اعمالٚ رسولأن 17 - Gilaki New Testament

پولسٚ بشأرت تسالونیکی میأن

¹ اَشأن آمفیپولیس و آپولونیا شهرأنٚ جَا دٚوأرٚستٚده و فأرٚسِده تسالونیکی میأن. او شهرٚ میأن یوهودیأن ایتأ کنیسه‌ دأشتیدی.

² پولس خو همیشٚکی عأدت مأنستَن بوشؤ کنیسه‌ میأنی و سه‌تأ هفته تترج شبّأت روجأن موقدس کیتأبأنٚ جَا جِمئیت اَمرأ گب زئیی،

³ و وأگویا کودی کی لأزیم بو مسیح رنج بیدِبی و مورده‌یأنٚ جَا ویریزه. اون گفتی: «اَ عیسا کی اونی خٚوٚرَ شٚمٚره بٚدأم، هو مسیح ایسه.»

⁴ ایتأ عیده جٚه اوشأنی کی اَ گبأنَ بشتأوستٚده، ای عیده جٚه یونأنی مردأکأنٚ اَمرأ کی خودایَ عیبأدت کودیدی و خٚیلی جٚه شهر زنأکأن کی سٚرشنأس بود قوبیل بوکودٚد کی ایمأن بأوٚرٚد.

⁵ ولی یوهود پیله‌ کسأن حسودی بوکودٚد و ایتأ عیده جٚه ارأذل و اوبأشَ جٚه کوچه بأزأر جمَ کودٚد و شورش رأ تأوٚدأده. بأزون، یاسونٚ خأنه‌یَ فوتورکستده کی پولس و سیلاسَ بیگیرٚد و موجأزأتٚ رِه محکمه دٚس بیسپأرٚد.

⁶ ولی وختی اَشأنَ یاسونٚ خأنه میأن نیأفتٚده، یاسونَ ایتأ عیده دِه جٚه ایمأندأرأن اَمرأ فأکش فأکش شهر پیله‌ کسأنٚ ورجأ ببردٚد، فریأد زئیدی: «پولس و سیلاس دونیأیَ فوگوردأنِده و هسأ بأمؤده اَیَه کی اَمی شهر آرأمٚشٚم خرأبَ کونٚد.

⁷ اَ یاسونٚم اوشأنَ خو خأنه میأن رأ بٚدأ. اَشأن همٚتأن خائین ایسٚد چونکی عیسایَ پأدیشأ دأنٚده، نه قیصرَ.»

⁸ شهر مردوم و هطویم قأضیأن اَ خٚوٚرٚ ایشتأوٚستٚنٚ اَمرأ پریشأنَ بوستٚد.

⁹ پس، شهر پیله‌ کسأن اَشأنٚ جَا قول فأگیفتد کی خلأف کأر نوکونٚد و اونٚ پٚسی اوشأنَ وِلَ کودٚد.

پولس و سیلاس بیریه میأن

¹⁰ هو شب مسیحیأن پولس، سیلاسَ دفأتن اوسه کودٚد بیریه ور. او شهر دورونم همیشٚکٚ مأنستَن یوهودٚ کنیسه‌ دورون بوشؤده کی اینجیلٚ پیغأمَ وأگویا بوکوند.

¹¹ ولی بیریه مردوم جٚه تسالونیکی مردوم نجیبت‌تر بود و شوق و ذوق اَمرأ اوشأنٚ پیغأمَ ایشتأوستیدی و هر روج موقدس کیتأبأنَ دیقت اَمرأ خأندیدی کی بیدینٚد پولس و سیلاسٚ گبأن خودا گبأنٚ مأنستَن ایسه یا نه.

¹² هطویی بو کی، خٚیلی جٚه یوهودیأن و خٚیلی جٚه یونأنی زنأکأن و مردأکأن کی شهرت دأشتیدی ایمأن بأوٚردٚد.

¹³ ولی وختی تسالونیکی یوهودیأن وأخبدأرَ بوستد کی پولس بیریه دورون موعیظه کونه، اویه‌یٚم بوشؤده و شورش بوکودٚد.

¹⁴ مسیحیأن دفأتن پولسَ دریأ کنأرٚ ور اوسه کودٚد، ولی سیلاس و تیموتائوس هویه بئیسأده.

¹⁵ پولس دورٚوٚریأن تأ آتن اونی اَمرأ بوشؤده و جٚه اویَه وأگردٚستٚد بیریه میأن و جٚه پولسٚ ور سیلاس و تیموتائوسٚ رِه پیغأم بأوٚردٚد کی هر چی زوتر بٚشٚد آتنٚ.

پولس آتنٚ مردومٚ رِه موعیظه کونه

¹⁶ وختی پولس آتن میأن سیلاس و تیموتائوسٚ رأفأ ایسأبو، جٚه اون همه بُتی کی شهر دورون نٚهأ بو پریشأنَ بوسته.

¹⁷ پس هر روج یوهودیأن و اوشأنی کی یوهودی نوبودٚ اَمرأ کی خودایَ عیبأدت کودیدٚ گب گب زِئن وأسی، یوهود کنیسه‌ میأن شؤئی و بأزأرٚ میأن هرکی‌یَ دٚئی اونی اَمرأ گب زِئی.

¹⁸ ایتأ دسته جٚه اپیکوری و رواقی دأنشمندأنم اونی اَمرأ بینأ کودٚد گب گب کودن. ای عیده جٚه اوشأن وأورسِئیدی: «اَ مردأی کی خٚیلی حرف زٚنِه حقٚ سعی زِئندره چی بٚگه؟» ای عیده‌یٚم گفتیدی: «اَطوچی‌یَ مأنه کی خأیه جٚه خودایأنی کی نشنأسیم جأنبدأری بوکونه.» اَشأن اَ گبأنَ زئیدی، چونکی پولس قیأمت و عیسا خوروم خٚوٚرَ وأگویا کودی.

