اعمالٚ رسولأن 19 - Gilaki New Testamentپولسٚ سیومی بشأرتی سٚفر 1 هو زمأتٚ میأن کی اَپلس قرنتسٚ شهرٚ دورون ایسأبو، پولسٚم او سأمأنٚ شهرأنٚ دورون سٚفر کودی، تأ اَنکی فأرٚسِه افسُسٚ شهرٚ میأن و اویَه چنتأ ایمأندارٚ اَمرأ مولأقأت بوکود. 2 پولس اَشأنَ وأوٚرسِه: «آیا وختی عیسایٚ مسیحَ ایمأن بأوٚردید، روح‌القدسَ بیأفتید؟» جوأب بٚدأده: «نه اَمأن حتّا نأنیم روح‌القدس چیسه!» 3 پولس وأوٚرسِه: «پس کویتأ ایمأنٚ اَمرأ ایعترأف بوکودید و تعمید بیگیفتید؟» جوأب بٚدأده: «اونچی‌یَ کی یوحنا اَمٚرَه آمؤختی.» 4 پولس اَشأنَ بوگفته: «تعمیدی کی یوحنا دٚئی اَنٚ وأسی بو کی مردوم گونأ جَا دٚس اوسأنٚد، و خودا ور وأگردٚد و عیسایَ ایمأن بأوٚرٚد، ینی هو کسی کی یوحنا اونی اَمؤنٚ وعده‌یَ دٚئی.» 5 وختی اَنَ بشتأوستٚد، عیسایٚ خوداوند نأمٚ اَمرأ تعمید بیگیفتٚده. 6 بأزون، او وخت کی پولس خو دٚسَ اوشأنٚ سٚر بٚنأ، روح‌القدس اَشأنٚ رو بأمؤ و جوروأجور زوأنأنٚ اَمرأ گب بٚزِده و نوبوّت بوکودٚد. 7 شأ گفتن اَ آدمأن دوأزده نفر بوستید. پولس خیدمتأن افسُسٚ میأن 8 اَنٚم بٚگم کی، پولس سه مأهٚ میأن هرتأ شبّأت شؤیی کنیسه دورون و یأرستنٚ اَمرأ گب زِئی، و خودا ملکوت جَا گب‌گب کودی و اوشأنٚ رِه دلیلأنی اَوٚردی کی قأنع بٚبٚد. 9 ولی ایتأ عیده سٚرکش و لجبأز بوبوستٚد و ایمأن اَوٚردٚنٚ جَا تمرد بوکودٚد، و مردومٚ چومأنٚ ورجأ «طریقتَ» بد گفتیدی. پس پولس اوشأنَ بٚنأ بوشؤ و ایمأندأرأنَ خو اَمرأ ببرد. بأزون هرتأ روج تیرانوسٚ گب زِئن تألأرٚ میأن بوگو بشتأو وأسی مردومَ جمَ کودی. 10 دو سأل اَطویی دٚوأرٚسته تأ اَنکی تومأمٚ آسیا آدمأن هم اوشأنی کی یوهودی بود و هم اوشأنی کی یونأنی بود خودا پیغأمَ بشتأوستٚد. 11 خوداوند پولسَ قودرت فأدأ کی عجیبٚ موجیزه‌یأن بوکونه، 12 او جوری کی هر وخت ایتأ دستمال یا ایتأ پٚلک جٚه اونی رختَ نأخوش احوأل آدمأنٚ رو نأئیدی، شفأ گیفتیدی و پٚلیدٚ روحأن اوشأنی جأنٚ جَا بیرون شؤئیدی. 13 ایوأر ایتأ عیده جٚه یوهودیأن کی خأنه بٚدوش بود و اَ شهر او شهر گردستیدی و پٚلیدٚ روحأنٚ بیرونَ کودن وأسی ورد خأندیدی، خأستید ایمتحأن بوکوند کی اگه عیسای خوداوندٚ نأمَ ببرد، تأنٚده پٚلیدٚ روحأنَ جٚه آزأریأنٚ جأن بیرونَ کونٚد یا نه. او وردیٚم کی خأندیدی اَن بو: «اَی پٚلیدٚ روح، هو عیسایی‌یَ کی پولس اونی جَا موعیظه کونه، تٚرَه قسم دیهیمی کی اَ آزأری جأنٚ جَا بیرون بأیی!» 14 اَ کأرَ ایتأ یوهودی کأهین کی «اِسکیوا» نأم دأشتی هفتأ پٚسرأن انجأم دٚئیدی. 15 ولی وختی اَ کأرَ ایتأ آزأری رو ایمتحأن بوکودٚد، پٚلیدٚ روح جوأب بٚدأ و بوگفته: «من عیسایَ شنأسٚم، پولسَم شنأسٚم، ولی شومأن دِه کیسیدی؟» 