اعمالٚ رسولأن 12 - Gilaki New Testament

یعقوبٚ کوشته بوستن و پطرسٚ زندأنی بوستن

¹ هه زمأتأنٚ میأن بو کی هیرودیسٚ پأدیشأ ای عیده جٚه مسیح شأگردأنَ اَذِت آزأر و شکنجه کودی.

² اونی فرمأنٚ اَمرأ یعقوب، یوحنا برأر، شمشیرٚ اَمرأ بوکوشته بوبوسته.

³ وختی هیرودیس بیدِه کی اونی اَ کأرٚ جَا یوهود پیله‌ کسأنٚ خوش بأمؤ، یوهود عَید پِسَح روجأنٚ میأن پطرسٚم بیگیفته،

⁴ و اونَ زندأنٚ میأن تأوٚدأ و فرمأن بٚدأ شونزده‌تأ سروأز، زندأن میأنی اونی جَا نیگهبأنی بوکوند. هیرودیس بینأ دأشتی عَید پِسَح پٚسی، پطرسَ بیرون بأوٚره کی مردوم ورجأ موحأکمه بٚبه.

⁵ ولی تومأمٚ اَ زمأتٚ میأنی کی پطرس زندأن میأن ایسأبو، کیلیسا خٚیلی حقٚ سعی اَمرأ اونی وأسی دوعأ کودیدی.

پطرس آزأدَ بوستن زندأنٚ جَا کی موجیزه مأنستَن بو

⁶ ای شب پیشتر جٚه او روج کی قرأر بو هیرودیس پطرسَ موحأکمه بوکونه، اونَ دونه زینجیلٚ اَمرأ دٚوٚسته بود و دوتأ سروأزٚ میأنی خوفته بو. البأقی سروأزأنٚم او زندأنٚ در ورجأ نیگهبأنی دٚئندوبود.

⁷ نأخٚوٚرکی زندأنٚ دورونی روشنَ بوسته و خوداوندٚ فٚرٚشته بأمؤ و پطرسٚ ورجأ بٚپأ بئیسأ! بأزون پطرسٚ تکَ بٚزِه و اونَ ویریزأنه و بوگفته: «زوتر ویریز!» هو وخت زینجیلأن اونی دٚسأنٚ جَا وأزَ بوسته و زیمین سٚر فووُسته!

⁸ فٚرٚشته اونَ بوگفته: «تی رختأن و پأاَفزأرٚ دوکون.» پطرسٚم دوکوده. او وخت فٚرٚشته اونَ بوگفته: «تی ردأیَ تی کؤلٚ رو تأوٚد و می دونبألسر بیأ!»

⁹ اَطویی بو کی، پطرس زندأنٚ جَا بیرون بأمؤ و فٚرٚشته دونبألسر رأ دکفته. ولی تومأمٚ اَ زمأتأنٚ میأنی فیکر کودی خأب دئندره و بأوٚر نوکودی کی بیدأر بٚبه.

¹⁰ بأزون اوّلی و دویُمی نیگهبأنأنٚ جَا دٚوأرٚستد کی فأرٚسِده زندأنٚ آهینی دروأزه‌یَ کی ایتأ کوچه ور وأزَ بوستی. اَ دٚرٚم خؤرَه خؤرَه وأزَ بوسته! پس، جٚه اویٚم رٚدَ بوستد کی فأرٚسِده کوچه آخر، و نأخٚوٚرکی فٚرٚشته اونَ بٚنأ بوشؤ.

¹¹ پطرس کی تأزه وأخبدأرَ بوسته بو کی چی بوبوسته، خؤرَه بوگفته: «پس حِئقت دأره کی خوداوند خو فٚرٚشته‌یَ اوسه کوده، کی هیرودیسٚ پٚنجه و یوهودٚ پیله‌ کسأنٚ جوفت و کلک کی مٚرَه دیچه بودٚ جَا جیویزأنه!»

¹² او وخت، ایپچه بئیسأ، بوشؤ مریم خأنه یوحنا مأر کی مرقس لقب دأشتی. اویَه خٚیلیأن دوعأ کودنٚ وأسی جمَ بوسته‌ بود.

