اعمالٚ رسولأن 24 - Gilaki New Testament

پولس رومی محکمه میأنی

¹ پِنج روجٚ بوستنٚ پٚسی، پیله کأهین حنانیا ایتأ عیده جٚه یوهودٚ ریش سیفیدأن و ایتأ وکیلٚ اَمرأ کی اونی نأم تِرتولوس بو، بأمؤ قیصریه میأن کی پولسٚ جَا خوشأنی شیکأیتَ محکمه‌یَ فأدٚد.

² وختی پولسَ دؤخأدٚد کی بأیٚه بودورون، تِرتولوس خو شیکأیتَ اَطویی فِلیکسٚ ورجأ وأگویا بوکوده: «عالیجنأب فرمأندأر، خٚیلی زمأت ایسه کی اَمأن یوهودیأن، شیمی پأدیشأیی میأن صولح و آرأمٚش اَمرأ زٚندیگی بوکودیم، و شیمی حیکمتٚ اَمرأ، اَ مردومٚ میأنی خورومٚ تغییر بوجود بأمؤ.

³ تومأمٚ اَشأنٚ وأسی، خٚیلی شیمی جَا ممنونیم.

⁴ جٚه اَ خأطر کی نخأیٚم شیمی سٚرَ بٚدرد بأوٚرٚم، مٚرَه وئألید خٚیلی کم و کوتأ اَ موتهمٚ جورمأنَ شِمِره وأگویا بوکونم.

⁵ اون ایتأ فتنه فیسأدٚ آدم ایسه کی همیشٚک تومأمٚ دونیأ میأن یوهودیأنَ شورش و یاغیگیری رِه رومٚ دولتٚ ضد اَنتیریک کونه؛ و ایتأ فرقه‌یَ گردأنه کی "ناصریأن" نأم دأرٚده.

⁶ اَمأن او زمأت اونَ بیگیفتیم کی خأستی معبدَ نجستَ کونه. اَمأن خأستیم کی اونَ اَمی شریعتٚ موطأبٚق موحأکمه بوکونیم،

⁷ ولی هنگٚ فرمأنده لیسیاس بأمؤ و اونَ زورٚ اَمرأ اَمی پٚنجه جَا بیرون بأوٚرده،

⁸ و هرکی اونی جَا شیکأیت دأشتی‌یَ فرمأن بٚدأ کی شیمی ورجأ بأیٚد. شومأن خودتأن تأنیدی اونی جَا وأخأست بوکونید کی بیدینید اَ ایتٚهأمأن حِئقت دأره.»

⁹ البأقی یوهودیأنٚم اونی گبأنَ تأیید بوکودٚد.

¹⁰ بأزون پولس وخت فأرٚسِه کی گب بٚزٚنه. فرمأندأر اونَ ایشأره بٚزِه کی ویریزه و خو جَا دفأع بوکونه. پولس بوگفته: «جنأبٚ فرمأندأر، دأنٚم کی سألیأنٚ سأل ایسه کی شومأن قیضأوتٚ جیگأ دورون نیشتِئید، و یوهودٚ گریفتأریأن فأرٚس فوروس کودأندرید. جٚه اَ موضو می دیل قورصه کی تأنٚم رأحت می جَا دفأع بوکونم.

¹¹ شومأن خٚیلی توند تأنیدی وأورس وُورس بوکونید و بفأمید کی من فقد دوأزده روجٚ پیشتر اورشلیمٚ میأن بأمؤم کی معبدٚ دورون عیبأدت بوکونم.

¹² او وخت آشیکأرَ به کی من هیوخت نه معبدٚ دورون بلوأ بٚپأ بوکودم و نه کنیسه‌ و شهرٚ دورون،

¹³ و ایطمینأن دأرم کی اَشأن نٚتأنٚده اَ بوهتأنأنی‌یَ کی مٚرَه زنٚده، ثأبیت بوکوند.

¹⁴ «ولی ایچی‌یَ ایعترأف کونم. من "طریقتَ"، هو نیجأتٚ رأ روش کی اَشأن گده ایتأ مونحرفٚ فرقه ایسه، ایمأن دأرم. من می پیله بأبأیأنٚ مأنستَن خودایَ خیدمت کونم و یوهود شریعتٚ و یوهود پیغمبرأنٚ بینیویشته‌یأنَ ایمأن دأرم.

