اعمالٚ رسولأن 23 - Gilaki New Testament1 پولس هوطویی کی شورأ آدمأنَ فأندرستی بوگفته: «اَی برأرأن، من همیشٚک خودا ورجأ ایتأ پأکٚ ویجدأنٚ اَمرأ زٚندیگی بوکودم!» 2 دفأتن حنانیا، پیله کأهین، او آدمأنی کی پولسٚ نیزدیکی ایسأبوده، فرمأن بٚدأ کی دٚسٚ پوشتی اَمرأ بٚزٚنٚد اونی دٚهٚنٚ میأن. 3 پولس اونَ بوگفته: «اَی کسی کی تی ظأهیرَ چأکونی ولی تی بأطین خرأبه، خودا تٚرَه زٚنِه! تو اویَه نیشتِیی کی مٚرَه شریعتٚ قأنونأنٚ موطأبٚق قیضأوت بوکونی، ولی خودت شریعتَ تی پأ جیر نئندری، چونکی فرمأن دیهی کی مٚرَه اَطویی بٚزٚنٚد!» 4 اوشأنی کی پولسٚ نیزدیکی بٚپأ ایسأبود اونَ بوگفتٚده: «خودا پیله کأهینَ فأش دیهی؟» 5 پولس جوأب بٚدأ: «برأرأن، نأنستیم کی اون پیله کأهین ایسه، چونکی بینیویشته بوبوسته: تی قومٚ پیله کسأنَ بد نوگو.» 6 او وخت کی پولس بٚفأمٚسته ایتأ عیده جٚه شورأ آدمأن صدوقی ایسٚد و ایتأ دسته‌یٚم فریسی، بولندَ صدا اَمرأ بوگفته: «اَی برأرأن، من فریسی ایسٚم. تومأمٚ می پیله بأبأیأنٚم فریسی بود! و ایمرو اَنٚ وأسی اَیَه موحأکمه بوستأندرم کی مورده‌یأنٚ قیأمتَ ایعتقاد دأرم!» 7 اَ گب شورأ آدمأنٚ میأن تفرقه تأوٚدأ و فریسیأن، صدوقیأنٚ ضد ویریشتٚده. 8 چونکی صدوقیأن ایعتقاد دأشتید کی مٚردنٚ پٚسی زٚندیگی و فٚرٚشته و روح وجود نأرِه، ولی فریسیأن تومأمٚ اَشأنَ قوبیل دأشتیدی. 9 اَطویی بو کی ایتأ بلوأ بٚپأ بوبوسته. اَ میأنی ایتأ عیده جٚه دینٚ عألیمأن کی فریسی بود ویریشتٚده و ایعترأضٚ اَمرأ بوگفتٚده: «اَمأن اَ آدمٚ میأنی گونأیی نیأفتیم. شأید دمشقٚ رأ دورون ایتأ روح یا ایتأ فٚرٚشته اونی اَمرأ گب بٚزِه.» 10 بوگو موگو جوری بوجؤر بیگیفته کی فرمأنده بٚتٚرسه پولسَ تکس‌تکسَ کونٚد، پس سروأزأنَ فرمأن بٚدأ اونَ مردومٚ پٚنجه جَا بیرون فأکٚشٚد و قلعه دورون وأگردأنٚد. 11 او شب خوداوند پولس ورجأ بٚپأ بئیسأ و اونَ بٚفرمأسته: «پولس، تی دیلَ قورص بٚدأر! هوطو کی اَیَه مردومٚ اَمرأ می جَا گب بزِیی، رومٚ میأنم گب زنی.» یوهودیأنٚ جوفت و کلک پولسٚ کوشتٚنٚ وأسی 12 فردأیی صُب، ایتأ عیده جٚه یوهودیأن جمَ بوستٚد و قسم بوخوردٚد تأ پولسَ نوکوشٚد، نه ایچی بوخورد و نه ایچی وأخورد! 13 اوشأنی کی اَ جوفت و کلکٚ میأنی دیخألت دأشتید، جٚه چهل نفر ویشتر بوستیدی. 14 اوشأن پیله کأهینأن و قوم ریش‌سیفیدأنٚ ورجأ بوشؤده و خوشأنٚ تصمیمَ اوشأنی رِه وأگویا بوکودٚد، بوگفتٚده: «اَمأن قسم بوخوردیم تأ پولسَ نوکوشیم ایچی نوخوریم. 15 شومأن و شورأ آدمأن هنگٚ فرمأنده‌یَ بیگید کی ایوأردِه پولسَ اوسه کونه شورأ میأن، اَ بهأنه وأسی کی خأییدی اونی جَا ویشتر وأورس وُورس بوکونید. او وخت اَمأن رأ میأن اونَ کوشیمی.» 