سوم یوحنا 1 - Gilaki New Testament

¹ جٚه کیلیسا شیخ، گایوسٚ عزیزٚ رِه کی اونَ می دیل دورون خٚیلی دوس دأرم.

² می جأنٚ دیلٚ برأر، خودا جَا خأیم کی تومأمٚ تی کأرأنٚ میأن موفق بیبی و تی بٚدٚن، تی روح مأنستَن سأق و سألیم بٚبه.

³ وختی اَمی مسیحی برأرأن اَیَه بأمؤده، مٚرَه خٚیلی خوشألَ کودٚد چونکی مٚرَه خٚوٚر بٚدأد کی او ایلاهی حِئقتأنٚ وفأدأری و اینجیلٚ حوکمأنٚ دوروستی موطأبٚق رفتأر کونی.

⁴ مِرِه هیچی ویشتر جٚه اَن خوشألَ نوکونه کی بشتأوم کی می زأکأن اَطویی حِئقتأنٚ جَا ایطأعت کونٚده.

پذیرأیی کودن خودا خأدیمأنٚ جَا

⁵ می جأنٚ دیل برأر، تو خودا خیدمت کودنٚ وأسی وفأدأری چونکی اونی خأدیمأنٚ جَا کی جٚه اویَه دٚوأرٚده پذیرأیی کونی، هرچن کی تی آشینأیأنٚ جَا نییٚد.

⁶ اَشأن، اَمی کیلیسا دورونی تی پورجٚه محبتٚ کردکأرأنَ اَمِرِه تعریف بوکودٚد. پس کأرٚ خُبی کونی کی اَشأنٚ اوجوری کی خودا شأیسته ایسه، روأنَه کونی کی بٚشٚد سٚفر.

⁷ چونکی اَشأن خودا خیدمتٚ وأسی سٚفر کونٚد کی خوروم خٚوٚرٚ پیغأمَ اوشأنی رِه کی مسیحَ هنو ایمأن نأوٚردٚده وأگویا بوکونٚد بودونٚ اَنکی کومکی جٚه اوشأن فأگیرٚد.

⁸ پس اَمِرِه وأجبه کی اَجور آدمأنٚ یاور بیبیم کی اَمأنٚم او حِئقتٚ پیش بردنٚ میأن اَشأنٚ اَمرأ شیریک بیبیم.

⁹ ایوأردِه ایتأ نأمه اَ موردٚ وأسی کیلیسا رِه بینیویشتم امّا دیوترَفیس کی رهبری جأجیگأیَ دوس دأره اَمٚرَه تحویل نیگیره.

¹⁰ وختی بأمؤم، اونی زشتٚ کردکأرأن تِرِه تعریف کونم تأ بدأنی چی بوهتأنأن و چی زشتٚ گبأنی اَمٚرَه بچسبأنه. اون هم کیلیسا خیدمتکأرأنٚ کی سٚفرٚ دورون ایسأده پذیرأیی نوکونه و هم دیگرأنٚ دستور دِهه کی اوشأنٚ خوشأنی خأنه رأ ندٚد هرکٚسیٚم کی اونی گبأنٚ جَا ایطأعت نوکونٚه کیلیسا جَا بیرون تأوٚدِه.

¹¹ اَی جأنٚ دیل، بدی جَا الگو اونسأن بلکی خُبی جَا الگو اوسأن چونکی اونی کی خُبی کونه خودا زأکٚ امّا اونی کی همیشٚک بدی کونه خودایَ نشنأسه.

¹² امّا همٚتأن دیمیتریوسٚ وأسی خوروم شهأدت دٚهٚد و اَ شهأدت دوروسته. اَمأنٚم گیم کی اون آدمٚ خُبی ایسه و دأنی کی رأست گیم.

خاتمه

¹³ خٚیلی موردأن دأرم کی بٚگم، امّا نخأیٚم همه‌یَ اَ نأمه دورون بینیویسٚم،

¹⁴ چونکی اومید دأرم خٚیلی زود بأیٚم تٚرَه بیدینٚم کی رو در رو گب بٚزنیم.

¹⁵ آرأمی تی اَمرأ بٚبه. ریفِقأن همٚتأن تٚرَه سلأم رٚسأنده. می سلأمَ تک تکٚ ریفِقأنٚ فأرسأن.