اعمالٚ رسولأن 26 - Gilaki New Testament1 اگریپاس پولسَ بوگفته: «وئألم تی دفأع کودنٚ رِه گب بزنی.» او وخت پولس خو دٚسَ درأزَ کوده، و بینأ کوده خو جَا دفأع کودن و بوگفته: 2 «اَی پأدیشأ اگریپاس، مِرِه گولأز کونم کی تأنٚم شیمی ورجأ اَ بوهتأنأنی کی جٚه یوهودیأنٚ ور می رو نٚهأ جوأب بدم و می جَا دفأع بوکونم. 3 هطویی‌یٚم دأنٚم کی شومأن یوهودٚ قأنونأن و رسم و روسومأنَ خُب شنأسیدی، پس خأهیش کونم صبر و حوصله اَمرأ می گبأنَ بشتأوید: 4 «هوطویی کی یوهودیأن دأنٚده، من جٚه او وخت کی زأی بوم، اوّل می شهر میأن طرسوس و اونٚ پٚسی اورشلیمٚ میأن یوهودٚ دینَ خٚیلی دقیق بأمؤختم، و اونی مأنستأنم زٚندیگی بوکودم. 5 اگه اَشأن بخأیٚد، تأنٚده می گبأنَ تأیید بوکوند کی من همیشٚک خٚیلی جدی، ایتأ فریسی بوم و جٚه یوهودٚ قأنونأن و رسم و روسومأن ایطأعت بوکودم. 6 ولی اَن همه بُهتأن کی مٚرَه زئندرد اَنٚ وأسی ایسه کی من او وعده انجأم بوستنٚ رأفأ ایسأم کی خودا اَمی پیله بأبأیأنَ بٚدأ بو. 7 تومأمٚ ایسرأییلٚ دوأزدهتأ قبیله شبندروج حقٚ سعی زئندرد کی هه اومیدَ فأرٚسٚد کی من دأرم، هه اومیدی کی، اَی پأدیشأ، یوهودیأن اونٚ وأسی مٚرَه محکوم کونٚده. 8 شومأنی کی اَیَه ایسأیید چٚره وأستی شِمِره بأوٚر کودنی نٚبه کی خودا تأنه مورده‌یأنَ زٚنده کونه؟ 9 «منم ای وختی ایعتقاد دأشتیم عیسای ناصری شأگردأنَ وأستی اَذِت آزأر کودن. 10 جٚه اَ خأطر، کأهینأنٚ پیله کسأنٚ فرمأنٚ اَمرأ، خٚیلی مسیحیأنَ اورشلیمٚ میأنی زندأنی بوکودم. وختی مرگٚ رِه محکوم بوستیدی، منم اَشأنی ضد گووأ دٚئیم. 11 همٚتأ کنیسه‌یأنٚ میأنی همیشٚک مسیحیأنَ اَذِت آزأر و بٚزٚن بیگیر اَمرأ وأدأشتیم کی مسیحَ کوفر بٚگد. می موخألفت اَندر زیأد بو کی حتّا دؤر دورٚ شهرأنم اوشأنٚ دونبألسر شؤئیم. 12 «ایتأ روج، ایتأ جٚه اَ مأموریتأنٚ میأن کی ایختیأر کأمیلٚ اَمرأ و پیله کأهینأن فرمأنأنٚم می دٚسٚ میأن نٚهأ بو شؤئؤندوبوم دمشقٚ ور. 13 ظهرٚ فأنرٚسه‌بو رأ میأنی، اَی پأدیشأ، آسمأنٚ جَا ایتأ چوم دکفه نور می دؤر و می آدمأن دؤر دٚتأوٚسته، نوری کی آفتأبٚ جأیٚم ویشتر نور دأشتی 14 وختی اَمأن همٚتأن زیمین رو بٚکفتیم، ایتأ صدایَ بشتأوستم کی عِبری زوأنٚ اَمرأ مٚرَه گفتی: "شائول! شائول! چٚره مٚرَه اَذِت آزأر کونی؟ سُکأنَ لقد زِئن تٚرَه خٚیلی سخت ایسه. 15 «وأورسئم: "خوداوندا تو کیسی؟" «خوداوند بٚفرمأسته: "من عیسا ایسٚم، هونی کی تو اونَ عذأب دَئندری. 16 هسأ، ویریز! چونکی تٚرَه ظأهیرَ بوستم کی تٚرَه اینتخأب بوکونم کی می خیدمتکأر و شأهید بیبی. تو وأستی اَ ایمرو ایتفأق و کأرأنَ کی آینده میأن تٚرَه نیشأن دٚهٚم، مردومٚ رِه وأگویا بوکونی. 