اعمالٚ رسولأن 20 - Gilaki New Testament

پولس مقدونیه و یونأنَ سٚفر کونه

¹ وختی بلوأ آرأمَ بوسته، پولس مسیحیأنٚ دونبأل اوسه کوده و موعیظه و تِشویقٚ پٚسی، اوشأنی جَا خوداحافظی بوکوده و رأ دکفته مقدونیه ور.

² خو رأ میأن هرتأ شهرَ کی فأرٚسِیی، مسیحیأنٚ رِه موعیظه کودی. اَطویی بو کی، یونأنَ فأرٚسِه

³ و سه مأه اویَه بئیسأ. اون آمأدَه بوستأندوبو کی کشتی اَمرأ بشه سوریه، ولی وختی بٚفأمٚسته کی یوهودیأن اونی کوشتٚنٚ رِه جوفت و کلک دیچِده، تصمیم بیگیفته کی جٚه مقدونیه ور بشه او رأ.

⁴ چن نفرم تأ آسیا اونی اَمرأ بوشؤده کی اوشأنی نأم سوپاترس کی بیریه شین بو، اَرِستَرخوس و سکندس کی تسالونیکی شین بود، گایوس کی دِربه شین بو، تیموتائوس، تیخیکوس و تروفیموس کی همٚتأن آسیا میأن خوشأنی شهرأنَ وأگردستأندوبود.

⁵ اَشأن پیشتر رأ دکفتد و تروآسٚ میأن اَمی رأفأ بئیسأده.

⁶ عَیدٚ پِسَحٚ تومأنَ بوسته پٚسی، فیلیپی شهرٚ جَا کشتی میأن بینیشتیم و پِنج روج کی بوبوسته آسیا میأن تروآسٚ بندرَ فأرٚسِییم و ایتأ هفته اویَه بئیسأییم.

پولس تروآسَ آخری وأرٚ رِه دئندره

⁷ اوّل روج هفته، نأنٚ پأرَه کودنٚ رِه جمَ بوستیم و پولس مردومٚ رِه گب زِئی؛ و چونکی فردأ خأستی او شهرٚ جَا بشه، تأ نیصفٚ شبٚ رِه گب زِئنٚ دٚرأزه بٚدأ.

⁸ او تلأر خأنه میأن کی همٚتأن ایسأبیم، خٚیلی چرأغأن روشن بود.

⁹ هطو کی پولس گبَ دٚرأزه دٚئندوبو، ایتأ جوأن پنجره ورجأ نیشته بو کی اونی نأم اِفتیخُس بو، اونَ خأب بٚسٚرَ شؤ و سیومی طبقه جَا بٚکفته بیجیر و بٚمٚرد.

¹⁰ پولس بوشؤ بیجیر و خؤرَه تأوٚدأ او جوأنٚ مردأکٚ سٚر و بوگفته: «غورصه نوخورید. اون زٚنده‌یه!»

¹¹ او وخت وأگردسته تلأر خأنه میأن و نأنَ وأچرده و بوخورد. بأزون ایوأردِه گبَ سٚر بیگیفته تأ یوأش یوأشِی هوا روشنَ بوسته. او وخت اوشأنَ بٚنأ بوشؤ.

¹² اَ وختٚ میأن، او جوأنَ سأقٚ سألیم ببردٚد بٚخأنه و همٚتأنٚ دیل خٚیلی آرأم بیگیفته.

پولس افسُسٚ کیلیسا پیله کسأنَ دینه

¹³ پولس جٚه خوشکی رأ خأستی بشه اَسوس، ولی اَمأن کشتی اَمرأ پیشتر جٚه اون فأرٚسِییم او شهرٚ میأنی.

¹⁴ اَسوسٚ میأن کس‌کسَ فأرٚسِییم و کشتی اَمرأ بوشؤییم مِتیلینی میأن

¹⁵ فردأیی، خیوسٚ جزیره رأ دٚوأرستیم و دویُمی روجٚ رِه ساموسٚ بندرَ فأرٚسِییم، و سیومی روجٚ رِه بوشؤییم میلیتوسٚ میأن.

¹⁶ پولس اَیدٚفأرِه نخأستی افسُسٚ شهرٚ میأن گیر بوکونه، چونکی توندٚ تأکیدی دأشتی اگه بٚبه، پنتیکأستٚ عَیدٚ رِه اورشلیمٚ میأن بئیسه

¹⁷ ولی وختی میلیتوسٚ میأن کشتی جَا بیجیر بأمؤییم، افسُسٚ کیلیسا ریش‌سیفیدأنٚ رِه پیغأم اوسه کوده کی بأیٚد کشتی میأن و اونَ بیدینٚد.

¹⁸ وختی بأمؤده، اوشأنَ بوگفته: «شومأن دأنیدی جٚه او روج کی می پأیَ آسیا میأن بنأم تأ هسأ،

¹⁹ می سٚرٚ بیجیر تأوٚدأم و آرسو و آه اَمرأ خوداوندَ خیدمت بوکودم و همیشٚک مٚردنٚ می چومأنٚ جولو دِئیم، چونکی یوهودیأن می کوشتٚنٚ رِه جوفت و کلک دیچِیید.

