اعمالٚ رسولأن 15 - Gilaki New Testament

اورشلیمٚ شورأ

¹ هو وخت میأن کی پولس و برنابا انطأکیه میأن ایسأبود، ایتأ عیده جٚه یوهودیه بأمؤده و مسیحیأنَ ایشتیوأ آمؤختأندوبود و گفتیدی: «اگه اینفر موسا رسم جَا وفأ نوکونه و ختنه نٚبه، ایمکأن نأرِه بتأنه نیجأت بیأفه.»

² پولس و برنابا اَنٚ وأسی خٚیلی اَشأنٚ اَمرأ بوگو موگو و موخألفت بوکودٚد، تأ آخرپٚسی قرأر بوبوسته انطأکیه مسیحیأن، چن نفرَ جٚه خوشأنی میأنی پولس و برنابا اَمرأ اوسه کونٚد اورشلیمٚ میأن کی اویَه روسولأن و کیلیسا پیله کسأنٚ ایعتقادَ بدأنٚد.

³ پس اَشأن کیلیسا بدرقه اَمرأ، رأ دکفتد اورشلیم ور و خوشأنی رأ سٚر، فینیقیه و سأمره شهرأنٚ میأنم مسیحیأنَ سٚربٚزِده و اَ خورومٚ خٚوٚرَ بٚدأده کی اوشأنی کی یوهودییٚم نوبود مسیحَ ایمأن بأوٚردٚد؛ و همٚتأن اَ خٚوٚرٚ ایشتأوٚستٚنٚ وأسی خوشألَ بوستد.

⁴ وختی فأرٚسِده اورشلیمٚ میأن، کیلیسا آدمأن و روسولأن و ریش سیفیدأن، اَشأنَ خوشرویی اَمرأ قوبیل بوکودٚد. پولس و برنابایٚم اونچی‌یَ کی خودا اوشأنی اَمرأ انجأم بٚدأ بویَ نقل بوکودٚد.

⁵ او وخت چنتأ جٚه مسیحیأن کی پیشتر فریسیأنٚ دسته شین بود، ویریشتٚده و بوگفتٚده: «تومأمٚ اوشأنی کی یوهودی نوبود و مسیحی بوبوستٚد وأستی ختنه بٚبٚد و موسا شریعتَ بٚدأرٚد.»

⁶ پس روسولأن و کیلیسا ریش سیفیدأن تصمیم بیگیفتٚده شورأ بٚنٚد کی اَ موضو‌یَ وأرٚسی بوکوند.

⁷ اَ شورأ میأن، خٚیلی بوگو موگو کودنٚ پٚسی، پطرس ویریشته و اَشأنَ بوگفته: «برأرأن، شومأن همٚتأن دأنیدی کی خٚیلی زمأت پیشتر خودا مٚرَه جٚه شیمی میأن اینتخأب بوکوده کی اینجیلٚ پیغأمَ اوشأنی‌یَ فأرسأنم کی‌ یوهودی نوبود کی اَشأن اونَ بشتأوٚد و ایمأن بأوٚرٚد.

⁸ خودا کی مردومٚ دیلٚ جَا خٚوٚر دأره، هوطو کی روح‌القدسَ اَمٚرَه فأدأ، اوشأنی کی یوهودی نوبودٚم فأدأ کی اَ حِئقتَ ثأبیت بوکونه کی اَشأنٚم اَمی مأنستَن قوبیل کونه.

⁹ «پس خودا اَمی میأن و اوشأنٚ میأن هیذره فرق ننأ، چون هوطو کی اَمی دیلَ ایمأن اَمرأ پأکَ کوده، اوشأنَ دیلٚم پأکَ کود.

