه کی تأنه او پیله قودرتٚ اَمرأ کی اَمی میأن کأر کونه، اَمِرِه کأرأنی بوکونه کی خٚیلی بوجؤرتر جٚه اَمی فیکر و اومید و خأسته‌یأن ایسه.

²¹ اونَ تأ اَبدالآبأد کیلیسا و تومأم نتأجأن میأن در مسیحٚ عیسا، جلال بٚبه. آمین.