کولسیان 4 - Gilaki New Testament

¹ شومأ اربأبأنم وأستی عیدألت و اینصأفٚ اَمرأ شیمی غولأمأنٚ اَمرأ رفتأر بوکونید. جٚه خأطرٚ ندید کی شومأ خودتأنم آسمأنٚ دورون اربأب دأریدی کی همیشٚک شیمی کردکأرأنَ فأندرستأندره.

چنتأ روحأنی نصیحت

² ایتأ وأخبٚ فیکر و شوکرگوزأرٚ دیلٚ اَمرأ، شٚمٚره دوعأ رِه وقف بوکونید.

³ اَمٚرَه‌یٚم دوعأ بوکونید کی خودا فرأوأنٚ فورصتأن چأکونٚه و بتأنیم مسیح رأزَ وأگویا بوکونیم. رأس‌رأسِی، هنٚ وأسی ایسه کی اَیَه زندأنٚ دورون ایسأم.

⁴ دوعأ بوکونید کی اَندر بیأرم کی اَ پیغأمَ آزأدی اَمرأ و تومأم و کمأل وأگویا بوکونم.

⁵ هرتأ فورصتٚ جَا تومأمٚ ایستفأده‌یَ بوکونید کی اینجیلٚ پیغأمٚ الباقیأنٚ رِه فأرسأنید و بدأنید اوشأنی کی هنو ایمأن نأوٚردٚده اَمرأ چوطو عأقیلأنه رفتأر بوکونید.

⁶ شیمی گبأن همیشٚک فیضٚ جَا پور و دیلچسب بٚبه و اَندر نمک بٚدأره کی بدأنید هرکی‌یَ چوطو جوأب بدید.

نَأمه‌یَ تومأنَ کودن

⁷ اَمی جأنٚ برأر تیخیکوس، شٚمٚره می وضعٚ جَا وأخٚوٚرٚ کونه؛ اون مسیحٚ رِه ایتأ بأوفأ غولأم و می همخیدمت ایسه.

⁸ اونَ فقد هنٚ وأسی شیمی ورجأ اوسه کونم کی اَمی چند و چوندٚ حألٚ جَا وأخٚوٚرٚ بید و اونٚ گبأنٚ ایشتأوٚستٚنٚ اَمرأ دیلگرم و تِشویق بیبید.

⁹ اَطویی اونیسیموسٚم اونی اَمرأ اوسه کونم کی اَمی جأنٚ برأر و جٚه خودتأن ایسه. اَ دونه برأر، اَیَه ایتفأقأنٚ همه‌یٚ شِمِره وأگو کونٚده.

¹⁰ اَرِستَرخوس کی می اَمرأ زندأنٚ دورون ایسأ و مرقس، برنابا عمو پٚسر، شٚمٚره سلأم دأرٚده. هوطویی کی پیشتر هم سفأرش بوکودم هر زمأت کی مرقس شیمی ورجأ بأمؤ، اونی جَا خُب پذیرأیی بوکونید.

¹¹ یسوع یوستوسم سلأم دأره. جٚه یوهودٚ نتأجٚ مسیحیأن، فقد هه چن نفر می اَمرأ اَیَه، خودایَ خیدمت کونٚد و خودا دأنه کی چندر مٚرَه دیلگرمَ کودٚد!

¹² اِپافراس کی خودتأنٚ جَا و عیسا مسیحٚ غولأم ایسه شِمِره سلأم رٚسأنه. اون همیشٚک جدّیتٚ اَمرأ شٚمٚره دوعأ کونه کی کأمیل و برقرأر بیبید و هر کأرٚ میأن خودا خأست و ایرأده‌یَ درک بوکونید.

¹³ من خودم دِئندرم کی اون چی حقٚ سعی زِئن اَمرأ شیمی وأسی و هوطویم لائودیکیه و هیراپولیس مسیحیأنٚ وأسی دوعأ کونه.

¹⁴ او جأنٚ دیلٚ دوکتور لوقا و هوطویم دیماس شِمِره سلأم رٚسأنده.

¹⁵ لائودیکیه دورون اَمی برأرأنٚ و نیمفاسٚ و او مؤمینأن کی اونی خأنه دورون عیبأدت کودنٚ وأسی جمَ بٚده، سلأم برسأنید.

¹⁶ بأزین، اَ نأمه‌یَ خأندنٚ پٚسی اونَ اوسه کونید لائودیکیه کیلیسا و نأمه‌یی کی اَشأنٚ رِه بینیویشتمَ، فأگیرید و بخأنید.

¹⁷ ارخیپوسٚ رِه‌یٚم بیگید: «او خیدمتٚ انجأم دٚئنٚ میأن کی خودا تٚرَه بیسپأرده، حقٚ سعی بوکون!»

¹⁸ اَ چنتأ کلمه‌یٚم من، پولس، می خطٚ اَمرأ نیویسٚم و درود فأدٚم: «مٚرَه اَ زندأنٚ دورون جٚه خأطرٚ نٚبٚرید! خودا شٚمٚره فیض و توجه بفرمأیه.»