17 و من تٚرَه می قومٚ ورجأ و بیگأنه قومأن ورجأ حیمأیت کونم. هطویه، خأیم تٚرَه اوشأنی کی یوهودی نییٚد ورجأ اوسه کونم، 18 کی اوشأنٚ چومأنَ وأزَ کونی، کی گونأ جَا دٚس اوسأنٚد، و شیطانٚ ظولمتٚ جَا بیرون بأیٚد، و خودا نورٚ میأن زٚندیگی بوکوند. و من اَشأنٚ گونأیأنَ بٚخشم و اوشأنَ او ایمأن وأسی کی مٚرَه دأرٚده، او موقدس برکتأن میأن سأم فأدٚم." 19 «هنٚ وأسی، اَی پأدیشأ اگریپاس، من جٚه او آسمأنی رویأ می رویَ وأنگردأنِم. 20 پس اوّل یوهودیأنی کی دمشق، اورشلیم و یوهودیه اَسر تأ اوسر ایسأبود و بأزون اوشأنی کی یوهودی نوبودٚ رِه وأگویا بوکودم کی توبه بوکوند، خودا ورجأ وأگردٚد و خوشأنی کردکأرٚ اَمرأ نیشأن بٚدٚد کی رأس‌رأسِی توبه بوکودٚد. 21 هه مأجیرأ وأسی، یوهودیأن معبدٚ میأنی مٚرَه بیگیفتٚده و حقٚ سعی بٚزِده کی مٚرَه بوکوشٚد. 22 ولی خودا یاور دئن و اونی حیمأیتٚ اَمرأ، تأ ایمرو زٚنده بمأنستم کی اَ حِئقتأنَ همٚتأنٚ رِه، چی کوجه‌دأنه چی پیله‌دأنه، وأگویا بوکونم. می پیغأم هونی ایسه کی یوهودٚ پیغمبرأن و موسا مردومَ آمؤختیدی، 23 کی مسیح وأستی اَذِت آزأر بیدینه و اون اوّلی آدمی بٚبه کی مٚردنٚ پٚسی زٚنده بٚبه کی اَ کأرٚ اَمرأ، یوهودی و اوشأنی کی یوهودی نییٚده زٚندیگی‌یَ روشنی فأدٚه.» 24 ایوأرکی فِستوس فریأد بٚزِه: «پولس تو خولَ بوستی! زیأدی خأندنٚ اَمرأ تی مغزَ خرأبَ کودی!» 25 ولی پولس جوأب بٚدأ: «عالیجنأب فِستوس، من خول نییٚم. اونچی کی گم تومأم حِئقت ایسه. 26 پأدیشأ خودشم اَ مأجیرأیَ دأنه. من خٚیلی روشن و آشیکأر گب زنٚم، چونکی رأس‌رأسِی دأنٚم کی پأدیشأ تومأمٚ اَ مأجیرأیأنٚ اَمرأ آشینأ ایسه، چونکی هیتأ جٚه اوشأن خلوتی میأن ایتفأق دنکفته. 27 اَی پأدیشأ اگریپاس، آیا یوهود پیغمبرأنَ ایمأن دأریدی؟ دأنٚم کی دأریدی...» 28 اگریپاس اونٚ کلامٚ رشته‌یَ بورسأنه و بوگفته: «آیا گومأن کونی دفأتن تأنی مٚرَه قأنع بوکونی کی مسیحی ببم؟» 29 پولس جوأب بٚدأ: «دِئر یا زود، خودا جَا خأیم کی نه فقد شومأن، بلکی تومأمٚ اَشأنی کی ایمرو می گبَ ایشتأوده، می مأنستَن مسیحی بٚبٚد، البت نه ایتأ مسیحی کی زینجیلٚ میأن ایسأ!» 30 او وخت پأدیشأ، فرمأندأر، برنیکی و البأقیأن ویریشتٚده و محکمه تألأرٚ جَا بوشؤده بیرون. 31 او وختی کی اَ مأجیرأ وأسی کس‌کسٚ اَمرأ بوگو بشتأو کودأندوبود، هم نظر بوبوستٚد، بوگفتٚده: «اَ مردأی کأری نوکوده مٚردنٚ یا زندأنی بوستنٚ سزأوأر بٚبه.» 32 اَگریپاس، فِستوسَ بوگفته: «اگه قیصرَ دٚس بٚدأمن نوبوسته بی، شأستی اونَ وِلَ کودن.» |
© 2024 Transform Iran
Transform Iran