دوم تیموتائوس 3 - Gilaki New Testament

ایتفأقأنی کی آخری روجأن مردومٚ رِه دکفه

¹ امّا اَنٚم وأستی بدأنی کی آخری روجأنٚ دورون خٚیلی سختٚ زمأتأنٚ ایتفأق دکفه،

² چونکی مردومأن اَطو بوبوستده: خودخأه، پولدوس، هر کی فقد خؤرَه قوبیل دأره، مغرور، بد دٚهٚن، خو پئر و مأرٚ جَا فرمأن نٚبٚره و شوکرگوزأری نوکونه، هیچی‌یَ موقدس نأنِه.

³ هوطویم محبت نأرِه، گوذشت نأرِه، بُهتأن زٚنِه، گونأیأن دونبألسر رأ دکفه، توندٚ اَخلأق و خورومٚ کأرأنٚ جَا تنفر دأره.

⁴ او زمأت، خیأنٚت کودن ریفأقتٚ میأن ایتأ عادی کأر بٚنظر اَیِه. اینسأنأن لیذّت بردنَ ویشتر جٚه خودا دوس دأرٚده؛

⁵ ظأهیرَ میأن آدمأنٚ بأخودا ایسٚده امّا اونٚ قودرتَ اینکأر کونٚده. اَجور آدمأنٚ اَمرأ کأری نوأدأشتن.

⁶ هه آدمأن ایسٚد کی هیزأرتأ جوفت و کلکٚ اَمرأ مردومٚ خأنه‌یأنٚ بودورون شٚده و زنأکأنی اَمرأ کی عقلٚ دوروست و حیسأبی نأرٚده و پیشترأن گونأ کودیدی، ریفِقَ بٚده و خوشأنٚ غلطٚ آموجه‌یأنَ اوشأنَ آموجٚده.

⁷ اَجور زنأکأن اوشأنَ کی تأزه آموجه‌یأنٚ اَوٚرٚده، دونبأل کونٚده، امّا هیوخت حِئقتٚ شنأختَ نیأفٚده.

⁸ هوطو کی ینیس و یمبریس، موسا اَمرأ موخألفت بوکودٚده، اَ معلمأنٚم حِئقت و رأستی اَمرأ موخألفت کونٚد؛ اَشأن کثیف و فأسیدٚ فیکرأن دأرٚده و خوشأنٚ ایمأنٚ جَا وأگردٚستٚده.

⁹ امّا همیشٚک اَطو نٚمأنه و ایتأ روج گومرأیی و اَشأنٚ نأدأنی همٚتأنٚ رِه آشیکأرَ به، هوطو کی ینیس و یمبریس نأدأنی آشیکأر بوبوسته.

پولسٚ نصیحتأن و سیفأرشأن تیموتائوس رِه

¹⁰ امّا تو، تیموتائوس خودت دأنی کی من چی آموج دٚهٚم، چوطو زٚندیگی کونم و می نقشه زٚندیگی دورون چیسه. تو، می ایمأن و صبر و محبت و ایستقأمتٚ جَا وأخوری

¹¹ و شأهیدی کی چی زحمتأن و عذأبأنی اینجیلٚ پیغأمٚ وأگویا کودنٚ رِه بٚکٚشئم؛ تٚرَه کی یأده انطأکیه، قونیه و لِستره میأن چی سختیأن و رنجأنی بیدِم. امّا خوداوند مٚرَه جٚه همه اَشأن نیجأت بٚدأ.

¹² رأس‌رأسِی، همٚتأن کی خأیده خودا ایرأده موطأبٚق زٚندیگی بوکوند مسیحٚ عیسا دوشمنأنٚ جَا اَذِت آزأر دینٚده.

¹³ امّا گونأکأرٚ آدمأن و دورُغگو دینٚ عُلمأ، روج بٚروج بدترَ بٚده، خٚیلیأنَ گول زنٚده و خودشأنم شیطانٚ گولَ خورٚده.

¹⁴ ولی تو وأستی اونچی‌یَ کی بأمؤختی، کأمیل ایمأن بٚدأری. اونی دوروستی جَا ایطمینأن دأری چونکی دأنی اوشأنَ قأبیل ایطمینأنٚ آدمأنٚ جَا بأمؤختی؛

¹⁵ خودٚتٚم جٚه جاغٚلٚگی موقدس کیتأبأنٚ بأمؤختی. اَ کیتأبأن تٚرَه حیکمت دِهه کی بدأنی نیجأت یأفتن، جٚه عیسا مسیح، ایمأنٚ رأ ایمکأن دأره.

¹⁶ هطویم، تومأمٚ موقدسٚ کیتأبأن، خودا جَا ایسه و خوروم چی‌ ایسه کی حِئقتَ اَمٚرَه آموجه و اونچی‌یَ کی اَمی زٚندیگی میأن دوروست نییٚه، اَمٚرَه تذکر دِهه. هطویم وختی ایتأ رأیَ ایشتیوأ شیمی، اَمٚرَه ایصلأح کونه و اونچی‌یَ کی دوروسته اَمٚرَه آموجه.

¹⁷ خودا، خو کلامٚ اَمرأ، اَمٚرَه جٚه هر ور آمأدَه کونِه کی همه کسَ خُبی بوکونیم.