اعمالٚ رسولأن 18 - Gilaki New Testamentیوهودیأنٚ شورش قرنتس میأن 1 اونٚ پٚسی، پولس جٚه آتنٚ بوشؤ قرنتس. 2 او شهر میأن ایتأ یوهودی مردأکٚ اَمرأ کی پونتوسٚ شین بو و آکیلا نأم دأشتی آشینأ بوبوسته. اون خو زنأکٚ اَمرأ کی اونی نأم پریسکیلا بو تأزٚگی ایتالیا جَا بأمؤ بو قرنتس میأن، چونکی کلودیوسٚ قیصر همٚتأ یوهودیأنَ روم جَا بیرونَ کوده بو. 3 پولس اوشأنی ورجأ بئیسأ و کأر کودنَ موشغول بوبوسته چونکی اونم اَشأنٚ مأنستَن چأدر دؤختی. 4 پولس هرتأ شبّأت شؤیی کنیسه و یوهودیأن و یونأنیأنٚ اَمرأ بوگو بشتأو کودی و حقٚ سعی زِئی کی اوشأنَ خو اَمرأ هم نظر چأکونه. 5 بأزون کی سیلاس و تیموتائوس جٚه مقدونیه فأرٚسِده، پولس تومأمٚ خو وختَ بٚنأ موعیظه کودنٚ رِه و یوهودیأنٚ رِه دلیل اَوٚردی کی عیسا هو مسیح ایسه. 6 ولی وختی یوهودیأن اونی اَمرأ موخألفت بوکودٚد و فأش بٚدأده، پولس او شهرٚ گرد و خأکَ خو لیوأس جَا بتکأنه و بوگفته: «شیمی خون شیمی گردن بٚبه! شیمی خون می گردن ننأ. جٚه اَنٚ پٚسی خودا پیغأمَ اوشأنی‌یَ کی یوهودی نییٚده فأرسأنم.» 7 بأزون پولس کنیسه‌یَ بٚنأ بوشؤ اینفرٚ خأنه کی اونی نأم تیتیوس یوستوس بو و اونی خأنه کنیسه ورجأ نٚهأ بو، اون یوهودی نوبو و خودایَ عیبأدت کودی. 8 کْریسْپوس، کنیسه رییس و تومأمٚ اونی خأنوأر خوداوندَ ایمأن بأوٚردٚد. خٚیلیأنم دِه قرنتس میأن کی پولسٚ پیغأمَ بشتأوستده ایمأن بأوٚردٚد و تعمید بیگیفتٚد. 9 ایتأ شب خوداوند رویأ دورون پولسَ بٚفرمأسته: «هیکسٚ جَا نوأترسئن! یأرستنٚ اَمرأ موعیظه بوکون و اَ کأرٚ جَا دٚس نوأکٚشئن! 10 چونکی من تی اَمرأیٚم و هیکس نتأنه بلأیی تی سٚر بأوٚره. خٚیلیأن اَ شهرٚ میأن می شین ایسٚد.» 11 پس پولس یک سألٚ و نیم اویَه بئیسأ و خودا کلامَ اوشأنَ بأمؤخته. 12 ولی وختی گالیون، اَخائیه اوستأنٚ فرمأنروأ بوبوسته، یوهودیأن کس‌کسٚ اَمرأ پولس ضد ویریشتٚده و اونَ موحأکمه وأسی ببردٚد فرمأنروأ ورجأ. 13 اوشأن پولسَ موتهم بوکودٚد، بوگفتٚده: «اون مردومَ اَنتیریک کونه کی خودایَ ایجور دِه کی شریعتٚ اَمرأ فرق دأره عیبأدت بوکوند.» 