¹⁵ «من اَ آقأیأن مأنستَن، ایمأن دأرم کی چی خورومٚ آدمأنٚ رِه و چی نأجورٚ آدمأنٚ رِه قیأمتٚ روج در پیش نٚهأ.

¹⁶ جٚه اَ خأطر تومأمٚ می جأنٚ اَمرأ حقٚ سعی زنٚم کی ایتأ پأکٚ ویجدأنٚ اَمرأ خودا و آدمأنٚ ورجأ زٚندیگی بوکونم.

¹⁷ «من او قدیمٚ سالأن کی دؤر بومٚ پٚسی چنتأ پیشکشی اَمرأ وأگردستٚم اورشلیمٚ میأن کی می قومَ یاور بدم و قوربأنی مرأسیمَ انجأم بدم.

¹⁸ اوشأنی کی می جَا شیکأیت دأرٚده او وختی کی پأکَ کودنٚ مرأسیمأنٚ رِه موشغول بوم مٚرَه معبدٚ دورونی بیدِده. نه ایتأ عیده آدم می اَمرأ ایسأبود و نه بلوأیی رأ تأوٚدأ ‌بوم!

¹⁹ ولی آسیا جَا چنتأ یوهودی اویَه ایسأبود، کی اَشأنٚم اگه شیکأیتی می جَا دأشتید، وأستی اَیَه بئیسأبید کی وأگویا بوکوند.

²⁰ هسأ، اَ آقأیأنٚ جَا کی اَیَه ایسأده وأوٚرسید کی اَشأنٚ شورأ، چی گونأیی می جَا بیدِه؟

²¹ جغرز اَنکی بولندٚ صدا اَمرأ اَشأنٚ ورجأ بوگفتم: "مورده‌یأنٚ قیأمتٚ ایمأن دأشتنٚ وأسی ایسه کی ایمرو شیمی ورجأ موحأکمه بوستأندره!"»

²² فِلیکس کی خُب «طریقتٚ» جَا وأخبدأر بو، موحأکمه کودنَ عقب تأوٚدأ و بوگفته: «پأدگأنٚ فرمأنده، لیسیاسٚ رأفأ بئیسید کی بأیٚه. او وخت شیمی شیکأیتَ فأرٚس فوروس کونم.»

²³ بأزون، فرمأن بٚدأ پولسَ زندأنی بوکوند ولی او افسر کی مسئول بویَ سفأرش بوکوده کی اونی اَمرأ خُب رفتأر بوکونٚد کی جٚه هر ور آرأمٚش بٚدأره و وئألد اونی ریفِقأن اونَ بیدینٚد و هرچی کی بٚخأسته اونَ فأدٚد.

²⁴ چن روج کی بوبوسته، فِلیکس خو زنأکٚ اَمرأ دروسیلا کی یوهودی بو، بأمؤ و پولسَ خو ورجأ دؤخأده. وختی پولس عیسایٚ مسیحٚ ایمأن دأشتنٚ دروأره گب زِئی، هر دوتأن دیقت اَمرأ ایشتأوستیدی.

²⁵ ولی وختی جٚه عیدألت و صبر و آینده قیضأوت گب بٚزِه، فِلیکس زهله بوکود و پولسَ بوگفته: «اَسه وٚسته! هر وخت مونأسب تشخیص بٚدأم، تی دونبأل اوسه کونم.»

²⁶ اَنٚم بٚگم کی، فِلیکس اومید دأشتی پولس ایتأ رشوه اونَ فأدَه کی اونَ وِلَ کونٚه؛ پس وخت و بی وخت اونی دونبأل اوسه کودی و اونی اَمرأ گب زِئی.

²⁷ اَطویی دوسأل بوبوسته کی پُرکیوس فِستوس، فِلیکسٚ جأ سٚر بینیشته. فِلیکسٚم کی خأستی یوهودیأنَ خو جَا رأضی بٚدأره پولسَ هطویی زندأنٚ میأن بدأشته.