¹⁰ هسأ، چٚره خأییدی خودا کأرٚ جَا ایرأد بیگیرید و ایتأ بأر البأقیأنٚ کولٚ رو بنید کی نه اَمأن بتأنستیم اونَ ببریم نه اَمی پیله بأبأیأن؟

¹¹ ایمأن نأریدی کی عیسایٚ خوداوندٚ فیضٚ اَمرأ، همٚتأن ایجور نیجأت یأفده؟»

¹² اَطویی بو کی، بوگو موگو تومأنَ بوسته. بأزون اوشأنی کی اویَه ایسأبود برنابا و پولسٚ گبأنَ بشتأوستٚده و اَشأن موجیزه‌یأنی‌یَ کی خودا اوشأنی کی یوهودی نوبودٚ میأن انجأم بٚدأ بو، وأگویا بوکودٚد.

¹³ جٚه اَشأنٚ پٚسی، یعقوبٚ نوبت فأرٚسِه. اون ویریشته و بوگفته: «برأرأن، بشتأوید.

¹⁴ پطرس شِمِره وأگویا بوکوده کی چوطو خودا اوّلی وأر اوشأنی کی یوهودی نوبودٚ رِه ظأهیرَ بوسته کی خو جلالٚ وأسی، جٚه اَشأنٚ میأن ایتأ تأزه قوم اینتخأب بوکونه.

¹⁵ و اَ موضوی ایمأن اَوٚردٚنٚ اوشأنی کی یوهودی نییٚد، دوروست پیغمبرأنٚ گبأنٚ اَمرأ ایتأ ایسه، هوطو کی بینیویشته بوبوسته:

¹⁶ "بأزون، وأگردم و داوودٚ بٚکفته چأدرَ ایوأردِه بٚپأ دأرم و اونٚ خرأبه‌یأنَ چأکونم و اونَ هو اوّلٚ مأنستَن وأگردأنم،

¹⁷ کی البأقی آدمأن بتأنٚد خوداوندٚ رِه وأموجد، حتّا تومأمٚ مردومی کی می نأمَ خوشأنٚ رو دأرٚده. اَن او خوداوند گب ایسه کی اَ کأرأنَ کونه"،

¹⁸ او کأرأنی کی جٚه پیشتر آشیکأر بو.

¹⁹ «بأزین می ایعتقاد اَنه کی نوأستی اوشأنی رِه کی یوهودی نییٚد و خأیده خودا ور وأگردٚد سخت بیگیریم.

²⁰ فقد بینیویسیم کی حیوأنأنٚ گوشتَ کی بُتأنٚ رِه قوربأنی بوبوستده و خون و حیوأنأنی کی خٚفَه بوستٚده‌یَ نوخورٚد و لأبألیگری نوکونٚد.

²¹ چونکی خٚیلی سأل ایسه کی شبّأت روجأن هرتأ شهر، کنیسه‌یأنٚ میأن اَ شریعتٚ موسا شین موعیظه به.»

نأمه او ایماندأرأنٚ رِه کی یوهودی نوبود

²² پس روسولأن و کیلیسا ریش سیفیدأن تومأمٚ کیلیسا آدمأنٚ اَمرأ تصمیم بیگیفتٚد دو نفرَ پولس و برنابا اَمرأ اوسه کونٚد انطأکیه کی اَ شورأ تصمیمَ اَشأنٚ رِه وأگویا بوکوند. اَ دو نفر ایتأ یوهودأ کی برسابا لقب دأشتی و اویتأ سیلاس. اَشأن هر دوتأن جٚه کیلیسا موهیمٚ آدمأن بود.

²³ اَ نأمه بینیویشته کی خوشأنی اَمرأ ببردٚد اَن بو: «اَمأن روسولأن، ریش سیفیدأن و برأرأن کی اورشلیمٚ شین ایسیم، شومأ برأرأنَ کی انطأکیه، سوریه و قیلیقیه شین ایسید و یوهودی نیئیدَ سلأم رسأنیم.

