اعمالٚ رسولأن 22 - Gilaki New Testament1 «می پئرأن و جأن دیلٚ برأرأن، وئألید می دفأع وأسی ایپچه گب بٚزٚنم.» 2 وختی بشتأوستٚد کی خوشأنٚ زوأن اَمرأ گب زِئندره، ویشتر سأکیتَ بوستد. 3 او وخت پولس بوگفته: «منم شیمی مأنستَن یوهودی ایسٚم و قیلیقیه طرسوسٚ شهرٚ میأن بودونیأ بأمؤم. ولی هه اورشلیم میأنی، غمالائیل ورجأ درس بخأندم. اونی مکتبٚ میأن یوهودٚ قأنونأن و رسم و روسومأنَ دیقت اَمرأ بأمؤختم، و خٚیلی غیرت دأشتیم کی هرتأ کأرٚ میأن خودا ایحترأمَ بأعیث ببم، هوطویی کی شومأنم ایمرو اونی رِه غیرت دأریدی. 4 من عیسا طریقتٚ شأگردأنَ تأ اوجأیی کی نفس دأشتید شکنجه و آزأر دِئیم؛ و مسیحی مردأکأن و زنأکأنَ گیفتیم و زندأنی کودیم. 5 پیله کأهین و یوهود پیله شورأ آدمأن شأهید ایسٚد کی حِئقتَ گفتأندرم، چونکی اوشأنی جَا یوهودٚ پیله کسأنٚ رِه کی دمشق میأن ایسأبود ایتأ نأمه فأگیفتٚم کی وئألد مسیحیأنَ بیأفٚم و دٚس دٚوٚسته بأوٚرٚم اورشلیم کی موجأزأت بٚبٚد. 6 «وختی دمشق رأ میأن ایسأبوم، ظهرٚ موقع نأخٚوٚرکی ایتأ نور کی می چومَ خو ور فأکٚشأنِیی آسمأن جَا می دؤرٚور دٚتأوٚسته، 7 او جوری کی زیمین رو بٚکفتٚم و ایتأ صدایَ بشتأوستم کی مٚرَه گفتی: "شائول! شائول! چٚره مٚرَه آزأر دیهی؟" 8 «وأورسئم: "خوداوندا، تو کیسی؟" «بٚفرمأسته: "من عیسایٚ ناصری ایسٚم، هونی کی تو اونَ عذأب دِئندری!"» 9 «می دورٚوٚریأن نورَ فأندرستٚد، ولی اونی کی می اَمرأ گب زِئی گبأنَ نفأمٚستٚد.» 10 «بوگفتم: "خوداوندا، هسأ چی وأ بوکونم؟"» «خوداوند بٚفرمأسته: "ویریز و بوشو دمشقٚ میأن. اویَه اونچی کی لأزیم ایسه تٚرَه بوگفته به."» 11 «من او نورٚ توندی جَا کورَ بوستم. پس اوشأنی کی می اَمرأ بود می دٚسَ بیگیفتٚده و ببردٚد دمشق.» 12 اویَه اینفر حنانیا نأم ایسأبو کی دیندأرٚ مردأی بو، و دیقت اَمرأ خودا دستورأنَ ایطأعت کودی و دمشقٚ یوهودیأنٚ میأن عزیز و موحترم بو. 13 حنانیا می ورجأ بأمؤ، می ورجأ بٚپأ بئیسأ و بوگفته: "اَی برأر شائول، تی چوم بیدینه!" هو وخت می چومأن وأزَ بوسته و بتأنستٚم اونَ بیدینٚم! 14 «بأزون مٚرَه بوگفته: "اَمی پیله بأبأیأنٚ خودا، تٚرَه اینتخأب بوکوده کی اونی ایرأده‌یَ بدأنی و او عأدیل ینی مسیح کی اونی اَمؤن وعده بٚدأ بوبوسته‌یَ تی چومأنٚ اَمرأ فأندری، ایتأ گب اونی دٚهٚنٚ جَا بشتأوی. 15 تو وأستی اونٚ پیغأمَ همٚتأ جیگأ ببری و اونچی‌یَ کی بیدِه و بشتأوستی، همٚتأنٚ رِه وأگویا بوکونی. 16 هسأ چٚره بیکأر ایسأیی؟ ویریز و تعمید بیگیر، و اونٚ نأمَ دؤخأن کی تی گونأیأنٚ جَا پأکَ بی." 17 «ایتأ روج می وأگردٚستنٚ پٚسی اورشلیمٚ ور، هوطویی کی معبد دورون دوعأ کودأندوبوم، بی‌ایختیأرَ بوستم 18 ایتأ رویأ میأن اونَ بیدِم کی گفتی: "توندأ بو! اورشلیم جَا بوشو بیرون چونکی اَ شهرٚ آدمأن تی پیغأمَ قوبیل نوکونٚد." 19 «بوگفتم: "خوداوندا، ولی اوشأن حتم دأنٚده کی من مسیحیأنَ هرتأ کنیسه دورون بٚزٚن بیگیر و زندأنی کودیم. 20 وختی تی شأهید ایستیفأن بوکوشته بوستی، من اویَه بٚپأ ایسأبوم، قوبیل دأشتیم کی اونَ بوکوشٚد و اوشأنی کی اونَ سنگسأر کودأندوبودٚ رختأنَ دأشتیمی." 21 «ولی خوداوند مٚرَه بٚفرمأسته: "اورشلیمٚ جَا بیرون بیأ، چونکی تٚرَه خأیم او دؤر دورٚ جأجیگأیأن اوشأنی کی یوهودی نییٚده ورجأ اوسه کونم!» 22 مردوم پولس گبأنَ خُب بشتأوستٚده، تأ اویَه کی اون بوگفته اوشأنی کی یوهودی نوبود. پس همٚتأن خوشأنٚ صدایَ بولندَ کودٚد، دأد زِئید: «اَطو چی آدمَ وأستی جٚه بین بٚبٚرید! اون شأیسته نییٚه کی زٚنده بمأنه!» 23 مردوم تترج فریأد زئیدی، و خوشأنٚ رختأنَ هوا جؤر تکأن دٚئیدی و خأکَ رأستَ کودید. پولس وأگویا کونه کی رومٚ شینه 24 او وخت او هنگ فرمأنده، پولسَ بأوٚرده قلعه دورون و فرمأن بٚدأ اونَ شلأق بٚزٚنٚد کی خو جورمَ ایعترأف بوکونه. بوخصوص خأستی بٚدأنه کی چٚره مردومَ اَطو غیظَ گیفته. 25 وختی اونَ دٚوٚستأندوبود کی شلأق بٚزٚنٚد، پولس او افسرَ کی اویَه بٚپأ ایسأبو بوگفته: «آیا قأنون شٚمٚره وئأله ایتأ رومی‌یَ بودونٚ اَنکی موحأکمه بوکونید شلأق بٚزنید؟» 26 او افسر وختی اَنَ بشتأوسته بوشؤ فرمأنده ورجأ و بوگفته: «هیذره دأنی چی کودأندری؟ اَ مردأی رومٚ شین ایسه!» 27 فرمأنده بوشؤ پولسٚ ورجأ و وأوٚرسِه: «بوگو بیدینٚم، آیا تو رومٚ شین ایسی؟» پولس بوگفته: «هطویه، من رومٚ شینم.» 28 فرمأنده بوگفته: «منم رومٚ شین ایسٚم، خٚیلی مِرِه گیرأن بینیشته کی بتأنستٚم رومی ببم!» پولس بوگفته: «ولی من رومی بودونیأ بأمؤم!» 29 اوشأنی کی خأستید اونی جَا وأخأست بوکوند، وختی بشتأوستٚده رومی ایسه، عجله اَمرأ جٚه اویَه دورَ بوستٚد. فرمأنده‌یٚم خٚیلی بٚتٚرسه چونکی فرمأن بدأبو کی ایتأ رومی‌یَ دٚوٚدٚد و شلأق بٚزٚنٚد. پولس یوهودٚ شورأ جولو 30 فردأیی، فرمأنده پولسَ زندأنٚ جَا بیرون بأوٚرٚد و فرمأن بٚدأ پیله کأهینأن و یوهودٚ شورأ ایتأ جلسه بٚنٚد. پولسَم حأضیرَ کوده کی اَ وأخأستٚ میأن بیرون بأیٚه اَ گریفتأریأن چی وأسی ایسه. |
© 2024 Transform Iran
Transform Iran