اعمالٚ رسولأن 27 - Gilaki New Testament

پولس شِه روم

¹ آخرپٚسی جوفت و جورَ کودٚد کی اَمٚرَه کشتی اَمرأ اوسه کونٚد ایتالیا. پولس و چنتأ دِه زندأنیَ فأدأده ایتأ افسرَ کی یولیوس نأم دأشتی و ایتأ جٚه امپراتوری گاردٚ افسران بو.

² اَمأن ایتأ کشتی میأن بینیشتیم کی آدرامیتیومٚ جَا بأمؤ بو و چنتأ بندر آسیا میأن وأستی لنگر تأوٚده. پس اَمی سٚفرَ دریأ میأن اونٚ اَمرأ شورو بوکودیم. آریستارخوسٚم، کی مقدونیه میأن تسالونیکی شهرٚ شین بو اَ سٚفرٚ میأن اَمی اَمرأ بأمؤ بو.

³ فردأیی کی صیدونٚ بندرٚ میأن لنگر تأوٚدأییم، یولیوس پولسٚ اَمرأ خٚیلی خورومی اَمرأ رفتأر بوکود و وئأشته کی خو ریفِقأنٚ ورجأ بشه و تأ کشتی حرکت کودنٚ زمأت اوشأنی میهمأن بٚبه.

⁴ جٚه اویَه ایوأردِه دریأ رأیَ پیش بیگیفتیم ولی جوری توندٚ بأد جٚه روبرو اَمؤیی کی کشتی رأ جَا بٚدٚرَ بوسته. پس وأدأر بوبوستیم قبرسٚ شومألٚ جَا دٚوأریم کی بأد پنأ بو.

⁵ قیلیقیه و پمفلیه دریأ آبٚ جَا کی دٚوأرستیم، میرا میأن کی لیکیه دورون نٚهأ بو بیجیر بأمؤییم.

⁶ اویَه اَمی او افسر ایتأ مصری کشتی بیأفته کی اسکندریه جَا اَمؤیی و شؤئؤندوبو ایتالیا. پس اَمٚرَه اونی میأن بینیشأنِه.

⁷ چن روجٚ پٚسی کی دریأ توفأنی بو، آخرپٚسی قنیدوسٚ بندرَ فأرٚسِییم. ولی کولأک اَندر توند بو کی اَمٚرَه وأدأشته اَمی رأیَ کجَ کونیم و بیشیم کریتٚ جزیره ور. سلمونی بندرٚ جَا دٚوأرستیم

⁸ و خٚیلی حقٚ سعی زِئن اَمرأ آرأم آرأمِی او توندٚ بأدٚ میأن کی اَمی روبرو اَمؤندوبو، جونوبٚ دریأکنارٚ ور پیش بوشؤییم تأ لسائیه شهرٚ فأئنرٚسِی، بندر زیبایَ فأرٚسِییم.

⁹ خٚیلی اَمی وخت بوشؤ، و دِه دریأ میأن سٚفر کودن خطر دأشتی، چونکی کفأره روج تومأنَ بوسته بو. پولس اَ مأجیرأیَ اوشأنی رِه کی کشتی‌یَ دأشتیدی تذکر بٚدأ و بوگفته:

¹⁰ «اَی مردأکأن، من فیکر کونم، اَمی سٚفر فجأعت بٚبأر اَوٚره و کشتی و اونی بأر خٚیلی آسیب دینه، حتّا اَمی جأنٚم آسیب دینه.»

¹¹ ولی او افسر کی زندأنیأنَ دأشتی، نأخودا و صأب کشتی گبَ ویشتر محل نٚئی تأ پولسٚ گبَ.

¹² و چونکی زیبا بندر پنأ گیفتنٚ رِه خُب نوبو و نشأستی زمستأنَ اویَه ایسأن، اوشأنی کی کشتی میأن کأر کودید ویشترشأن صلاح بٚدأنستٚد بٚشٚد فینیکس کی زٚمستأنٚ رِه اویَه بئیسٚد. فینیکس کریتٚ میأن ایتأ خورومٚ بندر بو و هم ایتأ ور شومألٚ غربَ دأشتی و هم ایتأ ور جونوبٚ غربَ.

دریأ میأن توفأن

¹³ هو وختٚ میأن جٚه جونوبٚ ور، ایتأ آرأمٚ بأد بأمؤ و گومأن بوکودٚد سٚفر کودنٚ رِه ایتأ خورومٚ روج ایسه. پس کشتی لنگرَ فأکٚشِده و خوشکی کنأرأنَ دٚوأرستیم.