²⁴ اَطو کی معلومه، ایتأ عیده جٚه اَمی میأن شیمی ورجأ بأمؤده، شٚمٚره پریشأن و غورصه‌دأرَ کودٚد و بودونٚ اَمی فرمأن شٚمٚره بوگفتٚده نیجأت یأفتنٚ رِه، وأستی یوهودٚ شریعتَ قأیم بٚدأرید.

²⁵ پس، اَمأن تصمیم بیگیفتیم جٚه اَمی ور اَ دوتأ نمأینده‌یَ اَمی جأن دیلأن پولس و برنابا اَمرأ شیمی ورجأ اوسه کونیم،

²⁶ او آدمأن کی اَمی خوداوند عیسایٚ مسیحٚ وأسی جٚه خوشأنی جأن بوگذشتٚده.

²⁷ پس اَمأن یهودا و سیلاسَ اوسه کونیم کی شٚمٚره بٚگد کی اَمی فیکر دروأره‌یٚ شیمی موشکیل چیسه.

²⁸ چونکی روح‌القدس رأنمأیی اَمرأ تصمیم بیگیفتیم کی بأر شیمی کولٚ رو نٚنیم، جغرز اَ وأجٚبٚ چیزأن کی:

²⁹ حیوأنأنٚ گوشت کی بُتأنٚ رِه قوربأنی بٚدأ و او حیوأنأنٚ گوشت کی خٚفَه بوستٚده و خون و لأبألیگری جَا دوری بوکونید. اگه اَ کأرأنٚ جَا دوری بوکونید خورومٚ کأر کونیدی، هن و بس.»

³⁰ اَ چأر نفر دفأتن بوشؤده انطأکیه و تومأمٚ مسیحیأنَ جمَ کودٚد و اَ نأمه‌یَ اَشأنَ فأدأد.

³¹ وختی نأمه‌یَ بخأندٚد خٚیلی خوشألَ بوستد.

³² بأزون، یوهودأ و سیلاس کی هر دوتأن پیغمبر بود، خٚیلی گبأنٚ اَمرأ ایمأندأرأنَ تِشویق و تقویت بوکودٚد.

³³ بأزون چن وخت اویَه بئیسأده، و اونٚ پٚسی ایمأندأرأن اَشأنَ سلأمتی اَمرأ اوسه کودٚد کی وأگردٚد اورشلیمٚ کیلیسا.

³⁴ ولی سیلاس تصمیم بیگیفته اویَه بئیسه.

³⁵ پولس و برنابا انطأکیه میأن بئیسأده کی البأقیأنٚ اَمرأ، خودا پیغأمَ بشأرت بٚدٚد و اوشأنَ بأموجد.

پولس برنابا جَا سیوأ وأبه

³⁶ چن وختٚ پٚسی، پولس برنابایَ پیشنهأد بٚدأ کی وأگردٚد و سٚربٚزند و بیدینٚد او شهرأن ایمأندأرأن کی پیشتر اویَه موعیظه بوکوده بود، چی کودأندرد.

³⁷ برنابا قوبیل بوکوده و بٚخأسته یوحنا کی مرقس لقب دأشتی‌یٚم خوشأنی اَمرأ ببرد.

³⁸ ولی پولس صلاح نیدِیی کی خوشأنی اَمرأ اونی‌یَ ببرد کی پامفیلیا میأن اوشأنَ وِلَ کوده و اَشأنٚ اَمرأ همکأری نوکوده بو.

³⁹ اَشأنٚ ایختلأف اَ مأجیرأ وأسی اَندر بوجؤر بیگیفت کی کس‌کسٚ جَا سیوأ بوبوستٚد. برنابا، مرقسَ اوسأده و کشتی اَمرأ بوشؤ قبرس؛

⁴⁰ ولی پولس، سیلاسَ اینتخأب بوکوده و برأرأنٚ دوعأ اَمرأ خودا فیضَ بیسپأرده بوبوسته، بوشؤ سٚفر.

⁴¹ بأزون سوریه و کیلیکیه سرتاسرَ سٚفر بوکوده، کیلیسایأنَ بٚنأ کودی.