اعمالٚ رسولأن 6 - Gilaki New Testament

هفت نفرَ اینتخأب کودن خیدمتٚ وأسی

¹ ایمأندأرأنٚ جِمئیت زیأدَ بوستنٚ اَمرأ، اَشأنٚ میأن گله شیکأیت بیرون بأمؤ. اوشأنی کی یونأنی زوأن بود، گله بوکودٚد کی اَشأنٚ ویوه زنأکأنٚ میأن و عِبری زٚوأنأنٚ ویوه زنأکأنٚ میأن، فرق نٚهٚده و اَشأنَ، اوشأنٚ اَندر خوردنی فأندٚد.

² پس، او دوأزده‌تأ روسول تومأمٚ ایمأندأرأنَ جمَ کودٚد و بوگفتد: «اَمأن وأستی خودمأنٚ وختَ بٚنیم کی خودا پیغأمَ مردومَ فأرٚسأنیم، نه اَنکی اَیتأ اویتأ خوردنی رِه وخت بٚنیم.

³ پس جأنٚ دیلٚ برأرأن، هفت نفرَ جٚه خودتأنٚ میأن کی پور جٚه روح‌القدسٚ و حیکمت بٚبٚد اینتخأب بوکونید کی اوشأنَ اَ کأرٚ رِه بٚنیم.

⁴ اَمأنٚم دوعأ، موعیظه و مردومٚ آموج دئنٚ رِه وخت نیهیم.»

⁵ همٚتأن اَ پیشنهأدَ قوبیل بوکودٚد و اَ آدمأنَ اینتخأب بوکودٚد: ایستیفان (ایتأ مردأی کی پور جٚه روح‌القدس بو و خٚیلی ایمأن دأشتی)، فیلیپُس، پروخروس، نیکانور، تیمون، پرمیناس و نیکلائوس کی انطأکیه شین بو. نیکلائوس یوهودی نوبو کی اوّل یوهودی و اونی پٚسی مسیحی بوبوسته.

⁶ اَ هفت نفرَ روسولانٚ رِه معرّفی بوکودٚد و روسولأنٚم اَشأنٚ رِه دوعأ بوکوده، اوشأنی سٚرٚ رو دٚس بٚنأده و اوشأنَ برکت بٚدأد.

⁷ پس خودا پیغأم هطویی همه جیگأ وأگویا بوستی و ایمأندأرأنٚ آدم نفرأن اورشلیمٚ شهر میأن زیأدَ بوستی. حتّا خٚیلی جٚه یوهودی کأهینأنٚم عیسا شأگرد بوبوستٚد.

ایستیفانَ دسگیر بوستن

⁸ ایستیفانٚم ایتأ مردأکٚ کی پور جٚه ایمأن و پور جٚه روح‌القدس قودرت بو، مردومٚ میأن عجأیب غرأیب موجیزه‌یأن و پیله نیشأنه‌یأن انجأم دٚئی.

⁹ ولی ایتأ روج چنتأ یوهودی کی «آزأد مردأنٚ» کنیسه‌ شین بود، بوگو موگو کودنٚ وأسی ایستیفانٚ ورجأ بأمؤد. اَ آدمأن قیروان، مصرٚ اسکندریه، قیلیقیه و آسیا جَا بأمؤ بود.

¹⁰ ولی هیکس نتأنستی او روح و حیکمتی اَمرأ کی ایستیفان اونی اَمرأ گب زِئی، تأب بأوٚره.

¹¹ پس اوشأن چن نفرَ رشوه فأدأده کی بٚگد اَمأن بشتأوستیم کی ایستیفان خودا و موسایَ کوفر بوگفته.

¹² اَ بُهتأن مردوم و پیله کسأن و دینٚ عألیمأنَ خٚیلی ایستیفانٚ ضد اَنتیریک بوکوده. پس یوهودٚ قومٚ پیله کسأن اونَ بیگیفتٚد و موحأکمه رِه ببردٚد شورأ مجلٚسٚ میأن.

¹³ اوشأنی کی ایستیفانٚ ضد دورُغٚ گب بٚزِه بود، گفتیدی کی اون همیشٚک معبد و موسا تورأتَ بد گه.

¹⁴ گفتیدی: «اَمأن اَمی گوش اَمرأ بشتأوستیم کی گفتی عیسای ناصری معبدَ فوگوردأنه و تومأمٚ موسا حوکمأنَ بأطیلَ کونه!»

¹⁵ اَ زمأت میأن، تومأمٚ اوشأنی کی شورأ میأن نیشته بود، ایستیفانَ فأندرستأندوبود و بیدِده کی اونی دیم هطو ایتأ فٚرٚشته‌یَ مأنه!