اعمالٚ رسولأن 25 - Gilaki New Testament

پولس فِستوسٚ فرمأندأر ورجأ

¹ سه روج پٚسی جٚه اَنکی فِستوس، قیصریه دورون بوشو، خو تأزه جأجیگأیَ بٚدٚسَ گیفته و قیصریه جَا سٚفر بوکوده اورشلیم.

² اویَه کأهینأن پیله کسأن و یوهودٚ ریش سیفیدأن، فِستوسٚ ورجأ بوشؤده و خوشأنٚ ایتٚهأمأنَ پولسٚ ضد وأگویا بوکودٚد،

³ و پأفیشاری بوکودٚد کی هرچی زوتر اونَ اوسه کونٚد اورشلیم. اوشأنٚ فند اَن بو کی رأ میأن پولسَ بوکوشٚد.

⁴ ولی فِستوس جوأب بٚدأ: «چونکی پولس قیصریه میأن ایسأ و پوردِه بأقی نییٚه کی منم وأگردم اویَه،

⁵ پس چنتأ جٚه شیمی رهبرأن تأنٚد اونی موحأکمه کودنٚ وأسی می اَمرأ بأیٚد.»

⁶ فِستوس اورشلیمٚ میأن هشت تأ ده روج بئیسأ و بأزون وأگردسته قیصریه و فردأیی وأخأست کودنٚ رِه پولسَ دؤخأده.

⁷ او وخت کی پولس محکمه‌یَ بوشؤ بودورون، اورشلیمٚ یوهودیأن اونَ دؤرَ کودٚد و خٚیلی چیزأن اونی ضد بوگفتٚده کی نتأنستٚد خوشأنی گبأنَ کرسی سٚر بینیشأنٚد.

⁸ پولس تومأمٚ اوشأنی توهمٚتأنَ رٚدَ کوده و بوگفته: «من تقصیر نأرٚم. من نه یوهودٚ شریعتٚ اَمرأ موخألف ایسٚم، نه معبدَ بی‌حورمتی بوکودم و نه رومٚ حوکومتٚ ضد کأری بوکودم.»

⁹ فِستوس کی خأستی یوهودیأنَ آرأمَ کونه، پولسٚ جَا وأوٚرسِه: «خأیی بیشی اورشلیم و اویَه می ورجأ موحأکمه بیبی؟»

¹⁰ پولس جوأب بٚدأ: «نه! اَیَه رومٚ حوکومتٚ رسمی محکمه ایسه، پس وأستی هَیه موحأکمه ببم. شومأن خودتأن خُب دأنید کی من یوهودیأنٚ سٚر هیتأ ایشتیوأیی نأشتیم.

¹¹ اگه‌یٚم کأری بوکودم کی مٚردنٚ سزأوأرم، حأضیر ایسٚم بیمیرٚم! ولی اگه کأری نوکوده بیم، نه شومأن و نه دِه هیکس حق نأرِه مٚرَه اَشأنٚ دٚس فأده کی بوکوشته ببم. من خأیم قیصر خودش می شیکأیتَ فأرٚس فوروس بوکونه.»

¹² فِستوس خو موشأویرأنَ اَمرأ شؤر بوکوده و اونٚ پٚسی جوأب بٚدأ: «خٚیلی خُب! هسأ کی خأیی قیصر تی شیکأیتَ فأرٚس فوروس بوکونه، اونی ورجأ شی.»

¹³ چن روج بوستنٚ پٚسی پأدیشأ اگریپاس خو زن برنیکی اَمرأ، فِستوسٚ خوش اَمؤن گفتنٚ وأسی، بأمؤ قیصریه.

¹⁴ او چن روج کی اویَه ایسأبود، فِستوس پولس جریأنَ پیش فأکشه و پأدیشأیَ بوگفته: «ایتأ زندأنی دأریم کی فِلیکس وئأشته من اونَ موحأکمه بوکونم.

¹⁵ او وخت کی اورشلیم ایسأ بوم کأهینأنٚ پیله کسأن و یوهودٚ ریش سیفیدأن جٚه اون می ورجأ شیکأیت بوکودٚد و بٚخأستٚد اونَ اعدام بوکونم.

¹⁶ ولی دفأتن اَشأنَ بوگفتم کی هرمأله رومٚ قأنون هیکسَ موحأکمه نوکوده محکوم نوکونِه، بلکی اونَ اوّل وخت فأدأ به کی خو شأکیأنَ بیدینه و خو جَا دفأع بوکونه.

¹⁷ «او وخت کی اونی شأکیأن بأمؤده اَیَه، فردأیی محکمه بٚنأم و دستور بٚدأم پولسَ بأوٚرٚد.

¹⁸ ولی او توهمٚتأنَ کی اونَ بٚزِده، اونی نوبو کی من فیکر کودیم.

¹⁹ دأستأن فقد خوشأنی مذهبٚ سٚر بو و اینفر عیسا نأم کی اَشأن گده بٚمٚرده، ولی پولس ایدعأ کونه کی اون زٚنده ایسه!

²⁰ اَنٚ وأسی کی اَجور چیزأن می سٚرَ بٚدر نوشؤیی، اونی جَا وأورسئم: خأیی بیشی اورشلیم و اویَه موحأکمه بیبی؟

²¹ ولی پولس قیصرَ دٚس بٚدأمن بوبوسته! پس، اونَ اوسه کودم زندأنٚ میأن کی اونی قیصرٚ ورجأ شؤئؤنَ ردیفَ کونم.»

²² اگریپاس بوگفته: «می دیلٚم خأیه اَ مردأکٚ گبأنَ بشتأوم.» فِستوس جوأب بٚدأ: «خٚیلی خُب، فردأ اونَ شیمی ورجأ اَوٚرم.»

پولس، پأدیشأ اگریپاسٚ ورجأ

²³ فردأیی، وختی پأدیشأ و برنیکی، تومأمٚ شوکو و جلالٚ اَمرأ خوشأنی سپأه فرمأنده‌یأن و شهرٚ پیله موقأم دأرأنٚ اَمرأ بوشؤده محکمه تألأر میأن، فِستوس فرمأن بٚدأ پولسَ بأوٚرٚد.

²⁴ او وخت فِستوس بوگفته: «اَی پأدیشأ اگریپاس و تومأمٚ شومأن کی اَیَه ایسأیید، اَن هو مردأکی ایسه کی چی قیصریه یوهودیأن و چی اورشلیمٚ یوهودیأن خأیٚد اون بیمیره.

²⁵ ولی من فیکر کونم کی اون کأری نوکوده کی مٚردنٚ سزأوأر بٚبه. هر جور کی بٚبه، اون خو بی‌گونأیی وأسی قیصرَ دٚس بٚدأمن بوبوسته و منم دِه رأیی نأشتیم جغرز اَنکی اونَ قیصرٚ ورجأ اوسه کونم.

²⁶ ولی نأنٚم قیصرٚ رِه چی بینیویسٚم، چونکی رأس‌رأسِی تقصیر نأرِه. هنٚ وأسی، اونَ بأوٚردٚم شیمی ورجأ و بوخصوص شیمی ورجأ اَی پأدیشأ اگریپاس، کی اونی جَا وأخأست کودنٚ پٚسی بفرمأیید چی بینیویسٚم.

²⁷ چونکی دوروست نییٚه قیصرٚ ورجأ ایتأ زندأنی‌یَ اوسه کونم ولی نینیویسٚم اونی جورم چیسه!»