دوم تسالونیکیان 3 - Gilaki New Testament

دوعأ رِه تقأضأ کودن

¹ اَی برأرأن، آخرپٚسی شیمی جَا خأهیش کونم کی اَمِرِه دوعأ بوکونید. اوّل دوعأ بوکونید کی خودا پیغأم، بودونٚ مأنع همٚتأ جأجیگأیأنٚ میأن کی وأگویا بِه، سریع پٚخشَ بٚه و مردوم اونی وأسی نیجأت بیأفٚد، هوطو کی بأعیثٚ شیمی نیجأتم بوبوسته.

² هطویم، دوعأ بوکونید کی او شرورأن و نأجورٚ آدمأنٚ پٚنجه جَا جیویزیم، چونکی همٚتأن ایمأندأر نییٚد.

³ امّا خوداوند اَمینه و شٚمٚره قوّت بخشه و شیطان هرتأ فوتورکستنٚ وخت، شٚمٚره قوّت دِهه.

⁴ خوداوند اَمٚرَه اَ ایطمینأنَ بٚبخشه کی هرچی شٚمٚره بأمؤختیم، انجأم دٚئندریدی و بأزون انجأم دیهیدی.

⁵ خوداوند شیمی دیلأنَ، مسیح ایستقأمت و خودا محبتٚ جَا رأنمأیی بوکونه.

آبرومندأنه زٚندیگی کودنٚ رِه تِشویق کودن

⁶ و اَسه گولٚ برأرأن، او حوکمَ کی اَمی خوداوند، عیسایٚ مسیح ایسمٚ اَمرأ و اونی قودرتٚ اَمرأ فأدیم، دیقت بوکونید: جٚه هر تنبلٚ مسیحی کی خو وختأنَ بیکأر گردِه و نٚخأیه او الگو کی فأدأئیمٚ مأنستَن کأر بوکونه، دؤر بئیسید.

⁷ چونکی شومأن خُب دأنیدی کی چی درسی‌ وأستی اَمی جَا بأموجید: شومأن هیوخت نیدِیید کی اَمأن شیمی میأن بیکأر بٚگردیم.

⁸ هیکسٚ نأنَ موفت نوخوردیم و ایتأ لوقمه نأنٚ وأسی شبندروج کأر بوکودیم و عرق فوکودیم کی ایپچه نأن بٚدٚس بأوریم و شیمی سٚربأر نیبیم؛

⁹ نه اَنکی حق نأشتیم شیمی جَا خورأک بخأییم، بلکی خأستیم ایتأ رأ روش شٚمٚره فأدیم و نیشأن بٚدیم کی رزق و روزی رِه وأستی کأر کودن.

¹⁰ هو وختأنی کی شیمی ورجأ اویَه ایسأبیم، حوکم بوکودیم کی: «هرکی نٚخأیه کأر بوکونه، حق نأرِه ایچی بوخوره.»

¹¹ ولی بأزم ایشتأویم کی شیمی میأن بعضیتأن تنبلی کونٚده و نخأیده تن بٚکأر بٚدٚد؛ حتّا شیمی وختم، دیگرأنٚ پوشت سٚر گویی اَمرأ لقد دٚمٚج کونٚده.

¹² اَجور آدمأنَ، در خوداوند عیسا مسیحٚ ایسم، نصیحت کونیم و فرمأن دیهیم کی خوشأنٚ زٚندیگی‌یَ نٚظم بٚدٚد و آرأمٚش بٚبخشٚد و کأر و حقٚ سعی اَمرأ ایتأ لوقمه نأن بٚدٚس بأوٚرٚد.

¹³ اَسأیٚم البأقی‌یٚ شومأ گولٚ برأرأن و خأخورأنَ گم کی هیوخت جٚه خورومٚ کأرأنٚ انجأم دٚئن خستَه نیبید.

¹⁴ ولی اَگرم اینفر ایسأ کی نٚخأیه اَمی دستورأنٚ جَا کی اَ نأمه دورون بأمؤ ایطأعت بوکونه، شیمی حواس اونی ور بمأنه و اونی اَمرأ شؤئؤن اَمؤن نوکونید کی خو کردکأرٚ وأسی شرمنده بٚبه.

¹⁵ امّا اونَ نوأستی ایتأ دوشمنٚ مأنستَن فأندٚرید، بلکی ایتأ برأری مأنستَن کی نصیحت بوستنَ ایحتیأج دأره، اونَ وأخبدأرَ کونید.

پولسٚ آخری سلأمأن

¹⁶ خوداوند کی خودش آرأمٚشٚ سٚرچشمه ایسه شٚمٚره هرتأ وضعٚ میأن کی ایسأیید، دائیم آرأمٚش فأدٚه. خوداوند شومأ همٚتأنٚ اَمرأ بٚبه.

¹⁷ اَسه من، پولس اَ سلأمَ، می البأقی نأمه‌یأن مأنستَن می دسخطٚ اَمرأ نیویسٚم کی بفأمید اَ نأمه جٚه می ور ایسه. اَنٚم می دسخطٚ:

¹⁸ اَمی خوداوند عیسایٚ مسیحٚ فیض شیمی همٚتأنٚ اَمرأ بٚبه.