¹⁴ ولی پور زمأت نوبوسته کی نأخٚوٚرکی هوا وأگردسته. ایتأ توندٚ بأد کی شومألٚ شرقٚ بأد معروف بو، جٚه جزیره ور اَمی ور بٚدٚمٚسته.

¹⁵ توفأن کشتی‌یَ ببرده دریأ ور. اوشأن اوّل سعی بٚزِده کشتی‌یَ خوشکی ور فأرٚسأنٚد ولی نتأنستٚد. نأچأر بوبوستٚد کشتی‌یَ بٚنٚد خودشٚ رِه بشه کی بیدینٚد چی به. او توندٚ بأدٚم اونَ جولو بردی.

¹⁶ آخرپٚسی کشتی‌یَ ایتأ کوجه‌دأنه جزیره جونوبٚ میأن فأرٚسأنِییم کی اونی نأم کلودا بو، و اویَه هیزأرتأ زحمتٚ اَمرأ جٚه کشتی پوشت او لوتکأ کی نیجأتٚ شین بویَ کشتی رو بأوٚردٚد.

¹⁷ بأزون کشتی‌یَ لأفندٚ اَمرأ موحکم دٚوٚستٚد کی ویشتر دوأم بأوٚره. جٚه ترسٚ اَنکی نوکونه کشتی آفریقا دریأکنارٚ فورشٚ میأن قأیمَ بٚه، اونی بأدبأنأنَ فأکٚشِده بیجیر و وئأشتٚد کی توندٚ بأد اونَ هطو ببره.

¹⁸ فردأیی کی دریأ توفأن ویشترَ بوسته، کشتی بأرَ فوکودٚد دریأ میأن.

¹⁹ ایوأردِه فردأیی رِه، کشتی یدکی اَفزأرأن و هرچی‌یَ کی اَشأنٚ دٚس بأمؤ، فوکودٚد دریأ میأن.

²⁰ روجأن ایتأ ایتأ شؤئیدی، هیذره آفتأب و ستأرٚه‌یأنٚ رنگَ نیدِییم. هطویی توندأ توند بأد اَمؤیی و ایپچه نینیشتی. همٚتأن خوشأنی اومیدَ جٚه دٚس بٚدأ بود.

²¹ خٚیلی زمأت بوبوسته کی هیکس هیچی نوخورده، تأ اَنکی پولس اوشأنی کی کشتی میأن کأر کودیدَ خو دؤر جمَ کود و بوگفته: «آقأیأن، اگه جٚه هو اوّل می گبَ بشتأوسته بید و او زیبا بندرٚ جَا سیوأ نوبوسته بید، اَن همه ضرر نوکودید!

²² ولی هسأ غورصه نوخورید؛ حتّا کشتی‌یٚم غرقَ بٚه، اَمأن هیتأنٚ جأنَ ضرر فأنرٚسه.

²³ چونکی دیشب او خودا کی اونی شین ایسٚم و اونَ خیدمت کونمٚ فٚرٚشته، می ورجأ بٚپأ بئیسأ

²⁴ و بوگفته: "پولس، نوأترسئن چونکی حتم بٚدأر کی قیصرٚ ورجأ فأرٚسی! جودأیٚ اَن، خودا تی خأستٚ اَمرأ تومأمٚ اوشأنی کی تی اَمرأ سٚفر کودأندرد نیجأت دِهه."

²⁵ «پس شیمی دیلَ قورص بٚدأرید! من خودایَ ایمأن دأرم. هر چی کی خودا بٚفرمأسته، هون انجأم به!

²⁶ ولی اَنٚم بدأنید کی ایتأ جزیره میأن، اَمی کشتی ایشکٚفه.»

کشتی بشکفته بوستن

²⁷ چأرده روجٚ پٚسی توفأن بو، ایتأ نیصفٚ شب کی آدم زهله کودی، هوطویی کی آدریاتیکٚ دریأ میأن هر ایتأ موجٚ کوه اَندر اَمٚرَه خوردی، ملوأنأن وأخٚبدأرَ بوستٚد کی خوشکی‌یَ فأرٚسِئندریم.

