اعمالٚ رسولأن 14 - Gilaki New Testament

پولسٚ سنگسأر بوستن قونیه میأن

¹ قونیه شهر میأنم پولس و برنابا بوشؤده یوهودٚ کنیسه‌ میأن و جوری قودرت اَمرأ گب بٚزِده کی خٚیلی جٚه یوهودیأن و اوشأنی کی یوهودی نوبود ایمأن بأوٚردٚد.

² ولی او یوهودیأنی کی ایمأن نأوٚرده بود، پولس و برنابایَ اوشأنی ورجأ کی یوهودی نوبود خرأبَ کودٚد و تأ بتأنستد اوشأنی جَا بد بوگفتد.

³ تومأمٚ اَشأنٚ اَمرأ، پولس و برنابا خٚیلی زمأت اویَه بئیسأده و یأرستنٚ اَمرأ خودا پیغأمَ مردومٚ رِه وأگویا بوکودٚد. خوداوندٚم اَشأنَ قودرت بٚدأ کی پیله موجیزه‌یأن انجأم بٚدٚد کی آدمَ قأقَ کونه تأ ثأبیت بٚبه کی اَشأنٚ پیغأم جٚه اونی ور ایسه.

⁴ ولی شهر میأن دوتأ دسته بوبوستٚد؛ ای عیده یوهودٚ پیله‌ کسأنٚ بألأخأ بود و ایتأ دِه عیده مسیح روسولأنٚ بألأخأ بوبوستٚد.

⁵ او وخت ای عیده جٚه اوشأنی کی یوهودی بود و اوشأنی کی یوهودی نوبود، خوشأنی پیله‌ کسأنٚ اَمرأ جوفت و کلک دیچِده کی اَشأنَ فوتورکد و سنگسأر بوکوند.

⁶ روسولأن وختی جٚه اَ مأجیرأ وأخبدأرَ بوستد، بوگروختٚده لِستره و دِربه شهرأن و او دؤرٚوٚرأن کی لیکائونیه میأن نٚهأ بو،

⁷ و هرتأ جیگأ فأرسِییدی، خودا پیغأمَ مردومَ رسأنِییدی.

پولس و برنابا لِستره و دِربه میأن

⁸ لِستره میأن ایتأ مأربأوٚرده چولأقَ بیدِده کی هیوخت رأ نوشؤ بو.

⁹ او زمأت کی پولس موعیظه کودأندوبو، اون خُب ایشتأوستی و پولس اونَ فأندرسته، بیدِه شفأ گیفتنٚ رِه ایمأن دأره.

¹⁰ پس اونَ بوگفته: «ویریز و بٚپأ بئیس!» اونم خو جأ سٚر وأز بوکوده و بینأ کوده رأ شؤئؤن!

¹¹ وختی اوشأنی کی اَ ایتفأقَ بیدِده فریأد بٚزِده، خوشأنی مأری زوأن اَمرأ بوگفتٚده: «اَ آدمأن خودایأنیدی کی اینسأنٚ مأنستَن آشیکأرَ بوستد!»

¹² اَشأن گومأن بوکودٚد کی برنابا، زِئوس ایسه و پولسٚم، هِرمِس ایسه، چونکی موهیمٚ گبأنَ پولس زِئی.

¹³ زئوسٚ کأهین کی اونی معبد شهر دروأزه جَا بیرون نٚهأ بو، چنتأ گأب و چنتأ تأجٚ گول بأوٚرده شهرٚ دروأزه میأن؛ اون و او جِمئیت حأضیرَ بوستأندوبود کی اوشأنی رِه قوربأنی‌ پیشکش بوکونٚد.

¹⁴ ولی وختی پولس و برنابا بفأمستده کی مردوم چی نیّتی دأرٚده، خوشأنَ رختأنَ پأرَه کودٚد و دکفتٚده مردومٚ میأن و ایجگره بٚزِده:

¹⁵ «اَی مردوم، چٚره اَطو کونیدی؟ اَمأن شیمی مأنستَن اینسأنیم! اَمأن شِمِره اَ خورم خٚوٚرَ بأوٚردیم کی وأستی اَ اَلکی چیزأن جَا کی هیذره نی‌اَرزٚده دٚس اوسأنید و خودایٚ زٚنده ور وأگردید، خودایی کی آسمأن و زیمین و دریأ و هرتأ چی‌یَ کی اونی دورونی نٚهأ، خلق بوکوده.