16 ولی پولسٚ خأخور زأ اوشأنٚ جوفت کلکَ بٚفأمٚسته و قلعه میأن بأمؤ و جٚه اَ مأجیرأ پولسَ وأخبدأرَ کوده. 17 پولس ایتأ جٚه پأسبأنأنَ دؤخأده و بوگفته: «اَ جوأنَ فرمأنده ورجأ ببر، چونکی خأیه ایتأ موهیمٚ خٚوٚر اونَ فأدَه.» 18 سروأز اونَ فرمأنده ورجأ ببرده و بوگفته: «پولس کی زندأنٚ میأن ایسأ، مٚرَه دؤخأده و خأهیش بوکوده اَ جوأنَ شیمی ورجأ بأوٚرٚم کی ایتأ خٚوٚر شٚمٚره فأرٚسأنه.» 19 فرمأنده پٚسرِیکٚ دٚسَ بیگیفته و ایتأ کنأر ببرده و اونی جَا وأوٚرسِه: «چی خأیی بیگی؟» 20 بوگفته: «هه فردأ یوهودیأن خأیده شیمی جَا خأهیش بوکوند کی پولسَ شورأ میأن بٚبٚرید، اَ بهأنه اَمرأ کی خأیده ویشتر اونی جَا وأورس وُورس بوکوند. 21 ولی شیمی جَا خأهیش کونم اَ کأرَ نوکونید! چونکی اوشأن ویشتر جٚه چهل نفر جوخوفته دأرٚده کی اونی سٚر فوتورکد و اونَ بوکوشٚد. قسمٚم بوخوردٚد تأ اونَ نوکوشٚد، نه ایچی بوخورد و نه ایچی وأخورد. هَسأ همٚتأن حأضیر و آمأده ایسٚد، فقد رأفأ ایسأده کی شومأن اوشأنٚ خأهیشَ قوبیل بوکونید.» 22 وختی او جوأن شؤئؤندوبو، فرمأنده اونَ بوگفته: «هیکسَ نوأگفتن کی اَ مأجیرأیَ مٚرَه بوگفتی.» پولسَ ایسپأرٚده رومی فرمأندأر دٚس 23 بأزون فرمأنده دوتأ خو افسرانَ دؤخأده و اَشأنَ فرمأن بٚدأ، بوگفته: «دویستأ پیأده سروأز، دویستأ نیزه دأره سروأز و هفتأدتأ سوأرکأرٚ سروأز حأضیرَ کونید کی ایمشٚب سأعت نُه بٚشٚد قیصریه ور. 24 ایتأ اسبٚم پولسٚ رِه حأضیرَ کونید کی سوأرَ به، و اونَ سأق و سألیم فرمأندأر فِلیکسٚ ورجأ فأرسأنید.» 25 اَ نأمه‌یَم فرمأندأر رِه بینیویشته: 26 «کلودیوس لیسیاس، فرمأندأر موحترم جنأبٚ فِیلکسَ سلأم رٚسأنه. 27 یوهودیأن اَ مردأکَ بیگیفته بود و خأستیدی اونَ بوکوشٚد. وختی بفأمٚستٚم رومٚ شین ایسه، چنتأ سروأز اوسه کودم و اونَ نیجأت بٚدأم. 28 بأزون اونَ ببردم اَشأنٚ شورأ میأن کی بیرون بأیٚه چی بوکوده. 29 بفأمٚستٚم اوشأنی بوگو موگو خوشأنی یوهودی عقیده‌یأنٚ سٚر ایسه و البت ایچی نوبو کی بٚبه اونی وأسی اونَ زندأنی یا اعدام کودن. 30 ولی وختی بفأمٚستٚم جوفت و کلک دیچِده کی اونَ بوکوشٚد، تصمیم بیگیفتٚم اونَ شیمی ورجأ اوسه کونم. هرکی‌یٚم اونی جَا شیکأیت بٚدأره، گم بأیٚه شیمی ورجأ.» 31 پس هو شب سروأزأن خوشأنی فرمأنده فرمأنٚ اَمرأ، پولسَ آنتی پاتریسٚ شهر فأرٚسأنِده. 32 فردأیی صُبٚ رِه پولسَ سوأرکأرٚ سروأزأنٚ دٚس بیسپأردٚد کی اونَ ببرد قیصریه و خودشأن وأگردٚستٚده قلعه میأن. 33 وختی فأرٚسِده قیصریه، پولسَ ایتأ نأمه اَمرأ بیسپأردٚد فرمأندأرَ. 34 فرمأندأر نأمه‌یَ بخأنده. بأزون پولس جَا وأوٚرسِه: «کویه شین ایسی؟» پولس جوأب بٚدأ: «قیلیقیه شین ایسٚم.» 35 فرمأندأر اونَ بوگفته: «هر وخت اوشأنی کی تی جَا شیکأیت دأرٚده فأرٚسِد، تی پرونده‌یَ فأرٚس فوروس کونم.» بأزون، فرمأن بٚدأ کی اونَ پأدیشأ هیرودیسٚ قصرٚ دورون بٚدأرٚد. |
© 2024 Transform Iran
Transform Iran