16 بأزون، آزأری اوشأنَ فوتورکسته و اوشأنَ جوری بٚزِه کی زخم و زیلی و برأنده جٚه خأنه بوگروختٚده! 17 اَ خٚوٚر تومأمٚ او افسُسٚ سرتأسرٚ بیپیچسته و همٚتأ یوهودیأن و یونأنیأنٚ گوش فأرٚسِه، او جوری کی همٚتأ بترسئیدی و جٚه اونٚ پٚسی عیسایٚ خوداوندٚ نأمَ ایحترأم نئهیدی. 18 خٚیلی جٚه اوشأنی کی مسیحَ ایمأن بأوٚردٚد، بأمؤده و مردومٚ چومأنٚ ورجأ خوشأنٚ کردکأرأنَ کی پور جٚه گونأ بو ایعترأف بوکودٚد. 19 ایتأ عیده‌یٚم کی پیشتر جأدو جنبلٚ رِه موشغول بود، خوشأنٚ طلسمأن و نیویشته‌یأنَ بأوٚردٚد و همٚتأنٚ ورجأ بوسوجأنِده. وختی اوشأنَ قیمت بوکودٚد، پنجأه هیزأرتأ نوقره سکه بوستی. 20 اَ مأجیرأ او سأمأنٚ میأن نیشأن دٚئی کی خودا پیغأم چوطو جولفٚ اَثر بٚنأ. بلوأ دکفتن افسسَ میأن 21 تومأمٚ اَ ایتفأقأنٚ پٚسی، پولس جٚه خودا روحٚ ور هیدأیت بوبوسته کی پیشتر جٚه اَنکی بشه اورشلیم، جٚه مقدونیه و اَخائیه رأ دٚوأره. اون گفتی: «اونٚ پٚسی وأستی رومٚم بٚشٚم!» 22 پس خو همکأرأن، تیموتائوس و ارسطوسَ پیشتر اوسه کوده یونأنٚ دورون و خودش ایپچه ویشتر آسیا میأن بئیسأ. 23 ولی هه زمأتٚ میأن بوستی کی، افسُسٚ میأن ایتأ شورش مسیحیأنٚ ضد سٚر بیگیفته بوبوسته. 24 اَ شورش اینفر دیمیتریوس نأمٚ اَمرأ کی مردومَ اَنتیریک کودی شورو بوبوسته کی ایتأ زرگر بو و نوقره اَمرأ جٚه آرتمیس، کی ایتأ جٚه یونأنیأنٚ الهه‌یأن بو، موجسمه چأکودی و شهر اوستأکأرأنٚ رِه خٚیلی کسب و کأر چأکوده بو. 25 ایروج دیمیتریوس، کأرٚگٚرأن و خو همکأرأنَ جمَ کوده و اَشأنَ بوگفته: «آقأیأن، اَمی دخل و خرج جٚه اَ کأر ایسه. 26 ولی هوطو کی دأنیدی و بیدِه و بشتأوستیدی، اَ پولس خٚیلیأنَ قأنع بوکوده کی اَ بُتأنٚ خودا نییٚده. جٚه اَ خأطر اَمی بأزأر کسأتَ بوسته! اَطو نییٚه کی فقد اَمأن افسُس میأن ضرر دینیمی، بلکی اَمی همکأرأن تومأمٚ آسیا سرتأسرٚ میأن ورشکستَ بٚدأ. 27 و فقد اَمی کسب و کأر کسأتَ نیبه، بلکی حتّا ایمکأن دأره اَمی اَ الهه معبد، آرتمیس، مردومٚ چوم و دیلٚ جَا بٚکفه و اَ خودایی کی پور جٚه جلال ایسه جٚه خأطر