دوم تیموتائوس 4 - Gilaki New Testament

¹ خودا و عیسایٚ مسیحٚ حوضور کی ایتأ روج زٚنده‌یأن و مورده‌یأنَ قیضأوت کونه، تٚرَه اَمر کونم کی

² کلامَ موعیظه بوکونی. هر موقیتٚ میأنی، وخت و بی وخت، آمأده بوبو. صبرٚ زیأدٚ اَمرأ ایمأندأرأنَ بأموج و اوشأنَ ایصلأح و تِنبیه و تِشویق بوکون.

³ چونکی زمأتی فأرٚسِه کی دِه مردوم حِئقتَ گوش نٚدٚده، بلکی معلمأنی دونبأل شٚده کی اوشأنی بأبٚ میل گب زنٚده.

⁴ اَشأن دیقتی خودا رأس‌رأسِی پیغأمٚ کلامَ نأرٚده، بلکی کورمأل کورمأل افسأنه‌یأنَ دونبألسر شٚده کی گومرأ کونٚده.

⁵ ولی تو تومأمٚ شرأیطٚ دورون قأیم بئیس و جٚه خودا رأ زحمت کشئن نوأترسئن. مردومٚ مسیح ور هیدأیت بوکون و تی وظأیفَ کأمیل انجأم بٚدٚن.

⁶ چونکی اَسه ایتأ فوکودنی هدیه مأنستَن، فووستأندأرٚم و می مرگٚ زمأت فأرٚسِه.

⁷ خورومٚ جنگٚ دورون خُب بٚجٚنگستم و اَ موسأبقه‌یَ تومأنَ کودم و می خیدمتَ وفأدأری اَمرأ انجأم بٚدأم.

⁸ اَسه ایتأ تأج آسمأنٚ میأن می رأفأ ایسأ، هو تأج کی اَمی خوداوند مسیح، او عأدیلٚ قأضی خو وأگردٚستنٚ روجٚ رِه مٚرَه فأدِه، نه مٚرَه بلکی تومأمٚ اوشأنَ کی خوشأنٚ زٚندیگی دورون نیشأن بٚدأده اونی رِه ایشتیأق دأرٚده و اونٚ رأفأ ایسأده.

پولسٚ آخری گبأن

⁹ حقٚ سعی بوکون کی هرچی زوتر می ورجأ بأیی،

¹⁰ چونکی دیماس مٚرَه ترکَ کوده؛ اون اَ دونیأ کأرأنٚ علأقه دأشتٚن و دیل دٚوٚستٚنٚ وأسی بوشؤ تسالونیکی. هطویم کریسکیس بوشؤ غلاطیه و تیتوس بوشؤ دلماتیه.

¹¹ فقد لوقا می اَمرأیه. هر وخت اَمؤندری، مرقُسم تی اَمرأ بأوٚر، چونکی اونی اَمرأ کأر دأرم.

¹² تیخیکوس دِه اَیَه نئیسأ چونکی اونَ اوسه کودم بشه افسس.

¹³ وختی اَمؤندری، تٚرَه جٚه خأطرٚ نشه کی می عبأیَ کی تروآسٚ میأنی کارپوسٚ ورجأ بنأم تی اَمرأ بأوری. هوطویم کیتأبأن، بوخصوص هو بینیویشته‌یأنی کی پوست جَا ایسٚدم بأوٚر.

¹⁴ ایسکندرٚ میسگر خٚیلی مٚرَه بدی بوکوده؛ خوداوند خودش اونَ تِنبیه بوکونه.

¹⁵ تونم اونی جَا دؤر بئیس، چونکی اَمی گبأنٚ ضد ویریشته.

¹⁶ اوّلی محکمه جلسه میأن، هیکس می کومکٚ وأسی، جلسه میأن حأضیرٚ نوبوسته؛ همٚتأن مٚرَه ترکَ کودٚد. اومید دأرم کی خودا اَ ایشتیوأیَ اَشأنٚ رِه بٚحیسأب نأوٚره.

¹⁷ امّا خوداوند خودش مٚرَه یاور بٚدأ و فورصت بٚدأ کی شوجأعتٚ اَمرأ اینجیلٚ نیجأتٚ پیغأمَ تومأمٚ دونیأ قومأنَ گوش فأرسأنم. اون مٚرَه جٚه حتمی مٚردن نیجأت بٚدأ و ولأشته کی شیرأنٚ طوعمه ببم.

¹⁸ هطویه، خوداوند مٚرَه هر نأجورٚ ایتفأقٚ جَا حیفظ کونه و سلأمتی اَمرأ، خو آسمأنی جأجیگأیأنَ فأرٚسأنه. جلال تأ اَبد خوداوند شین بٚبه. آمین

پولسٚ آخری سلأمأن

¹⁹ می سلأمَ پریسکیلا و آکیلایَ برسأن، هطویم او کسأنی‌یَ کی اُنیسیفوروس خأنه ایسأده.

²⁰ اراستوس قرنتسٚ میأنی بئیسأ؛ تروفیموسَم کی نأخوش احوأل بو، میلیتوسٚ میأنی ترکَ کودم و بأمؤم.

²¹ حقٚ سعی بٚزٚن قبل اَنکی زمستأن بأیِه، اَیَه بئیسی، یوبولوس، پودِنس و لینوس، کلادیا و همٚتأ برأرأن سلأم رسأنیدی.

²² عیسایٚ مسیحٚ خوداوند تی روحٚ اَمرأ بٚبه. خودا فیض شیمی اَمرأ بٚبه.