¹⁶ قدیمی زمأتأنٚ میأن، خودا مردومَ خوشأنی حألٚ میأن وِلَ کوده کی هرتأ رأیَ کی خأیٚد بٚشٚد،

¹⁷ هرچن کی خو وجودٚ ثأبیت کودن وأسی، دأیم اَندر کی لأزیم بو دلیلأنَ اَشأنَ فأدأیی. مثأل رِه، خو رحمت جَا، وختٚ سٚر شِمِره وأرٚش اوسه کونه، و خوروم مأصول و اَندر کی لأزیم ایسه، خورأک شٚمٚره فأدِه، و شیمی دیلَ خوشألی جَا لبألب پورَ کونه.»

¹⁸ آخرپٚسی، حتّا اَ گبأنٚ اَمرأ، سختی اَمرأ بتأنستده مردومٚ قوربأنی پیشکش کودنٚ جولویَ بیگیرٚد.

¹⁹ ولی چن روجٚ پٚسی، چنتأ یوهودی انطأکیه و قونیه جَا بأمؤده و او شهر آدمأنَ اَنتیریک بوکودٚد کی پولسٚ سٚر فووُستٚد و اونَ سنگسأر بوکودٚد و اَ فیکر اَمرأ کی بٚمٚرده، اونَ فأکش فأکشٚ اَمرأ شهرٚ جَا ببردٚد بیرون.

²⁰ ولی چونکی ایمأندأرأن اونی دؤر جمَ بوستد، اون ویریشته و وأگردسته شهر و فردأ روجٚ رِه برنابا اَمرأ بوشؤ دِربه شهر میأن.

پولس و برنابا وأگردٚستٚده انطأکیه کی سوریه میأن نٚهأ بو

²¹ اویه‌یٚم خودا پیغأمَ مردومٚ رِه وأگویا بوکودٚد و ایتأ عیدّه‌یَ مسیح شأگرد چأکودٚد. بأزون وأگردٚستٚد لِستره، قونیه و انطأکیه میأن،

²² و اویَه ایمأندأرأنَ تِشویق کودیدی و قوّت دٚئید کی خوشأنٚ ایمأنَ قأیم بٚدأرٚد و گفتیدی: «خودا ملکوتٚ بودورون شؤئؤن رِه، وأستی خٚیلی سختیأن جَا دٚوأریم.»

²³ بأزون هرتأ کیلیسا میأن، او مسیحیأن کی تجروبه دأشتیده بٚنأده کی ریش سیفید بٚبٚد. او وخت روزه بیگیفتٚده، اَشأنٚ رِه دوعأ بوکودٚد و اوشأنَ بیسپأردٚد او خوداوندٚ دٚس کی اونَ ایمأن دأشتیدی.

²⁴ بأزون، جٚه پیسیدیه رأ سٚفر بوکودٚد پمفلیه ور.

²⁵ و ایوأردِه پِرجه میأن موعیظه بوکودٚد و جٚه اویَه بوشؤده اتالیه.

²⁶ آخرپٚسی، کشتی اَمرأ وأگردٚستٚده سوریه انطأکیه ور، ینی هو شهری کی اَ درأزَ سٚفرَ جٚه اویَه سٚر بیگیفتٚده و اونی میأن اَشأن خودا فیضَ بیسپأرده بوبوسته‌ بود کی اَ خیدمتَ انجأم بٚدٚد.

²⁷ وختی پولس و برنابا فأرٚسِد انطأکیه میأن، مسیحیأنَ جمَ کودٚد و خوشأنٚ سٚفرٚ مأجیرأیَ وأگویا بوکودٚد، بشأرت بٚدأده کی چوطو خودا، اوشأنیٚم کی یوهودی نوبوده رِه، ایمأنٚ درأنَ وأزَ کوده.

²⁸ اوشأن خٚیلی زمأت انطأکیه مسیحیأنٚ ورجأ بئیسأده.