¹⁹ پس اون او شهر تألأر میأن کی مردوم اویَه جمَ بوستید و ایتأ تپّه جؤر کی «آریوپاگوس» نأم دأشتی نٚهأ بو، دعوت بوکودید و بوگفتد: «بیأ و اَ تأزه مذهبٚ جَا ویشتر اَمِرِه گب بٚزٚن.

²⁰ چون او چیزأنی کی تو گی اَمِرِه تأزٚگی دأره و خأییمی ویشتر بشتأویم.»

²¹ تومأمٚ آتنٚ آدمأن و حتّا اوشأنی کی اویَه شین نوبود اَطو مأنستی کی اینگأر کأری نأشتٚد جغرز اَنکی کس‌کسٚ اَمرأ جمَ بد و تومأمٚ خوشأنٚ وختَ تأزه عقیده‌یأنٚ گب‌گب زِئن وأسی بٚنٚد.

²² پس پولس مریخٚ تپّه تألأرٚ میأن کی اویَه جمَ بٚدأ، مردومٚ جولو بٚپأ بئیسأ و بوگفته: «اَی آتنٚ آدمأن، دینٚم کی شومأن خٚیلی مذهبی ایسید،

²³ چون وختی شیمی شهر میأن دٚوأرٚستأندوبوم، خٚیلی شیمی عیبأدتگأیأنٚ دیقت اَمرأ فأندرستٚم. حتّا قوربأنی کودن وأسی جأجیگأیأنی‌یَ بیدِم کی اونی رو بینیویشته بوبوسته بو "پیشکشی کودن او خودا رِه کی بشنأخته نوبوسته." اَ خودا کی بودونٚ اَنکی اونَ بٚشنأسیدَ پرستٚش کونیدی، هونی ایسه کی خأیم اونی جَا شیمی اَمرأ گب بٚزٚنم.

²⁴ «اون هونی ایسه کی اَ دونیأ و هرچی کی اونی دورون نٚهأیَ چأکوده. چونکی اون خودش، آسمأن و زیمین صأب ایسه، اَ بُتخأنه‌یأنٚ میأن کی اینسأن دٚسٚ اَمرأ چأکوده بوبوسته زٚندیگی نوکونه،

²⁵ اون اَمی زحمت بٚکٚشه کأرَ ایحتیأج نأرِه، چونکی اون نیأز نأرِه! چونکی اون خودش همٚتأنَ زٚندیگی و نفس بخشه، و اینسأنٚ همٚتأ ایحتیأجٚ جٚه بین بٚره.

²⁶ اون تومأمٚ دونیأ مردومَ جٚه ایتأ اینسأن خلق بوکوده. ینی جٚه آدم، و قومأنَ اَ زیمینٚ دؤرٚور پٚخشَ کوده؛ اون دونیأ قومأن قودرت گیفتن و جٚه بین شؤئؤنٚ زمأتٚ و اوشأنٚ مرزأنَ جٚه پیشتر اینتخأب بوکوده.

²⁷ «خودا نیّت اَن بو کی مردوم اونی رِه وأموجد بلکی اونَ بیأفٚد، و اونَ فأرٚسٚد؛ هسأ اَنکی اون حتّا اَمی دیلٚ جَایٚم اَمٚرَه نیزدیکتر ایسه.

²⁸ چونکی اونی میأن ایسه کی زٚندیگی و حرکت و هستی دأریم.هوطو کی ایتأ جٚه شیمی شاعرأن بوگفته اونی نتأجٚ جَا ایسیم.

²⁹ پس هسأ کی جٚه خودا نتأج ایسیم، نوأستی خودایَ ایتأ بُت بدأنیم کی اوستأ کأرٚ دٚسٚ اَمرأ طلأ و نوقره و سنگ اَمرأ چأکوده بوبوسته.

³⁰ پیشترأن، خودا آدمأنٚ بی‌عقلی جَا خو چومَ دٚوٚستی، ولی اَسه همٚتأنَ فرمأن دِهه کی توبه بوکوند و اونی ور وأگردٚد.

³¹ چونکی ایتأ روجَ اینتخأب بوکوده کی اونی میأن، اَ دونیأ مردومَ، اینفرٚ اَمرأ کی خودش اینتخأب بوکوده عیدألت و اینصأفٚ اَمرأ قیضأوت بوکونه. خودا اَ آدمٚ جٚه مورده‌یأنٚ زٚنده کودنٚ اَمرأ، همٚتأنَ نیشأن بٚدأ کی اون کیسه.»

³² وختی بشتأوستٚده کی پولس ایتأ بٚمٚرده آدمٚ دروأره کی زٚنده بوسته گب زِئندره، اونَ رخشنَ گیفتٚد. ولی ای عیده‌یٚم بوگفتٚده: «خأییمی جٚه اَ مأجیرأ ایوأردِه اَمِرِه گب بزنی.»

³³ اَطویی بوبوسته کی پولس جٚه اَشأنٚ میأن بوشؤ بیرون.

³⁴ ولی هطو چن نفر اونی جَا ایطأعت بوکودٚد و ایمأن بأوٚردٚد. اَشأنٚ میأن دیونیسیوس، «آریوپاگوس» دسته جَا، ینی شهر انجمن شین بو، و ایتأ زنأکٚم داماریس نأم و چن نفر دِه.