¹³ پطرس در بٚزِه و ایتأ خیدمتکأرٚ زنأی رُدا نأم بأمؤ کی دٚرٚ وأکونِه.

¹⁴ وختی پطرسَ صدایَ بشتأوسته، خوشألی جَا، دٚرٚ وأنکوده بو، وأگردسته کی پطرسٚ دٚر زِئنٚ خورومٚ خٚوٚرَ همٚتأنَ فأده.

¹⁵ ولی اوشأن اونی گبَ بأوٚر نوکودٚد و بوگفتٚده: «مگه دیوأنه بوستی؟» ولی وختی بیدِده اصرأر کودأندٚره، بوگفتٚده: «لأبد اونی فٚرٚشته ایسه.»

¹⁶ ولی پطرس توندأ توند در زِئندوبو. آخرپٚسی بوشؤده و دٚرٚ وأکودٚد. وختی بیدِده پطرس ایسه، قأق بئیسأده.

¹⁷ پطرس ایشأره بوکوده کی آرأم بٚبٚد و نقل بوکوده کی چی بوبوسته و خوداوند چوطو اونَ زندأنٚ جَا بیرون بأوٚرده. پیشتر جٚه شؤئؤنٚم اَشأنٚ جَا بٚخأسته کی یعقوب و البأقی برأرأنَ وأخبدأرَ کونٚد. اونٚ پٚسی بوشؤ ایتأ جیگأ کی اَمنتر بٚبه.

¹⁸ صُب زندأن میأن بلوأ دکفته. همٚتأن پطرسٚ رِه وأمؤختیدی.

¹⁹ وختی هیرودیس اونَ دونبأل اوسه کوده و وأخبٚ بوسته کی زندأنٚ میأن نئیسأ، هر شونزده‌تأ نیگهبأنٚ تأوٚدأ زندأن، و اوشأنٚ اعدام کودنٚ رِه حوکم فأدأ. او وخت یوهودیه‌یَ بٚنأ و بوشؤ قیصریه و ایپچه زمأت اویَه بئیسأ.

هیرودیسٚ مٚردنٚ

²⁰ او زمأت کی هیرودیس قیصریه میأن ایسأبو، ایتأ دسته جٚه صور و صیدونٚ موبأشرأن اونی دِئنٚ رِه بأمؤد. هیرودیس اَ دوتأ شهرٚ آدمأن جَا ایتأ جولفٚ کینه دأشتی. پس اَشأن اونی قصرٚ وزیر، بلاستوسٚ حمایتَ فأگیفتد و هیرودیسٚ جَا بٚخأستٚد کی صولح بوکونٚد، چونکی اونی سرزیمینٚ اَمرأ بیهین بوفروش کودن، اوشأنی شهرأنٚ اقتصأدٚ رِه خُب بو.

²¹ او قرأر بٚنأ بوبوسته روجٚ میأن، هیرودیس ایتأ شأهأنه رخت دوکوده سلطنتٚ تختٚ رو بینیشت و بینأ کوده سوخنرأنی کودن.

²² مردوم فریأد بٚزِده: «اَن خودا صدا ایسه، نه اینسأنٚ صدا!»

²³ هو وخت خوداوندٚ فٚرٚشته هیرودیسَ اوطویی بٚزِه کی تومأمٚ اونٚ جأن کلمٚ جَا پورَ بوسته و بٚمٚرده، چون عوض اَنکی خودای پرستٚش بوکونه، وئأشته کی مردوم اونَ پرستٚش بوکوند.

²⁴ ولی خودا پیغأم توندأ توند همٚتأنَ فأرٚسِیی ایماندأرأنٚ آدم نفرأن هر روج ویشترَ بوستی.

²⁵ برنابا و سولسٚم بوشؤده اورشلیم و مسیحیأنٚ پیشکشأنَ کیلیسایَ فأدأده و اونٚ پٚسی وأگردٚستٚده انطأکیه شهرٚ میأن. اَ سٚفرٚ میأن یوحنایٚم کی مرقس لقب دأشتی‌یَ خوشأنی اَمرأ ببردٚد.