²⁰ تومأمٚ اَشأنٚ اَمرأ، اونچی کی شِمِره فأیده دأشتی، موعیظه کودنٚ رِه، هیذره می دیلَ شک رأ نٚدأم، بلکی چی خأنه‌یأنٚ میأن و چی مردومٚ میأن، شٚمٚره حِئقتَ بأمؤختم.

²¹ هطویم، چی یوهودیأنَ و چی یونأنیأنٚ رِه وأگویا بوکودم کی وأستی توبه اَمرأ، خودا ور وأگردٚد، و اَمی خوداوند، عیسایٚ مسیحَ، ایمأن بٚدأرٚد.

²² «اَسه خودا روحٚ فرمأنٚ اَمرأ خأیم بٚشٚم اورشلیم و نأنٚم اویَه چی مِرِه پیش اَیِه،

²³ جغرز اَنکی هرتأ شهرٚ میأن روح‌القدس مٚرَه گه کی زندأن و زحمت تی رأفأ ایسأ.

²⁴ ولی می جأن مِرِه نی‌اَرزِه مگه اَنکی اونَ او خیدمتٚ رأ دورون بنم کی عیسای خوداوند مٚرَه بیسپأرده و اونَ کأمیل انجأم بدم، ینی خودا فیضٚ اینجیلٚ خورومٚ خٚوٚرَ البأقی آدمأنَ فأرسأنم.

²⁵ «دأنٚم کی اَنٚ پٚسی، هیتأ جٚه شومأن کی خودا پیغأمَ چن وأر شِمِره وأگویا بوکودم، دِه مٚرَه نیدینیدی.

²⁶ هنٚ وأسی، ایمرو شیمی اَمرأ تومأنَ کودأندرم کی اگه اینفر شیمی میأن جٚه بین شؤئؤنٚ رأ میأن بشه، اونی خون می گردن نییٚه.

²⁷ چونکی هیکسٚ رِه کم نٚنأم، بلکی خودا پیغأمَ همٚتأنَ فأرٚسأنِم.

²⁸ «پس شیمی حواس شیمی رو و خودا قومٚ رو بمأنه. خودا گلّه ینی کیلیسایَ کی خو خونٚ اَمرأ بیهه‌یَ خورأک فأدید و شبأنی بوکونید، او کیلیسا کی روح‌القدس شٚمٚره اونٚ رو مسئول چأکوده.

²⁹ دأنٚم او وخت کی بٚشٚم او معلمأن کی دورُغ گده، وأشی گورگأنٚ مأنستَن شیمی جأن دکفده و گله‌یَ رحم نوکونٚده.

³⁰ ایتأ عیده جٚه شیمی میأنم حِئقتَ سرأ کونأ نیشأن دٚهٚده کی مردومَ خوشأنی دونبأل فأکٚشأنٚد.

³¹ پس، شٚمٚره بٚپأیید! جٚه خأطرَ ندید اَ سه سألٚ میأن کی شیمی اَمرأ ایسأبوم، تترج شٚمٚره پأستأندوبوم و شبندروج دوعأ میأن شِمِره آرسو فوکودیم.

³² «و هسأ شٚمٚره خودا دٚس و اونی فیضٚ کلامَ ایسپأرم کی قودرت دأره شیمی ایمأنَ چأکونه و تومأمٚ اوشأنی کی تقدیس بوبوستده اَمرأ، شٚمٚره‌یٚم ارث فأده.

³³ «دینیدی کی من هیوخت هیکسٚ مأل و رختَ چوم نأشتیم،

³⁴ بلکی اَ دٚسأنٚ اَمرأ همیشٚک کأر بوکودم کی خودمٚ خرج و اوشأنی کی می اَمرأ ایسأبودٚ خرجَ فأدٚم.

³⁵ سخت کأر کودن و فِقِرأنٚ یاور دٚئنٚ میأنم تترج شِمِره نومونه بوم، چونکی عیسایٚ خوداوندٚ کلامَ بٚخأطر دأشتیم کی فرمأستی: فأدأن، فأگیفتنٚ جَا بِیتره.»

³⁶ او وخت کی پولسٚ گب تومأنَ بوسته، زانو بٚزِه و اَشأنٚ اَمرأ دوعأ بوکود.

³⁷ بأزون، همٚتأن خٚیلی گریه بوکودٚد و پولسَ کٚشأ گیفتٚد، مأچی بٚدأده.

³⁸ اونچی کی ویشتر جٚه همٚچی اوشأنَ غورصه بٚدأ، پولسٚ اَ گب بو کی بوگفته بو: «دِه مٚرَه نیدینیدی». او وخت اونَ ببردٚد کشتی‌یَ فأرٚسأنِد.