افسسیان 2 - Gilaki New Testament

دووأره عُمر در مسیح

¹ ای روجأنی شومأنم شیمی شورش و گونأیأن وأسی بٚمٚرده بید.

² شومأن گونأ میأن زٚندیگی کودیدی، او وخت کی جٚه اَ دونیأ رأ روشأن و شیمی نفسٚ قودرتٚ پأدیشأیی ایطأعت کودیدی، ینی هو روحی کی هسأ شورشیأن میأن کأر کونِه.

³ اَمأنٚم همٚتأن اوشأنٚ مأنستَن بیم. اَمی زٚندیگی رأ روش، اَمی نأجورٚ خُلق و خویَ نیشأن دٚئی. اَمأن، اَمی نفسٚ خأسته‌یأن و کثیفٚ فیکرأنٚ جَا اسیر بیم و هرتأ نأجورٚ کأری کودیم. اَمأن هه شورشی خُلق و خو اَمرأ بودونیأ بأمؤییم و هطویم البأقی آدمأنٚ مأنستَن خودا خشم و غیظٚ جیر ایسأبیم.

⁴ امّا خودا کی اونی لوطف و رحمت ویشتر جٚه اَمی فیکرٚ قودرت ایسه، اَمٚرَه اَنقد دوس دأشتی

⁵ کی اَمٚرَه مسیح اَمرأ زٚنده کوده، اگه چی ایشتیوأیأنٚ میأن بٚمٚرده بیم. پس فقد خودا فیض وأسی نیجأت بیأفتیم.

⁶ دوروسته، خودا او کأرٚ اَمرأ کی مسیح اَمِرِه انجأم بٚدأ، اَمٚرَه اونی اَمرأ ویریزأنه و اونی اَمرأ آسمأنٚ سأمأنٚ میأن در مسیحٚ عیسا بینیشأنِه

⁷ تأ جٚه اَ رأ بتأنه خو فیضَ کی اونی بوزورگی‌یَ نشأ وٚصف کودن مسیح عیسایَ زمأتأنی کی پیش دٚرٚه دورون همٚتأنَ نیشأن بٚده هو فیض کی اونی مهرٚوأنی دورون اَمِرِه ظأهیرَ بوسته.

⁸ چونکی فیضٚ وأسی ایسه کی نیجأت بیأفتیدی جٚه رأیٚ ایمأن- و اَنَ نتأنیدی شیمی حیسأب بنید، چٚره کی ایتأ هدیه جٚه خودا ور ایسه.

⁹ نیجأت، اَمی خوروم کأرأن پأدأش نییٚه و جٚه اَ خأطر هیکس نتأنه اونی وأسی خؤرَه گولأز بوکونه.

¹⁰ چونکی اَمأن خودا دٚسٚ چأکوده ایسیم و در مسیحٚ عیسا خلق بوبوستیم کی خوروم کأرأن انجأم بٚدیم، او کأرأنی کی خودا جٚه پیشتر حأضیرَ کوده کی اونی دورون آرأم بیگیریم.

در مسیح ایتحأد دأشتٚن

¹¹ هنٚ وأسی شٚمٚره خأطر بمأنه، شومأن کی غیرٚیوهودی بودونیأ بأمؤیید، قدیمأن غریب بٚحیسأب اَمؤییدی و یوهودیأنی کی خوشأنٚ ختنه بوستن وأسی گولأز کونٚده، شٚمٚره "ختنه نوبوسته خودا نشنأسأن" دؤخأدیدی، اگه چی اَ ختنه اینسأنٚ دٚسٚ اَمرأ انجأم به، فقد اوشأنی بدنٚ رو تأثیر نِهِه، نه اوشأنی دیلٚ رو.

¹² او وختٚ میأن، شومأن مسیح جَا سیوأ زٚندیگی کودیدی و ایسرأییلٚ قومٚ شین نیبید و اوشأنی میأن غریبه بٚحیسأب اَمؤییدی و خودا عهدأنٚ میأن هیذره سأم نأشتیدی، او عهدأن کی خودا وعده‌یأن اونی قومٚ رِه بو و شیمی زٚندیگی‌یَ اَ دونیأ میأن بودونٚ خودا و اومید گوذرأنن دیبید.

¹³ امّا اَسه عیسا مسیحٚ شینیدی. اگه‌چی وختی کی خودا جَا دؤر بید، امّا اَسه او کأری کی مسیح خو خونٚ اَمرأ شِمِره بوکوده، خودایَ نیزدیکٚ بوستیدی.

¹⁴ مسیح بأعیثٚ اَمی آشتی و ریفأقت ایسه. اون، اَمأن یوهودیأنَ شیمی اَمرأ کی یوهودی نیبید آشتی بٚدأ و او فرق دأشتنٚ حیصأرَ کی اَمٚرَه کس‌کسٚ جَا سیوأ کودی جٚه میأن اوسأد و اَمٚرَه ایتأ خأنوأر چأکود.

¹⁵ جٚه اَ خأطر، اون در خو جیسم شریعتٚ حوکمأنٚ سٚر و سأمأن و موقررأتٚ ایعتبأرَ تومأنَ کوده. اونی نیّت اَن بو کی در خودش جٚه او دونه گورو اینسأنأن جَا ایتأ تأزه قوم چأکونه و یوهودیأن و اوشأنی کی یوهودی نیبیدٚ میأن ایتأ آشتی و ریفأقت بوجود بأوٚره.

¹⁶ اَسه کی ایتأ بدنٚ شین ایسیم، دِه اَمی میأن دوشمنی و کینه وجود نأرِه، چونکی مسیح اَمٚرَه و شٚمٚره خودا اَمرأ آشتی بٚدأ. اَمی قدیمی دوشمنی آخرپٚسی اونی صلیب جیر جٚه بین بوشؤ.

¹⁷ مسیح اَ پیغأمٚ آشتی و آرأمشَ کی دیلَ نیشینه هم شٚمٚره کی یوهودی نیبید فأرٚسأنه کی خودا جَا دؤر بید و هم اَمٚرَه کی یوهودی بیم و اونَ نیزدیک بیم.

¹⁸ هسأ، اَمأن همٚتأن چی اوشأنی کی یوهودی ایسٚد و چی اوشأنی کی یوهودی نییٚد، خودا روحٚ کومک اَمرأ و او فدأکأری وأسی کی مسیح اَمِرِه انجأم بٚدأ، تأنیم اَمی آسمأنی پئر خودا حوضورٚ جَا رأ بیأفیم.

شومأن خودا خأنه‌ییدی

¹⁹ اَسه شومأن دِه خودا ورجأ غریبه و بیگأنه نیئیدی، بلکی موقدسین اَمرأ، او ایلاهی وطنٚ شین ایسید و البأقی‌یٚ ایمأندأرأنٚ اَمرأ خودا خأنوأرٚ شینیدی.

²⁰ شومأن او بینأ شین ایسید کی اونی پأکأرَ روسولأن و پیغمبرأن بٚنأده و عیسا مسیحٚم او بینأ اصلی سنگ ایسه.

²¹ اَمأن کی ایمأن بأوٚردیم، مسیحٚ اَمرأ کس‌کسَ دوچوکستیم کی آرأم آرأمِی روشد بوکونیم و ایتأ خوشگلٚ عیمأرت، عیبأدتٚ وأسی بیبیم.

²² شومأن کی یوهودی نیئیدٚم کس‌کسٚ اَمرأ بٚنأ بیدی تأ ایتأ عیمأرت بیبید کی خودا خو روحٚ اَمرأ اونی دورونی زٚندیگی کونِه.