14 ولی دوروست هو وخت کی پولس خأستی خو جَا دفأع بوکونه، گالیون اوشأنی ور کی ایدعأ بوکوده بود وأگردسته و بوگفته: «اَی یوهودیأن، خُب بشتأوید! اگه ایتأ جرم و جینأیت اَ میأنی نٚهأ بو، شیمی گبأنَ ایشتأوستیم، 15 ولی چونکی شیمی جنگ و دعوأ ای سری کلمه‌یأن، آدمأن و شیمی دینٚ وأسی ایسه، شومأن اونَ حل بوکونید. من نه اَ چیزأنَ دوس دأرم و نه دٚخالت کونم.» 16 او وخت اَشأنَ محکمه جَا بیرونَ کوده. 17 پس اَشأن بوشؤده، سوستانیسٚ سٚر فووُستٚده کی یوهودٚ کنیسه تأزه رییس بو و تأ خوردی محکمه بیرون اونَ بٚزِده. ولی گالیون، او اوستأنٚ فرمأنروأ هیذره محل ننأ. پولس وأگردٚستن اورشلیم و انطأکیه کی سوریه میأن نٚهأ بو 18 اَ ایتفأقٚ پٚسی پولس چن وختی او شهرٚ میأن بئیسأ و بأزون مسیحیأنٚ اَمرأ خوداحافظی بوکوده و پریسکیلا و آکیلا اَمرأ دریأ رأ جَا بوشؤ سوریه ور. کَنخَریه شهرٚ میأن یوهودیأنٚ رسمٚ مأنستَن خو سٚرٚ مویَ بتأشته، چٚره کی نذر بوکوده بو. 19 وختی افسُسٚ بندرَ فأرٚسِه، پریسکیلا و آکیلایَ کشتی دورونی بدأشته و بوگو بشتأوٚ وأسی بوشؤ یوهودٚ کنیسه میأن. 20 یوهودیأن اونی جَا بٚخأستده چن روج اَشأنٚ ورجأ بئیسه، ولی پولس قوبیل نوکوده چونکی خأستی سٚرٚ وختٚ فأرٚسِه اورشلیمٚ میأن. 21 اون بوگفته: «هرجوری بٚبه وأستی عَید روجٚ رِه اورشلیمٚ میأن بئیسٚم.» ولی قول بٚدأ کی اگه خودا بٚخأیٚه بأزون وأگرده افسُس. او وخت ایوأردِه کشتی میأن بینیشته و جٚه اویَه بوشؤ. 22 قیصریه بندر میأن اورشلیمٚ ایماندأرأنٚ دئنٚ وأسی کشتی جَا پیأده بوسته و بأزون جٚه دریأ رأ بوشؤ انطأکیه. 23 چن وخت کی بوبوسته جٚه اویَه بوشؤ غلاطیه و فریجیه و اویَه مسیحیأنَ بیدِه و اَشأنَ، ایمأنٚ میأن قوّت بٚدأ. اَپلس افسُسٚ میأنی آدمأنٚ آموجه 24 او وخت، ایتأ یوهودی کی اسکندریه شین بو و اونی نأم اَپلس بو، فأرٚسِه افسسَ میأن. اون خٚیلی خُب گب زِئن دورون اوستأد بو و خٚیلی دقیق موقدس کیتأبأن دأنشَ دأنستی. 25 اون خوداوندٚ رأ روشٚ جَا بأمؤخته بوسته بو، و روحٚ شور و حرأرتٚ اَمرأ گب زِئی و دیقت اَمرأ عیسا جَا اوشأنَ آمؤختی، اگه چی فقد یوحنا کی تعمید دٚئی جَا وأخب بو و بس. 26 وختی پریسکیلا و آکیلا اونی یأرستنٚ اَمرأ موعیظه‌یَ کنیسه میأن بشتأوستٚده، اونَ خوشأن ورجأ ببردٚد و خودا رأیَ خٚیلی دقیق اونَ بأمؤختٚده. 27 وختی اَپلس تصمیم بیگیفته بشه اَخائیه اوستأنٚ میأن، ایمأندأرأن اونَ تِشویق بوکودٚد و نأمه‌‌یأنی او سأمأنٚ مسیحیأنٚ رِه بینیویشتد کی گرمی اَمرأ اونی پیشوأز بٚشٚد. وختی اویَه فأرٚسِه، خٚیلی جٚه آدمأنٚ یاور دئنَ بأعیث بوبوسته کی فیضٚ جَا ایمأن بأوٚرده بود، 28 چونکی همٚتأنٚ ورجأ، تومأمٚ یوهودیأنٚ دلیلأنَ رٚدَ کودی و موقدس کیتأبأن جَا پور قوّت دلیلأن اَوٚردی کی عیسا رأس‌رأسِی هو مسیح ایسه. |
© 2024 Transform Iran
Transform Iran