بشه، او خودا کی نه فقد تومأمٚ آسیا مردوم بلکی تومأمٚ دونیأ سرتأسرٚ مردوم اونَ عیبأدت کونٚده.» 28 وختی اوشأنی کی اویَه ایسأبود اَنَ بشتأوستٚده، غیظَ گیفته، ایجگره بٚزِده: «افسسیأنٚ آرتمیس پیلّه ایسه!» 29 ایپچه‌ایپچه مردوم جٚه دؤرٚور جمَ بوستد و پور زمأت نوبوسته کی ایتأ بلوأ شهرٚ میأن بیپیچسته. و همٚتأن هوجوم ببردٚد او شهر تمأشأخأنه ور و پولسٚ همسفرأن گایوس و ارِستَرخوسَ کی مکادونیه شین بود بیگیفتٚده و فأکش فأکش موحأکمه وأسی ببردٚد. 30 پولس خأستی دیخألت بوکونه، ولی مسیحیأن ولأشتٚده. 31 چن نفر جٚه او اوستأنٚ پیله کسأنٚم کی پولس ریفِقأن بود، اونی رِه پیغأم اوسه کودٚد و خأهیش بوکودٚد کی موسأبقه میدأنٚ میأن پأ نٚنَه. 32 او میدأنٚ میأن ایتأ بلوأ بوبوسته. مردوم تأ نفس دأشتیدی فریأد زِئندوبود و هرکی ایچی گفتی. اوشأن ویشتریأنٚم نأنستیدی چی وأسی اویَه بأمؤده. 33 اَ میأن چنتأ یوهودی، ایسکندرَ بیأفتده و اونَ پیش تأوٚدأده، اونی جَا بٚخأستده کی اَ مأجیرأیَ نقل بوکونه. ایسکندر خو دٚسٚ تکأن دٚئنٚ اَمرأ مردومٚ جَا بٚخأسته کی سأکیتَ بد و حقٚ سعی بٚزِه ایچی بٚگه. 34 ولی وختی بفأمستده کی یوهودی ایسه، صدایَ بوجؤرتر ببردٚد: «افسسیانٚ آرتمیس پیلّه ایسه!» اَ سٚر و صدا تأ دو سأعت درأزه بٚدأ. 35 آخرپٚسی شهردأر بتأنسته اَشأنَ آرأمَ کونه و چن کلمه گب بٚزٚنه. شهردأر بوگفته: «اَی افسُسٚ مردوم، همٚتأن دأنیدی کی اَمی شهر افسُس، پیله آرتمیسٚ معبدَ حیفأظت کونه و اونی شمأیل جٚه آسمأن اَمِرِه زیمین رو بٚکفته. 36 چونکی اَنی میأن شکی ننأ، پس اگه اینفر ایچی بٚگه، شومأن نوأستی زود نأرأحتَ بید و ایتأ اَلکی کأر بوکونید. 37 شومأن اَ دو نفرَ اَیَه بأوٚردید، ولی نه جٚه اَمی معبد ایچی بودوزدأنِده و نه اَمی الهه حورمٚتَ بشکنِده. 38 اگه دیمیتریوس و اوستأ کأرأن اینفرٚ جَا شیکأیت دأرٚده، محکمه در وأز ایسه و قأضیأنٚم حأضیر آمأده کی شیکأیتأنَ فأرٚس فوروس بوکوند. وئألید اَشأن قأنونی رأیأنٚ جَا پیش بٚشٚد. 39 اگه ایتأ دِه موضو جَا شیکأیت بٚبه، شهرٚ شورأ رسمی جلسه دورونی فأرٚس فوروس به. 40 چونکی اَ خطر وجود دأره کی رومی حأکیم ایمرو بلوأ وأسی، اَمی جَا وأخأست بوکونه. اگه اَطوچی بوکونه نتأنیم جوأب بٚدیم و هیذره دلیل اونٚ قأنع بوستنٚ رِه نأریم.» 41 بأزون، اَشأنَ مرخصَ کوده و همٚتأن بوشؤده. |
© 2024 Transform Iran
Transform Iran