²⁸ دریأ آبٚ جولفی‌یَ قدَ بیگیفتٚد، بیدِده کی چهل متر ایسه. ایپچه کی بوبوسته ایوأردِه قد بیگیفتٚد و بیدِده کی فقد سی متر ایسه.

²⁹ هنٚ وأسی بٚتٚرسِئده کی کشتی دریأکنارٚ تخته سنگأنَ فوتورکه، هنٚ وأسی کشتی پوشتٚ جَا چأرتأ لنگر دریأ میأن تأوٚدأده و دوعأ کودیدی هر چی زوتر هوا روشنَ بٚه.

³⁰ چنتأ جٚه ملوأنأن خأستید کشتی‌یَ سٚرأدٚد و جیویزٚد. پس کشتی جولو لنگرأنَ آبٚ میأن تأوٚدأنٚ بهأنه اَمرأ، او لوتکأ کی نیجأتٚ شین بویَ آبٚ میأن تأوٚدأده.

³¹ ولی پولس سروأزأن و او افسر کی اوشأنی فرمأنده بویَ بوگفته: «اگه ملوأنأن کشتی میأن نئیسٚد، شومأ همٚتأن جٚه بین شیدی.»

³² پس سروأزأن نیجأتٚ لوتکأ لأفندأنَ بورسٚنِده و اونَ دریأ میأن سٚرأدأد کی هیکس جیویزَ نٚده.

³³ وختی هوا روشنَ بوسته، پولس همٚتأنَ ایلتمأس بوکوده کی ایچی بوخورٚد و بوگفته: «دو هفته ایسه کی هیچی نوخوردیدی.

³⁴ خأهیش کونم شیمی سلأمتی وأسی ایچی بوخورید. چونکی ایتأ خألٚ مو شیمی سٚرٚ جَا کمَ نیبه!»

³⁵ او وخت ایتأ نأن اوسأده، همٚتأنٚ ورجأ خودایَ شوکر بوکوده و ایتأ نیمه نأنَ بوخورد.

³⁶ ایوأرکی همٚتأن حس بوکودٚد کی اوشأنی حأل بِیترٚ بوسته و بینأ کودٚد خوردن.

³⁷ اَمأن همٚتأن کشتی میأن دویست و هفتأد و شیش نفر بیم.

³⁸ اوشأنی کی کشتی میأن کأر کودید غذأ خوردنٚ پٚسی، تومأمٚ او گندمَ کی کشتی میأن نٚهأ بو، فوکودٚد دریأ میأن و کشتی سوبوکترَ بوسته.

³⁹ وختی هوا روشنَ بوسته، نتأنستٚد بفأمٚد کی اویَه کویه ایسه. ولی ایتأ خلیجَ بیدِده کی اونی دریأ کنأر فورش بو. نأنستید کی تأنٚده تخته سنگانٚ میأن کشتی‌یَ فأرٚسأنٚد دریأکنأرَ یا نه.

⁴⁰ آخرپٚسی بینأ بوکودٚد کی ایمتحأن بوکونٚد. پس لنگرأنَ وأوِده و دریأ میأن سٚرأدأده. کشتی سُکانَ شولَ کودٚد، او جولو بأدبأنأنَ فأکٚشِده بوجؤر و رأست بوشؤده دریأکنارٚ ور.

⁴¹ ولی کشتی ایتأ کؤل فورش و گیلَ فوتورکسته و گیلٚ رو بینیشته. کشتی توک فورشٚ میأن بینیشته و اونی پوشتٚ سأمأن پیله موجأنٚ اَمرأ بشکفته.

⁴² سروأزأن خوشأنی افسر فرمأنده‌یَ بوگفتد کی وئأله زندأنیأنَ بوکوشٚد، نوکونه کی اینفر شنأ اَمرأ خؤرَه فأرٚسأنه خوشکی سٚر و جیویزٚده بشه!

⁴³ ولی یولیوس قوبیل نوکوده چونکی خأستی پولسَ نیجأت بٚدأ. بأزون تومأمٚ اوشأنی کی تأنستید شنأ بوکوندَ فرمأن بٚدأ وأز بوکوند آبٚ میأن و خوشأنَ خوشکی سٚر فأرٚسأنٚد،

⁴⁴ و البأقیأنم سعی بٚزٚنٚد تخته نیمه‌یأن و کشتی تیکه‌یأنٚ سٚر اوشأنی دونبأل رأ دکفد. اَطویی بو کی همٚتأن سأق و سألیم فأرٚسِده خوشکی رو!